މަގުމަތީގެ އެކްސިޑެންޓެއްގައި ރައްޔިތުންގެ މަޖިލީހުގެ ކުޑަހުވަދޫ ދާއިރާގެ މެންބަރު އަހްމަދު އާމިރަށް އަނިޔާވެއްޖެއެވެ.
މަޖިލީހުގެ އަމީން އާމް ފާތިމަތު ނިއުޝާ 'ރާއްޖެ އެމްވީ' އަށް ވިދާޅުވީ, އެކްސިޑެންޓެއްގައި ލިބިވަޑައިގެންނެވި ޒަޚަމްތަކަށް މެންބަރު އާމިރު މިހާރު ޓްރީޓޮޕް ހޮސްޕިޓަލުގައި ފަރުވާ ހޯއްދަވަމުން ގެންދަވާ ކަމަށެވެ.
އާމިރުގެ ހާލުކޮޅާއި ބެހޭ ގޮތުން, ނިއުޝާ ވިދާޅުވީ އެކްސިޑެންޓުގައި މޫނަށް ބޮޑެތި ޒަޚަމްތަކެއް ލިބިފައި ވާކަމަށެވެ. އެހެން ނަމަވެސް މިހާރު ހާލުކޮޅު ރަނގަޅު ވަމުން އަންނަ ކަމަށާއި, އޮންނެވީ އޮބްޒަވޭޝަންގައި ކަމަށް ނިއުޝާ ވިދާޅުވިއެވެ.
މި އެކްސިޑެންޓް ހިންގާފައި ވަނީ އަންގާރަ ދުވަހު ހަވީރު ސިނަމާލެ ބްރިޖް ސަރަހައްދުގައެވެ. އެއީ މެންބަރު އާމިރު އެއާޕޯޓަށް ވަޑައިގެން އެނބުރި ހުޅުމާލެ ވަޑައިގަންނަވަނިކޮށް ކަމަށް މައުލޫމާތު ލިބެއެވެ.
މި އެކްސިޑެންޓާއި ގުޅިގެން ފުލުހުންގެ މީޑިއާ އޮފިޝަލް ވިދާޅުވީ, މާލެއިން ހުޅުމާލެއަށް ދާން ބްރިޖް ގައި ދުއްވާފައި ދިޔަ ސައިކަލެއް ފުރޮޅު ފަޅައިގެންގޮސް ކަހާލައިގެން ވެއްޓި ދުއްވަން އިން މީހާއަށް އަނިޔާވެފައި ވާކަމުގެ މައުލޫމާތު ފުލުހުންނަށް ލިބިފައި ވާކަމަށެވެ. މި ކަމުގެ މައުލޫމާތު ފުލުހުންނަށް ލިބިފައި ވަނީ ހަވީރު 5:15 ހާއިރު ކަމަށް ފުލުހުން ބުނެއެވެ.
