ދުނިޔޭގެ އެވަރެޖް ފިނިހޫނުމިން 1.5 ޑިގްރީއަށްވުރެ މަތިވިޔަ ނުދިނުމަށް ރައީސް ގޮވާލައްވައިފި
24 މެއި 2021 | ހޯމަ 18:02ސިންގަޕޫރާއި ބަންގްލަދޭޝާއި މެލޭޝިއާގެ އިތުރުން ސްރީލަންކާގެ އިސް ވެރިން ބައިވެރިވެ ވަޑައިގެންނެވި
ރައީސް އިބްރާހީމް މުހައްމަދު ޞާލިހް
ދުނިޔޭގެ އެވަރެޖް ފިނިހޫނުމިން 1.5 ޑިގްރީއަށްވުރެ މަތި ނުވާ ވަރަށް ހިފެހެއްޓުމަށް ރައީސުލް ޖުމްހޫރިއްޔާ އިބްރާހިމް މުހައްމަދު ސާލިހް ގޮވާލައްވައިފިއެވެ.
ރައީސް މިކަމަށް ގޮވާލެއްވީ, އޭޝިއާ ރީޖަނަލް ކޮމަންވެލްތު ހެޑްސް އޮފް ގަވަމެންޓް ވައްމޭޒު ބައްދަލުވުމުގައި ވާޗުއަލްކޮށް ބައިވެރިވެ ވަޑައިގެން ދެއްވި ޚިތާބުގައެވެ.
މި ބައްދަލުވުމަކީ މޫސުމީ ބަދަލުތަކާއި ގުޅިގެން ކުދި ގައުމުތަކަށް ދިމާވެފައިވާ މައްސަލަތަކުން އަރައިގަތުމަށް އެހީތެރިވެ ދިނުމުގައި, މޫސުމީ ބަދަލަށް މާލީ އެހީ ދިނުމަށް ވައުދުވި ގައުމުތަކުން ގާއިމުވެ ތިބިތިބުން ކަށަވަރުކުރުމަށް ޕްރިންސް ޗާލްސްގެ އިސްނެންގެވުމަކަށް ބޭއްވި ބައްދަލުވުމެކެވެ.
މި ބައްދަލުވުމުގައި މޫސުމީ ކުއްލި ހާލަތްތަކުން އަރައިގަތުމުގައި ކުދި ގައުމުތަކަށް ކުރެވިދާނެ ކަންކަމާއި ބެހޭގޮތުން ރައީސް ސާލިހް މަޝްވަރާކުރެއްވިއެވެ.
ރައީސްގެ ވާހަކަފުޅުގައި, މޫސުމީ ބަދަލުތަކުގެ ސަބަބުން ކުރާ ނޭދެވޭ އަސަރުތަކުން ސަލާމަތްވުމަށް ރާއްޖެއިން ކަނޑައަޅާފައިވާ ލަނޑުދަނޑިތައް ހާސިލް ކުރެވޭނީ ތިމާވެއްޓާ ރައްޓެހި ގްރީން ޓެކްނޮލޮޖީ އިންވެސްޓްމަންޓްތަކާއި އެކަށީގެންވާ އެއްބާރުލުން ލިބިގެންކަން ފާހަގަކުރެއްވިއެވެ. އަދި މި މަސައްކަތްތައް ކުރުމުގައި މާލީ ގާބިލުކަން ހުރުމުގެ މުހިންމުކަމުގެ މައްޗަށް އަލިއަޅުވާލެއްވިއެވެ. އެއާއެކު, ކޮޕް26 ގައި މިކަމަށް ވަކާލާތު ކޮށްދިނުމަށް ބައްދަލުވުމުގެ ބައިވެރީންގެ ކިބައިން ރައީސް އެދިވަޑައިގެންނެވިއެވެ.
ކޮވިޑް 19 އާލަމީ ވަބާއާ ގުޅިގެން ރާއްޖޭގެ ތަރައްގީގެ މަޝްރޫއުތައް ރާވާފައިވާ ގޮތުގެ މައްޗަށް އަލިއަޅުއްވާލައްވަމުން, ރާއްޖޭގެ އިގްތިސާދާއި ކަނޑާއި ހުރި ގުޅުން ރައީސް ފާހަގަކުރެއްވިއެވެ. ރައީސް ވިދާޅުވީ އެންމެ މުހިންމު ކަމަކީ ރާއްޖެއިން ލިބެންހުރި ވަސީލަތްތައް ރައްކާތެރި ކުރުން ކަމަށާއި ތިމާވެއްޓާއި ރައްޓެހި ގޮތަކަށް އިގްތިސާދު އަލުން ބިނާކުރުން ކަމަށެވެ. އަދި ރާއްޖޭގެ މޫސުމާބެހޭ ޕްލޭންތަކުގެ މައިގަނޑު ދެ ސިޔާސަތަކީ, މޫސުމީ ބަދަލުތަކުގެ ސަބަބުން ލިބޭ ގެއްލުންތަކުން އަރައިގަތުމާއި, މޫސުމީ ބަދަލުތަކަށް ހޭނުން ކަމަށް ވިދާޅުވިއެވެ.
ރައީސް ސާލިހް ވަނީ ވެރިކަމާއި ހަވާލުވެ ވަޑައިގެންނެވި ފަހުން, ތިމާވެއްޓާއި ރައްޓެހި ގޮތަކަށް ރާއްޖޭގެ ތަރައްގީގެ މަޝްރޫއުތައް ބައްޓަން ކުރުމަށް ކުރެއްވި މަސައްކަތްޕުޅުތަކަށް އަލި އަޅުއްވާލައްވާފައެވެ. އެގޮތުން 2030 ވަނަ އަހަރުގެ ނިޔަލަށް ދިވެހިރާއްޖެ ކާބަން އެމިޝަންސް ނެޓް ޒީރޯއަށް ހެދުން ހިމެނޭހެން, ކްލައިމެޓް އިމަރޖަންސީ ގާނޫނެއް ތަސްދީގު ކުރެވިގެން ދިޔަކަން ފާހަގަކުރެއްވިއެވެ. ހަމައެހެންމެ, ބްލޫ ޕްރޮސްޕެރިޓީ ކޯލިޝަނާއެކު އޮތް ގުޅުން ފާހަގަކުރައްވާ, ހުރިހާ އަތޮޅެއްގައި ވެސް ހިމާޔަތް ކުރެވިފައިވާ ސަރަހައްދުތައް ކަނޑައެޅިފައި ވާކަމަށް ވިދާޅުވިއެވެ.
މި ބައްދަލު ވުމުގައި ސިންގަޕޫރާއި, ބަންގްލަދޭޝާއި, މެލޭޝިއާގެ އިތުރުން ސްރީލަންކާގެ އިސް ވެރީން ބައިވެރިވެ ވަޑައިގެންނެވިއެވެ.
މިއީ އިނގިރޭސިވިލާތުގެ ވަލީއަހުދު ޕްރިންސް ޗާލްސް އިސްނަންގަވައިގެން ސިލްސިލާކޮށް ކުރިއަށް ގެންދިޔަ ސަރަހައްދީ ކޮމަން ވެލްތު ގައުމުތަކުގެ އިސް ވެރީންގެ އެންމެ ފަހު ބައްދަލުވުމެވެ. މި ބައްދަލުވުންތަކުގައި މަޝްވަރާ ކުރެވިގެން ދިޔަ މައުޟޫތަކުގެ ތެރޭގައި އިގްތިސާދު އަލުން އާރާސްތު ކުރުމާއި, މޫސުމަށް އަންނަ ބަދަލުތަކާއި, ދެމެހެއްޓެނިވި ގޮތެއްގައި އިންވެސްޓްކުރުން ހިމެނެއެވެ. މި ބައްދަލުވުންތަކުގެ އަމާޒަކީ ކޮޕް26 އަށް ތައްޔާރުވުމެވެ.
