ފިޔަވަޅުތަކާއެކު ޖުލައި މަހު އާންމު ހާލަތައް އައުމަށް އުންމީދުތަކެއް
މެއި މަހު ފެށުނުއިރު މާލެ ސަރަހައްދުގައި ޕޮޒިޓިވިޓީ ރޭޓް ހުރި 50 އިންސައްތައިން 45ށް މިހާރު ވަނީ ދަށްކޮށްފައި
ރައީސުލްޖުމްހޫރިއްޔާ އިބްރާހިމް މުހައްމަދު ސޯލިޙް
ކޮވިޑް-19ގައި ރާއްޖެ މިހާރު ކުރިމަތިލާފައިވާ އެންމެ ބިރުވެރި ޙާލަތުން އަރައިގަތުމުގައި މިހާރު އަޅާފައިވާ ފިޔަވަޅުތައް ތަންފީޒުކޮށް ޖުލައި މަހު އަރައިގަނެވޭނެކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު އަންދާޒާކުރައްވައިފިއެވެ.
އަންގާރަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ރައީސް ވިދާޅުވީ، އަމާޒުހިއްޕަވާފައިވަނީ ލޮކްޑައުންއަކަށް ދިއުމަކަށް ނޫންކަމަށެވެ. އަދި ފިޔަވަޅުތައް ހަރުކަށިކޮށް ކޭސްތަކުގެ އަދަދު ބެލެންސްކޮށް މި ދަނޑިވަޅުގައިވެސް އަމާޒުހިއްޕަވާފައިވާަނީ އިޤްތިޞާދު ހިންގަން ކަމުގައި ވިދާޅުވިއެވެ. ރާއްޖެއިން ކޮވިޑްގެ މި ޙާލަތުގައިވެސް އިޤްތިޞާދު ހިންގޭނެކަން މުޅި ދުނިޔެއަށް ދައްކާދީފައިވާކަން ފާހަގަކުރައްވާ ރައީސް ވަނީ، މި ފިޔަވަޅުތަކުން މިއަދުވެސް ފަތުރުވެރިކަން ހުއްޓުމަކަށް ނައިސް ހިނގާކަން ފެންނަކަމަށް ވިދާޅުވެފައެވެ. މެއި މަހު ފެށުނުއިރު މާލެ ސަރަހައްދުގައި ޕޮޒިޓިވިޓީ ރޭޓް 50 އިންސައްތައިގައި ހުރިއިރު، އެޅި ހަރުކަށި ފިޔަވަޅުތަކުން މި ނިސްބަތް 5 އިންސައްތައިން ދަށްކޮށް 45 އިންސައްތައަށް ވަނީ ދަށްކޮށްފައެވެ. އަދި މިހާރު އިތުރަށް ހަރުދަނާކޮށްފައިވާ ފިޔަވަޅުތަކުން މިކަމުގެ ނަތީޖާ އިތުރަށް ފެނިގެންދާނެކަމަށް އުންމީދުކުރައްވާ ރައީސް ޞާލިޙް ވަނީ ޖުލައި މަހު އަރައިގަނެވޭނެކަމަށް އުންމީދުކުރައްވާކަމަށް ވިދާޅުވެފައެވެ.
ނޫސްވެރިންގެ ބައްދަލުވުމުގައި ވާހަކަދައްކަވަމުން ހެލްތް މިނިސްޓަރ އަހުމަދު ނަސީމް ވަނީ ރާއްޖޭގައި ކޮވިޑްގެ ޙާލަތު ގޯސްވެގެން ދިޔަ އިރު، ބައްޔަށް ޓެސްޓްކުރުމުގެ ކަންކަންވެސް ބޮއްސުންލިކަމަށް ވިދާޅުވެފައެވެ. އެގޮތުން މޫސުން ގޯސްވުމާއި، ރާއްޖޭގެ އެކި ކަންކޮޅުތަކުން ގެނައި ސާމްޕަލްތައް އެކި ސަބަބުތަކާއިހުރެ ބެކްލޮގްގައި އިތުރުވިކަމަށް ވިދާޅުވިއެވެ. މިއީ ރާއްޖޭގައި އެއްފަހަރާ ކޭސްތައް ރިކޯޑް މިންވަރަކަށް ކޭސްތައް އިތުރުވި ސަބަބުކަން ފާހަގަކުރައްވާ މިނިސްޓަރ ވަނީ މިހާރު މިކަން ހަމައަކަށް އެޅުވިފައިވާކަމަށް ވިދާޅުވެފައެވެ.
ނޫސްވެރިންގެ ބައްދަލުވުމުގައި ވާހަކަދައްކަވަމުން ޑރ. ނަޒްލާ މުސްތަފާ ރާއްޖޭގެ ޙާލަތު ކޮންޓްްރޯލްކުރުމަށް އެންމެންގެ އެއްބާރުލުމަށް ގޮވާލައްވާފައެވެ. އަދި ބަލީގެ ޙާލަތު ކޮންޓްރޯލް ނުވެއްޖެނަމަ މިހާރު ފެންނަ ވަރަށްވުރެވެސް އިތުރަށް ކޮވިޑްގައި މީހުންގެ މަރު ރިކޯޑް ކުރެވުމުގެ ބިރު އެބައޮތްކަމުގައި ވިދާޅުވިއެވެ. ރާއްޖޭގައި މިހާރު ޙާލަތް އޮތްގޮތުން ފަރުވާދޭނެ ޚިދުމަތްތެރިން އިންތިހާއަށް މަދުވެ ކަމަށާއި، މިކަމަކީވެސް ރާއްޖޭގައި މަރު އިތުރުވާ ސަބަބަކަށްވުން ގާތްވެފައިވާކަމަށް ވިދާޅުވިއެވެ. މި މައްސަލަ ހައްލުކުރުމަށް ވަކި ޤައުމަކަށް ނުބަލާ 100 ނަރުހުންނާއި 100 ޑޮކްޓަރުން ޖުލައި މަހުގެ މެދުތެރޭ ފްރަންޓްލައިނާއި ގުޅޭނެކަމަށް ހެލްތް މިނިސްޓްރީއިން ވަނީ ބުނެފައެވެ. މިއާއެކު ލޯޑްކުޑަވެ ބަލި ކޮންޓްރޯލްކުރުމަށް އައު ބާރެއް ލިބޭނެކަމަށް އެ މިނިސްޓްރީއިން ފާހަގަކުރެއެވެ.
