ކުރިއަށް އޮތް ޔޫރޯ ފުޓްބޯޅަ މުބާރާތަށް ސްޕެއިނުން އެކުލަވާލި ސްކޮޑުން ތަޖުރިބާކާރު ޑިފެންޑަރު ސާޖިއޯ ރާމޯސްއަށް ފުރުސަތު ނުދޭން ނިންމައިފިއެވެ.
ޔޫރޯއަށް ސްޕެއިނުން 24 ކުޅުންތެރިންގެ ސްކޮޑެއް އެކުލަވާލިއިރު، އެ ސްކޮޑުގައި އުމުރުން 35 އަހަރުގެ ރާމޯސް ހިމަނާފައިނުވަނީ މި ސީޒަނުގައި އޭނާއަށް ކުރިމަތިވި އަނިޔާގެ މައްސަލަތަކާ ގުޅިގެންނެވެ. އެގޮތުން މި އަހަރު ރެއާލަށް ރާމޯސް ކުޅެދީފައިވަނީ އެންމެ ހަތް މެޗެވެ.
ސްޕެއިނުގެ ސްކޮޑުން ރާމޯސްއަށް ފުރުސަތު ގެއްލުނުއިރު، އޭނާއަކީ ސްޕެއިނުން 2008 އަދި 2012 ވަނަ އަހަރު ޔޫރޯ އާއި، 2010 ވަނަ އަހަރުގެ ފީފާ ވޯލްޑް ކަޕް ކާމިޔާބުކުރިއިރު އެ ޓީމުގައި ހިމެނުނު މުހިންމު ކުޅުންތެރިއެކެވެ. އަދި މި ފަހަކަށް އައިސް ސްޕެއިން ކެޕްޓަން ބޭންޑް އަޅައިގެން ރާމޯސް ގިނަ މެޗުތަކެއް ކުޅެފައިވާއިރު، އޭނާ ވަނީ ގައުމީ ޓީމަށް މިހާތަނަށް 180 މެޗު ކުޅެދީފައެވެ.
ޔޫރޯއަށް އެކުލަވާލި ސްކޮޑުގައި ރާމޯސް ހިމަނާފައިނުވާއިރު، މި ސްކޮޑުގައި ރެއާލް މެޑްރިޑުގެ އެއްވެސް ކުޅުންތެރިއަކުވެސް ނުހިމެނެއެވެ. މިއީ ބޮޑު މުބާރާތަކަށް ރެއާލުގެ ކުޅުންތެރިއަކު ނުލައި ސްޕެއިން ނުކުންނާނެ ފުރަތަމަ ފަހަރެވެ.
ބާސެލޯނާގެ ކުރީގެ ކޯޗު ލުއިސް އެންރީކޭގެ އިރުޝާދުގެ ދަށުން ސްޕެއިނުން ޔޫރޯއާ ކުރިމަތިލާއިރު، ފައިނަލް ސްކޮޑުން އެންރީކޭ ވަނީ މެންޗެސްޓާ ސިޓީގެ ޑިފެންޑަރު އައިމެރިކް ލަޕޯޓަށް ފުރުސަތު ދީފައެވެ. ސްޕެއިނުގެ ސްކޮޑުގައި އުމުރުން 26 އަހަރުގެ ލަޕޯޓް ފުރަތަމަ ފަހަރަށް ހިމެނިއިރު، ދާދި ފަހުން އޭނާ ވަނީ ފްރާންސްގެ ގައުމީ ފުޓްބޯޅަ ޓީމަށް ކުޅުމުގެ ފުރުސަތު ނުލިބުމުން، ސްޕެއިނުގެ ގައުމީ ޓީމަށް ކުޅެން ނިންމާފައެވެ.
އަންނަ ޖޫން މަހުގެ 11 ވަނަ ދުވަހުން ފެށިގެން ޖުލައި މަހުގެ 11 ވަނަ ދުވަހުގެ ނިޔަލަށް ޔޫރޯ ބޭއްވުމަށް ތާވަލުކޮށްފައިވާއިރު، ސްޕެއިން ހިމެނެނީ ގްރޫޕް އީގައެވެ. މި ގްރޫޕުގައި ދެން ހިމެނޭ ގައުމުތަކަކީ ސްވިޑެން، ޕޮލެންޑް އަދި ސްލޮވާކިއާއެވެ.
