ހުޅުމާލެ މެޑިކަލް ފެސިލިޓީން ބޯފެނަކަށް ނުޖެހޭ
އެޗްއެމްއެފް ގައި ތިބޭ ބަލިމީހުންގެ ކެއިން ބުއިމުގެ ޚިދުމަތް ދެނީ ކޭޓަރިންގ އުސޫލުން އަމިއްލަ ފަރާތަކާ ހަވާލުކޮށްގެން
ހުޅުމާލެ މެޑިކަލް ފެސިލިޓީ، ގިނަ ބަޔަކަށް މިފެސިލިޓީގައި ފަރުވާ ދެމުންދޭ
ހުޅުމާލެ މެޑިކަލް ފެސިލިޓީ (އެޗްއެމްއެފް)އިން މިނަރަލް ވޯޓާ ހުސްވެފައިވާ ކަމަށް ބުނެ މީސް މީޑިއާގައި ދައުރުވަމުންދާ ވާހަކަތައް އިންދިިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް)އިން ދޮގުކޮށްފިއެވެ.
އައިޖީއެމް ހޮސްޕިޓަލުން ނެރުނު ބަޔާނުގައި ބުނެފައިވަނީ އެޗްއެމްއެފްއަކީ ކޮވިޑް-19 ގެ ބަލިމީހުންނަށް ފަރުވާ ދިނުމަށް ޚާއްސަކޮށް، ހުޅުމާލޭ ހޮސްޕިޓަލާ ގުޅިގެން ހިންގަމުން އަންނަ ތަނެކެވެ.
ހޮސްޕިޓަލުން ބުނީ އެޗްއެމްއެފް ގައި ތިބޭ ބަލި މީހުންގެ ކެއިން ބުއިމުގެ ޚިދުމަތް ދެނީ ކޭޓަރިންގ އުސޫލުން އަމިއްލަ ފަރާތަކާ ހަވާލުކޮށްގެން ކަމަށާއި، އަދި ކެއުން އޮންނަ ހުރިހައި ވަގުތެއްގައާއި އެނޫން ވަގުތު ތަކުގައިވެސް މިތަނުން ބޯފެން (މިނަރަލް ވޯޓަރ) ލިބޭނެ ކަމަށެވެ. ނަމަވެސް ބައެއް ބަލިމީހުންގެ އާއިލާގެ ފަރާތުން އިތުރަށް ވެސް މިނަރަލް ވޯޓަރ ފޮނުވާ ކަމަށް ހޮސްޕިޓަލުން ބުނެއެވެ.
މީގެ އިތުރުން ހޮސްޕިޓަލުން ބުނީ ހެޕީ މާކެޓް ޓްރޭޑިންގ ކޮމްޕެނީގެ ފަރާތުން އެޗްއެމްއެފް އަށް ހަދިޔާކުރި މިނަރަލް ވޯޓަރ ފެސިލިޓީއިން ބަލައިގަނެފައިވާ ކަމަށެވެ. މި ފެނަކީ ފެސިލިޓީ އިން މިނަރަލް ވޯޓަރ ހުސްވެ، ފެނަށް ޖެހުމުގެ ސަބަބުން ހަދިޔާކުރި އެއްޗެއްކަމަށް ބައެއް ފަރާތްތަކުން ބުނަމުން ދިޔަ ނަމަވެސް މިއީ ހަގީގަތެއް ނޫން ކަމަށެވެ. މި ފެން ފެސިލިޓީގެ ފަރާތުން ބަލައިގަނެފައިވަނީ މިނަރަލް ވޯޓަރ ހުސްވެފައިވާތީ ނޫންކަން ފާހަގަކޮށް ހޮސްޕިޓަލުން ވަނީ މިފަދަ ފެސިލިޓީ އަކުން ބޯފެން ފަދަ އެއްޗެއް ހުސްވިޔަ ނުދޭނެ ކަމުގެ ޔަގީންކަން ރައްޔިތުންނަށް ދީފައެވެ.
އެޗްއެމްއެފްއިން މިނަރަލް ވޯޓާ ހުސްވެފައިވާ ކަމަށް ބުނެ މީސް މީޑިއާގައި ދައުރުވަމުންދާ ވާހަކަތައް ހޮސްޕިޓަލުން ދޮގުކޮށްފައިވާއިރު، މިފެސިލިޓީއާ ގުޅިގެން ގިނަ މައްސަލަތަކެއް ފެންމަތިވެފައިވެއެވެ. އެގޮތުން ސާފުތާހިރުކަން ކުޑަވެފައިވާ މައްސަލަ ވެސް ބައެއް މީހުން ފާހަގަކޮށްފައިވެއެވެ.
