ހުޅުމާލެ މެޑިކަލް ފެސިލިޓީގައި އޮތް ޚާއްސަ އެހީއަށް ބޭނުންވާ ބަލި މީހަކަށް, އޭނާގެ އެހީތެރިޔާ އަނިޔާކުރާ މަންޒަރު ފެންނަ ވީޑިއޯއެއް އާންމުވެއްޖެއެވެ.  

މި ވީޑިއޯ ސޯޝަލް މީޑިއާގައި ހިއްސާކުރި ފުރްޤާން މުޙައްމަދު 'ރާއްޖެ އެމްވީ' އަށް މައުލޫމާތު ދިން ގޮތުގައި, ބަލި މީހާއަށް އަނިޔާކޮށްފައި ވަނީ ބަލިމީހާގެ ގާތުގައި ހުރި ބަންގްލަދޭޝް އަށް ނިސްބަތްވާ އެހީތެރިއެކެވެ.

'ރާއްޖެއެމްވީ' އަށް އެނގިފައިވާ ގޮތުގައި މި ވީޑިއޯ ނަގާފައިވަނީ ބުދަ ދުވަހުގެ ހެނދުނުގެ ވަގުތެއްގައެވެ. ވީޑިއޯ އިން ފެންނަ ގޮތުގައި ބަލިމީހާގެ ގާތު އެހީތެރިޔާ ކޮންމެވެސް އެއްޗެއް ބުނުމުން ބަލިމީހާ ވެސް ޖަވާބުގައި ކޮންމެވެސް ވާހަކައެއް ބުނެއެވެ. އެއާއެކު ވަރަށް ބާރަށް ބަލިމީހާގެ ކަންކަށިމަތީ އެހީތެރިޔާ ޖަހާ މަންޒަރު ފެނިގެންދެއެެވެ. ދެން އިވެނީ ވަރަށް ބާރަށް ބަލިމީހާ ރޯ އަޑެވެ.

ބަލި މީހާއަށް އެވަގުތު އަނިޔާކޮށްފައި ވަނީ ކުޑަކަމުނުދިޔުމަށް ބުނެ އިންޒާރު ދިނުމަށްފަހު ކަމަށް މަންޒަރުދުށް ފަރާތްތަކުން ބުނެއެވެ.

މައުލޫމާތު ލިބޭގޮތުގައި ބަލި މީހާއަކީ އެކަނި ހިނގާބިނގާވެ ނޫޅެވޭ, ނަފްސާނީ މައްސަލަތަކެއް ވެސް ހުންނަ ޚާއްސަ އެހީއަށް ބޭނުންވާ ޒުވާނެކެވެ. އެނގިފައިވާ ގޮތުގައި އާންމުކޮށް ކޮންމެ ދުވަހަކު ވެސް އެހީތެރިޔާގެ ފަރާތުން ކޮންމެވެސް އަނިޔާއެއް ބަލިމީހާއަށް ލިބެއެވެ. އެގޮތުން ބަލިމީހާ ފާޚާނާއަށް ވައްދާ ވަގުތުތަކުގައި ވަރަށް ބާރަށް ރުއިމުގެ އަޑު ފެސިލިޓީގައި ތިބި ބައެއް މީހުނަށް ވަނީ އިވިފައެވެ.

މި ވީޑިއޯ ސޯޝަލް މީޑިއާގައި ހިއްސާކުރުމާއެކު ކަމާ ބެހޭ ފަރާތްތަކުގެ ސަމާލުކަމަށް މި މައްސަލަ ވަނީ އައިސްފައެވެ. މި ކަމާ ބެހޭގޮތުން ރައީސް އޮފީހުގެ ތަރުޖަމާނު މަބްރޫކް އަޒީޒް ވިދާޅުވީ, މި ކަމުގެ މައުލޫމާތު ފުލުހުންނަށް މިހާރު ލިބިފައި ވާކަމަށެވެ. އަދި އެހީތެރިޔާ މިހާރު އެތަނުން ބޭރު ކުރެވިފައި ވާކަމަށާއި, ބަލި މީހާގެ އާއިލާއަށް ވެސް އެ މައުލޫމާތު މިހާރު ހިއްސާކޮށްފައި ވާކަމަށެވެ.

ފުލުހުން ބުނީ, ހުޅުމާލެ މެޑިކަލް ފެސިލިޓީގައި އޮތް ބަލި މީހަކަށް, އާއިލާގެ ފަރާތުން ހަމަޖައްސާފައި ހުރި އެހީތެރިޔަކު އަނިޔާކުރި މައްސަލައެއް ފުލުހުންނަށް ހުށަހަޅާފައި ވާކަމަށެވެ. އަދި އެކަމުގެ މައުލޫމާތު ހުޅުމާލެ މެޑިކަލް ފެސިލިޓީން ފުލުހުންނަށް ހިއްސާކުރީ ހަވީރު 16:30 ހާއިރު ކަމަށް ފުލުހުން ބުނެއެވެ.

މި މައްސަލަ ފުލުހުން މިހާރު ގެންދަނީ ތަހުގީގު ކުރަމުންނެވެ.