އިތުރު މީހަކު ނިޔާވެ މިއަދު ނިޔާވި މީހުންގެ އަަދަދު 6ށް
ނިޔާވީ ހުޅުމާލޭ މެޑިކަލް ފެސިލިޓީގައި ފަރުވާދެމުން ދިޔަ މީހެއް
އާރްއާރްޓީ ޓީމް ހަރަކާތްތެރިވަނީ
ކޮވިޑް-19ށް ފަރުވާ ހޯމަދުން ދިޔަ އިތުރު މީހަކު ނިޔާވެއްޖެއެވެ.
މިއީ ހޯމަ ދުވަހު ނިޔާވި 6 ވަނަ މީހާއެވެ. މިއާއެކު ރާއްޖޭގައި ކޮވިޑް ޖެހިގެން ނިޔާވި މީހުންގެ އަދަދު ވަނީ 135ށް އަރާފައެވެ. އެޗްޕީއޭއިން ބުނީ ހޯމަ ދުވަހު 135 ވަނަ މީހަކަށް ނިޔާވީ އުމުރުން 78 އަހަރުގެ ދިވެހި ފިރިހެނެއް ކަމަށާއި، އޭނާ އަށް ފަރުވާާ ދެމުން ދިޔައީ ހުޅުމާލެ މެޑިކަލް ފެސިލިޓީގައި ކަމަށެވެ.
މީގެ އިތުރުން ހޯމަ ދުވަހު ހުޅުމާލެ މެޑިކަލް ފެސިލިޓީގައި ކޮވިޑަށް ފަރުވާ ދެމުންދިޔަ 4 މީހަކާއި އައިޖީއެމްއެޗްގެ އެމަރޖެންސީ ރޫމަށް ރޭ ދަންވަރު ގެންދިޔަ މީހަކު ނިޔާވެފައިވާ ކަމަށް އެޗްޕީއޭއިން ބުނެފައިވެއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނީ ނިޔާވެފައިވަނީ އުމުރުން 81 އަހަރުގެ މީހަކާއި 58 އަހަރުގެ މީހެއްގެ އިތުރުން 77 އަހަރުގެ މީހަކާއި، 93 އަހަރުގެ މީހަކާއި 85 އަހަރުގެ މީހެއް ކަމަށެވެ. މީގެ ތެރެއިން 81 އަހަރުގެ މީހާއަކީ ފިރިހެނެއް ކަމަށާއި، އާދީއްތަ ދުވަހުގެރޭ ވަގުތެއްގައި އައިޖީއެމްއެޗްގެ އެމަރޖެންސީ ރޫމަށް އެމީހާ ގެންދެވުނު ފަހުން ދަންވަރު 2:02 ގައި ނިޔާވެފައިވާ ކަމަށެވެ. މިއީ މިބަލީގައި ރާއްޖެއިން ނިޔާވި 130 ވަނަ މީހާއެވެ.
މީގެ އިތުރުން 58 އަހަރުގެ މީހާއަކީ ވެސް ދިވެހި ފިރިހެނެއް ކަމަށާއި، އޭނާއަށް ފަރުވާ ދެމުން ދިޔައީ ހުޅުމާލެ މެޑިކަލް ފެސިލިޓީގައި ކަމަށް އެޗްޕީއޭއިން ބުނެއެވެ. އަދި މި މީހާ ނިޔާވެފައިވަނީ އާދީއްތަ ދުވަހުގެ ފަތިހު 4:25 ގައެވެ. މިއީ 131 ވަނަ މަރެވެ.
އެޗްޕީއޭއިން ބުނީ ރޭ ފަތިހު 3:18 ގައި ހުޅުމާލެ މެޑިކަލް ފެސިލިޓީގައި ފަރުވާދެމުންދިޔަ 77 އަހަރުގެ ދިވެހި ފިރިހެނެއް ނިޔާވެފައިވާ ކަމަށާއި މިއީ މި ބަލީގައި ނިޔާވި 132 ވަނަ މީހާ ކަމަށެވެ.
މީގެ އިތުރުން ހުޅުމާލެ މެޑިކަލް ފެސިލިޓީގައި ފަރުވާ ދެމުން ދަނިކޮށް ހޯމަ ދުވަހުގެ ހެނދުނު 6:55 ގައި 93 އަހަރުގެ އުމުރުން ދުވަސްވީ މީހެއް ނިޔާވެފައިވާ އިރު، 7:44 ގައި ވެސް 85 އަހަރުގެ އުމުރުން ދުވަސްވީ މީހަކު ވަނީ ނިޔާވެފައެވެ.
މިހާތަނަށް ކޮވިޑްގައި ރާއްޖެއިން 134 މީހުން ނިޔާވެފައިވާ އިރު، ފަހަކަށް އައިސް މި ބަލީގައި ނިޔާވެގެން ދުވާލެއްގެ މައްޗަށް ރިޕޯޓް ކުރެވޭ މީހުންގެ އަދަދު ވަނީ އިތުރުވެފައެވެ. އެގޮތުން މިދިޔަ ހަފްތާގެ ބުދަ ދުވަހަކީ އެންމެ ގިނަ އަދަދަކަށް މީހުން ނިޔާވި ދުވަހެވެ. އެދުވަހު 7 މީހަކު ނިޔާވެފައިވާ އިރު، އާދިއްތަ ދުވަހު އެކަނި ވެސް 6 މީހަކު ނިޔާވެގެން ރިޕޯޓްކޮށްފައިވެއެވެ.
މިދިޔަ އަހަރުގެ ތެރޭގައި ކޮވިޑްގެ 52 މަރު ރިޕޯޓް ކުރި އިރު، މި މަހުގެ ތެރޭގައި އެކަނި ވެސް 61 މީހަކު ވަނީ ނިޔާވެފައެވެ.
