ރާއްޖޭގައި ކޮވިޑް-19ށް ފަރުވާ ހޯދަމުންދާ މީހުންގެ އަދަދު 24،867ށް އަރައިފިއެވެ.

ހެލްތު ޕްރޮޓެކްޝަން އެޖެންސީން އާންމުކުރި ތަފާސްހިސާބުތައް ދައްކާގޮތުން އަންގާރަ ދުވަހު އިރު އޮއްސި ހަޔަކުން ފެށިގެން ބުދަ ދުވަހުގެ އިރު އޮއްސި ހަޔަކާ ދެމެދު ނެގި 5186 ސާމްޕަލްގެ ތެރެއިން 1299 މީހަކު ވަނީ ޕޮޒިޓިވްވެފައެވެ. އޭގެ ތެރެއިން 890 މީހުންނަކީ މާލެ ސަރަހައްދުން ޕޮޒިޓިވްވި މީހުންނެވެ. އަދި އަތޮޅުތެރެއިން 334 ކޭހާއި، ރިސޯޓުތަކުން 48 ކޭހުގެ އިތުރަށް އިންޑަސްޓްރިއަލް ރަށްރަށުން 17 ކޭހެއް ވަނީ ރިޕޯޓުކޮށްފައެވެ. އަދި ލައިވްއެބޯޑްތަކުން ވެސް 10 ކޭސް ރިޕޯޓުކޮށްފައިވެއެވެ.

މިއާއެކު ރާއްޖެއިން ބަލި ޖެހުނު މީހުންގެ އަދަދު 59،644ށް އަރާފައިވާއިރު އޭގެ ތެރެއިން 34،621 މީހަކު ވަނީ ބަލިން ރަނގަޅުވެފައެވެ. އަދި މިހާރު ފަރުވާދެމުންއަންނަނީ 24،867 މީހުންނަށެވެ. އޭގެ ތެރެއިން 285 މީހަކަށް ފަރުވާދެމުން އަންނަނީ އެޑްމިޓްކޮށްގެންނެވެ. މި ބަލީގައި ރާއްޖެއިން މިހާތަނަށް 147 މީހަކު ވަނީ ނިޔާވެފައެވެ.

މި ފަހުން ރާއްޖެއިން ފެންނަ ކޮވިޑް-19 ކޭސްތަކުގެ އަދަދު އިންތިހާއަށް އިތުރުވެފައިވާއިރު، ރާއްޖެއިން ކޮންމެ ދުވަހަކު ރިޕޯޓުކުރާ ކޭހުގެ އަދަދު 1000ން މަތީގައި ހުންނަތާ ވަނީ ދެ ހަފުތާއަށް ވުރެ ގިނަ ދުވަސްވެފައެވެ. ކޭހުގެ އަދަދު އިތުރުވުމުގެ އިތުރަށް މި ބަލީގައި މަރުވާ މީހުންގެ އަދަދު ވެސް ވަނީ ބޮޑުތަނުން އިތުރުވެފައެވެ. މި މަހުގެ މިހާތަނަށް އެކަނި ވެސް 70އެއްހާ މީހުން ވަނީ މި ބަލީގައި މަރުވެފައެވެ. ކޮންމެ ދުވަހަކު ވެސް މަދުވެގެން ތިން މަރު ރިޕޯޓުނުކުރާ ދުވަހެެއް ނާދެއެވެ.

އަދަދު އިތުރުވުމާ އެކު މިހާރު ބޭރުގައި އުޅެވޭނީ ހަމައެކަނި ހެނދުނު 8ން ހަވީރު 4ށެވެ. އެ ގަޑިތަކުގައި ވެސް ބޭރަށް ދެވެނީ ފުލުހުން ދޫކުރާ ވަކި ފާހަކާ އެކުގައެވެ.