ސްޓޫޑެންޓް ލޯންގެ ވަގުތީ ލިސްޓް އިއުލާންކޮށްފި
24 މެއި 2021 | ހޯމަ 07:02ޝަކުވާ ހުށަހެޅުމުގެ ފުރުސަތު 1 ޖޫޫންގެ ނިޔަލަށް
ޑރ އިބްރާހީމް ހަސަން - މިނިސްޓަރ އޮފް ހަޔަރ އެޑިއުކޭޝަން - ހުޅުވާލި ފުރުސަތަށް ލޯނަށް އެދުނު ދަރިވަރުންގެ އަދަދު މަދު
ސްޓޫޑެންޓް ލޯންގެ ވަގުތީ ލިސްޓް އިއުލާން ކޮށްފިއެވެ.
މިއަހަރު ފެބްރުއަރީ މަހު ހުޅުވާލި ލޯނު ފުރުސަތުގައި ޝަރުތު ހަމަވެ 417 ދަރިވަރުންނަށް ލޯނު ދިނުމަށް ނިންމާ ވަގުތީ ލިސްޓްވަނީ އެކުލަވާލާފައެވެ. ލިސްޓަށް ޝަކުވާ ހުށަހެޅުމަށް 1 ޖޫން ނިޔަލަށް ފުރުސަތު ވަނީ ހުޅުވާލާފައެވެ. އެޝަކުވާތަކަށް ބަލައި ދާއިމީ ލިސްޓް އިއުލާން ކުރައްވާނީ 10 ޖޫންގައި ކަމަށް ހަޔަރ އެޑިއުކޭޝަން މިނިސްޓަރ ޑރ. އިބްރާހީމް ހަސަން ވިދާޅުވިއެވެ.
މިނިސްޓަރ ވިދާޅުވީ، މިހާރު ކިޔަވަމުންދާ ދަރިވަރުންނަށް ހުޅުވާލި ފުރުސަތުގައި އެމްބީބީއެސް އަދި ޕައިލެޓްކަން މިހާރު ކިޔަވަމުންދާ ހުރިހާ ދަރިވަރުންނަށް ލޯނު ހަމަޖެހިފައިވާކަމަށެވެ. އޭގެ ތެރޭގައި ހިމެނެނީ، އެމްބީބީއެސްއަށް ކިޔާވާ 65 ދަރިވަރަކާއި، ފައިލެޓްކަން ކިޔަވާ 16 ދަރިވަރުންނެެވެ. މިހާރު ލޯނު އަނބުރާ ދެއްކުމަށް އޮންނަ މުއްދަތު 18 މަސްދުވަހަށް އިތުރު ކުރެވިފައިވާ ކަމަށާއި، މިއީ ޕެންޑަމިކްގެ ސަބަބުން ގެންނެވި ބަދަލެއް ކަމަށް ވިދާޅުވިއެވެ.
ފުރަތަމަ ޑިގްރީއަށް ހިލޭ ކިޔަވައިދިން ނަމަވެސް އެހެނިހެން ޚަރަދުތައް ފުރިހަމަ ކުރުމަށް ދަތިވާކަމަށް ބުނެ ލިބުނު ޝަކުވާތަކަށް ބިނާކޮށް މިފަހަރު ހުޅުވާލި ފުރުސަތުގައި އެދުނު ދަރިވަރުންގެ ތެރެއިން ޝަރުތު ހަމަވާ ދަރިވަރުންނަށް އެ ފުރުސަތު ފަހިކޮށްދީފައިވާކަމަށް ވިދާޅުވިއެވެ.
ރާއްޖެއަށް އިންސާނީ ވަސީލަތްތައް ބޭނުންވާ ދާއިރާތަކަށް އިސްކަންދީގެން ލޯނަށް ފުރުސަތު ހުޅުވާލާކަން ފާހަގަކުރައްވަމުން މިނިސްޓަރ ވިދާޅުވީ، އެކައުންޓިންގ ދާއިރާއިން މީހުން ބިނާކުރުމަށް ހުޅުވާލި ފުރުސަތުގައި އެކަމަށް އެދި ކުރިމަތިލާފައިވަނީ ނިސްބަތުން މަދު ދަރިވަރުން ކަމަށެވެ. އެގޮތުން އަލަށް ހުޅުވާލި 20 ފުރުސަތަށް 10 ދަރިވަރުން ކުރިމަތިލިއިރު މިހާރު ކިޔަވަމުން އަންނަ ދަރިވަރުންނަށް ހުޅުވާލި 30 ފުރުސަތަށް ކުރިމަތިލީ 3 ދަރިވަރުން ކަމަށެވެ.
މިނިސްޓަރ ވިދާޅުވީ، މިއަހަރުގެ ތެރޭގައި އިތުރު ލޯނުގެ ފުރުސަތަކަށް ހުޅުވާލުމަކީ ވަރަށް ނާދިރު ކަމެއް ކަމަށެވެ.
މިއަހަރު ހުލުވާލީ 770 ޖާގައަށް ނަމަވެސް ކުރި މަތިލީ ދަރިވަރުންގެ އަދަދު މަދުވުމުން ހުރިހާ ޖާގައެއް ފުރިހަމަ ނުކުރެވުނީ ކަން މިނިސްޓަރ ފާހަގަ ކުރެއްވިއެވެ. މިއަހަރުގެ ލޯން ސްކީމަށް ކަނޑައަޅާފައިވަނީ 137 މިލިއަން ރުފިޔާއެވެ.
