ސިއްޙީ އެހިތެރިންގެ ދަތިކަން ފިޔަވައި އިތުރު ދަތިކަމެއް ނެތް ކަމަށް ރައީސުލްޖުމްހޫރިއްޔާ ވިދާޅުވެއްޖެއެވެ.

މާލެ ސަރަހައްދު ބުދަ ދުވަހު ފުރަބަންދު ކުރުމަށް ނިންމުމާ ގުޅިގެން ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވީ، ކޮވިޑްގެ ހާލަތު މިހާ ގޯސްވެފައިވީ ނަަމަވެސް ސިއްޙީ އެހީތެރިންގެ ދަތިކަން ފިޔަވައި އިތުރު އެއްވެސް ދަތިކަމެއް ނެތް ކަމަށާއި، މިކަމުގައި ސަރުކާރު ފެއިލް ނުވާ ކަމަށެވެ.

ސިއްޙީ އެހީތެރިން ހޯދުމަށް އަވަށްޓެރި ގައުމުތަކުގެ އެހީއަށް އެދިވަޑައިގެންފައިވާ ކަމަށެވެ. އެގޮތުން ރާއްޖެއަށް ބޭނުންވާ އިންސާނީ ވަސީލަތް ހޯދުމުގެ އެހީތެރިކަން ބަންގްލަދޭޝާއި އިންޑިއާގެ ކިބައިން އެދިފައިވާނެ ކަމަށާއި، އަންނަ މަހުގެ ތެރޭގައި 40 ޑޮކްޓަރުންނާއި 100 ނަރުހުން އެގައުމުތަކުން ރާއްޖޭގެ ސިއްޙީ ޚިދުމަތާ ގުޅޭނެ ކަމަށް ރައީސް ވިދާޅުވިއެވެ.

ރައީސް ވިދާޅުވީ އަވަށްޓެރި ގައުމުތަކުން ވެސް އެ އެހީތެރިކަން ލިބުމުގައި ދަތިވެފައިވަނީ އެ ގައުމުތަކުގައި ވެސް ކޮވިޑްގެ ހާލަތު ގޯސްވެފައިވުމުގެ ސަބަބުން ކަމަށެވެ. ރާއްޖޭގައި ކޮވިޑަށް ފަރުވާދޭނެ ތަންތަނުގެ ދަތިކަމެއް ނެތްކަމަށާ، ދަތިކަން އޮތީ ފަރުވާދޭނެ ޚިދުމަތްތެރިންގެ ޢަދަދު މަދުވުމުގައި ކަމަށް ވެސް ރައީސް ވިދާޅުވިއެވެ.

މީގެއިތުރުން ނަރުސްކަން ކިޔަވާ 144 ދަރިވަރުންގެ ތެރެއިން 14 ދަރިވަރަކު ހުޅުމާލެ މެޑިކަލް ފެސިލިޓީއާ ހޯމަ ދުވަހު ގުޅިފައިވާ ކަމަށާއި އަދި ކުރިއަށް އޮތް ދެ ދުވަހެއްގެ ތެރޭގައި އިތުރު 15 ދަރިވަރަކު ވެސް ގުޅޭނެ ކަމަށް ވެސް ވިދާޅުވިއެވެ.

ހުޅުމާލޭ ފެސިލިޓީގައި ކޮންމެ 10 ބަލިމީހަކަށް މިވަގުތު ފަރުވާދެމުންދަނީ ނަރުހަކާއި، އެހީތެރިއެއް ކަމަށާއި މިއީ މަދު އަދަދެއްކަން ފާހަގަކުރެއްވިއެވެ. އަދި ކުރިއަށް އޮތް ތަނުގައި އިތުރު މީހުން ލިބުމުން މިކަން ހައްލު ވެގެންދާނެކަމަށް ވެސް ވިދާޅުވިއެވެ.

ބަލި މީހުނަށް ދޭ ޚިދުމަތްތައް ރަނގަޅު ކުރުމަށްޓަކައި ޓޫރިޒަމް މިނިސްޓްރީގެ ފަރާތުން 62 މީހަކާއި ބަލި މީހުންގެ އާއިލާތަކަށް ގުޅާނެ އިންތިޒާމު ހަމަޖެއްސުމަށް 31 މީހުންގެ ކޯލް ސެންޓަރެއް ވެސް ގާއިމްކުރެވި މަސައްކަތް ފަށާފައިވާ ކަމަށް ރައީސް ވިދާޅުވިއެވެ. އަދި ޖެންޑަރ މިނިސްޓްރީގެ ފަރާތުން ބަލި މީހުނަށް ނަފުސާނީ އެހީތެރިކަން ފޯރުކޮށްދިނުމަށް 20 މީހުންގެ ޓީމެއް ހަރަކާތްތެރިވަމުން އަންނަ ކަން ފާހަގަކުރެއްވިއެވެ.