ރަނގަޅު އިރުޝާދާއި ލަފާ ދެއްވި އެއް ބޭފުޅަކީ އަލްއަމީރު މުހައްމަދު ނޫރައްދީން- ރައީސް ނަޝީދު
25 މެއި 2021 | އަންގާރަ 08:45މުހައްމަދު ނޫރައްދީނަކީ ރާއްޖޭގެ ރަސްކަން ކުރެއްވި އައްސުލްތާން ހަސަން ނޫރައްދީނުގެ ދަރިކަލެއް
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
ނިޝާން އިއްޒުއްދީނުގެ އިއްޒަތުގެ ވެރިޔާ އަލްއަމީރު މުހައްމަދު ނޫރައްދީނަކީ އެންމެ ރަނގަޅު އިރުޝާދާއި ލަފާދެއްވި ބޭފުޅެއް ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިހެން ވިިދާޅުވީ ސަރުކާރަށް 53 އަހަރަށްވުރެ ދިގު މުއްދަތެއްގައި ވަރަށް އިޚްލާސްތެރި ޚިދުމަތްތަކެއް ކުރައްވައިފައިވާ ނިޝާން އިއްޒުއްދީނުގެ އިއްޒަތުގެ ވެރިޔާ އަލްއަމީރު މުހައްމަދު ނޫރައްދީން ދެމިއޮތުމުގެ އާލަމަށް ދަތުރުކުރެއްވުމާ ގުޅިގެން މަޖިލީހުގެ ފަރާތުން އެ އާއިލާއަށް ތައުޒިޔާ ވިދާޅުވަމުންނެވެ.
ރައީސް ނަޝީދު ވިދާޅުވީ އަލްއަމީރު މުހައްމަދު ނޫރައްދީނަކީ މީސްތަކުންގެ ލޯތްބާއި އިހުތިރާމް ލިބިވަޑައިގަތް ބޭފުޅެއް ކަމަށެވެ. އަދި ދުވަހަކުވެސް ކޮރަޕްޝަންގެ އިލްޒާމެއް ނުވަތަ އަނިޔާވެރިވެވަޑައިގަތް ކަމުގެ އިލްޒާމެއް އިސްތަށިފުޅުގައި ނޭޅޭ ކަމަށެވެ. މީގެ އިތުރުން އެއީ ކުޅިވަރަށް ލޯބި ކުރެއްވި ބޭފުޅެއް ކަމަށް ވެސް ވިދާޅުވިއެވެ.
އަދި އެއީ ދިވެހި ދައުލަތަށް ގިނަގުނަ ޚިދުމަތްތަކެއް ކޮށްދެއްވާފައިވާ ބެފުޅެއްކަން ފާހަގަ ކުރައްވައި ރައީސް ނަޝީދު ވިދާޅުވީ ހަނދާންވާ ގޮތުގައި ބޮޑުވަޒީރުގެ ނައިބު ކަމާއި އަދި ގިނަ ވުޒާރާތަކެއް ހިންގެވުމާއި ވުޒާރާތަކުގެ ނައިބުކަން ވެސް ކުރައްވާފައިވާ ކަމަށެވެ.
ރައީސް ނަޝީދު ވިދާޅުވީ ބެހެއްޓެވި ދީލަތިކަމާއި ދެއްވި ނަސޭހަތް ހަދާނުން ފިލައިގެން ނުދާނެ ކަމަށެވެ. އަދި މަރްހޫމަށް ސުވަރުގޭގެ މަތިވެރިކަން ލައްވައި އާއިލާއަށް ކެތްތެރިކަމާއި ހިތްވަރު ދެއްވުމަށް ދުޢާ ކުރައްވާ ކަމަށެވެ.
އަލްއަމީރު މުހައްމަދު ނޫރައްދީނަކީ ދޮންބަންޑާރައިންގެ ބުރަކަށިފުޅުން ވާރުތަވެގެން ސީދާ ވަޑައިގަތް ރަސްރަސްކަލުންކުރެ، އެންމެފަހު ރަދުންކަމުގައިވާ އަލްސުލްތާން ހަސަން ނޫރައްދީން (ދެވަނައި) ގެ މަނިއްޕުޅެކެވެ. އަލްމަރްހޫމް އަލްއަމީރު މުހައްމަދު ނޫރައްދީންގެ ބައްޕާފުޅަކީ ހުރާ ދަރިކޮޅު ދެކަފިވެގެން ދިޔައިރު، މާންދޫގެ އެއްގަމުގެ ފަޅިން، ރަސްކަމަށް ވާރުތަވެވަޑައިގަތް އެންމެ ފަހު ރަދުންނެވެ.
ދެވަނަ ބޮޑު ހަނގުރާމަ ފެށުނުއިރު ރާއްޖޭގެ ތަޚުތުގައި އިންނެވި ރަދުންނެވެ. އަދި 20 ވަނަ ގަރުނުގައި ރާއްޖޭގެ އެންމެ މަތީ ވެރިންކުރެ ހަމައެކަނި އިސްތިއުފާ ދެއްވި ވެރިޔާއެވެ. އެއީ 1943 ގައެވެ. މަރުހޫމުގެ ކާފާފުޅަކީ، 1889 ގައި މަޖްބޫރު ހާލަތުގައި، އިނގިރޭސިންގެ ހިމާޔަތުގެ އެގްރީމަންޓްގައި ސޮއި އެޅުއްވި ރަދުންކަމުގައިވާ ކުޑަބަންޑާރައިންނެވެ. މަރުހޫމްގެ މަންމާފުޅަކީ، ދަނޑިކޮށީގެ ކުޑަހުއްތުގެ މުހައްމަދުދީދީގެ ބޮޑުދައިތައެވެ.
