އަސްރާ އެދުނަސް މައްސަލައިގެ ތަހުގީގު ކުރިއަށްދާނެ - ފުލުހުން

އީސައާ ދެކޮޅަށް ހުށަހަޅަފައިވާ ގެވެށި އަނިޔާގެ މައްސަލައިގެ ތަހުގީގު ހުއްޓުމެއްނެތި ކުރިއަށްދާނެ ކަމަށް ފުލުހުން ބުނެފިއެވެ.

ފުލުހުން ބުނީ، މައްސަލައަކީ ޖިނާއީ މައްސަލައަކަށްވާތީ އިސަގެ ކުރީގެ އަނބިކަނބަރުން އަސްރާ ނަސީމް، މައްސަލަ ކުރިއަށް ގެންދިޔުމަށް އެދުނު ނަމަވެސް ތަހުގީގު ކުރިއަށްދާނެ ކަމަށެވެ. އީސައާއި ދެކޮޅަށް އޭނާގެ ކުރީގެ އަނބިކަބަލުން އަސްރާ ނަސީމް ފުލުހަށް ހުށަހަޅާފައިވާ މައްސަލަ ކުރިއަށް ނުގެންދިއުމަށް އޭނާ ފުލުހުންގެ ކިބައިން ވަނީ އެދިފައެވެ. އެހެންނަމަވެސް އެދުނީ ކޮންސަބަބަކާހުރެ ކަން އަދި ސާފެއް ނުވެއެވެ.

މެމްބަރު އީސައަށް ތުހުމަތުކުރެވޭ މައްސަލައިގެ ތަހުގީގަށް އޭނާ ހައްޔަރު ކުރުމުގެ އަމުރަކަށް ޕީޖީ އޮފީހުން ކްރިމިނަލް ކޯޓުގައި އެދިފައިވަނީ މިދިޔަ ހަފްތާގެ ބުރާސްފަތި ދުވަހުގެ ހެނދުނުއެވެ. މި މައްސަލައިގައި ކްރިމިނަލް ކޯޓުން ނިންމާފައިވަނީ މެމްބަރު އީސަ ހެއްކަށް ނުފޫޒު ފޯރުވާނެކަމަށް ބެލެވޭނެ ޖާގައެއް ނެތް ކަމަށެވެ. އެހެންކަމުން އޭނާ ހައްޔަރު ކުރުމުގެ އަމުރެއް ނެރެދެވެން ނެތް ކަމަށް ކްރިމިނަލް ކޯޓުން ވަނީ ނިންމާފައެވެ.

ކްރިމިނަލް ކޯޓުގެ މި ނިންމުން އިސްތިއުނާފު ނުކުރުމަށް ޕީޖީ އޮފީހުން ނިންމާފައި ވަނީ, މި މައްސަލައިގެ ތަޙުޤީޤުގެ މައިގަނޑު މަސައްކަތްތައް ނިމި، ހުށަހެޅުމުގެ މަރުޙަލާގައި އޮތުމުން ކަމަށް އެއޮފީހުން ބުނެއެވެ. ޕީޖީ އޮފީހުން ބުނީ, މަސައްލައާއި ގުޅިގެން ތަޙުޤީޤަށް ހެކީގެ ގޮތުގައި ނަގަންޖެހޭ ބަޔާންތައް ނަގައި ނިމިފައިވާތީ، ހެއްކަށް ނުފޫޒު ފޯރުވުމަށް އޮތް ފުރުޞަތުކުޑަ ކަމަށެވެ.

އީސަގެ ގެވެށި އަނިޔާގެ މައްސަލަ ފުލުހުންނަށް ރިޕޯޓުކޮށްފައިވަނީ މި މަހުގެ 18ވަނަ ދުވަހުގެރެއެވެ. އިސައާ ދެކޮޅަށް ގެވެށި އަނިޔާގެ މައްސަލަ ހުށަހެޅުއްވީ އީސަގެ ކުރީގެ އަނބިކަނބަލުން އަސްރާ ނަސީމެވެ. އެ މައްސަލާގައި ފުލުހުންނަށް ބަޔާން ދެއްވުމަށްފަހު އަސްރާގެ ފޭސްބުކް ސްޓޭޓަސްގައި ބުނެފައިވަނީ، އެ ކުރެވުނު ތަޖުރިބާއަކީ އެކަމަކަށް ދުވަހަކު ވެސް އުއްމީދުކޮށްގެން ހުރި ތަޖުރިބާއެއް ނޫން ކަމަށެވެ. އަދި ދަރިފުޅާއި އޭނާއަށް ވެސް މިއީ ވަރަށް ވެސް އުނދަގޫ ވަގުތެއް ކަމަށެވެ.