އިޓާލިއަން ލީގުގެ ގަދަ ހަތަރެއްގެ ތެރޭގައި ހިމެނި، އަންނަ ސީޒަނުގެ ޔުއެފާ ޗެމްޕިއަންސް ލީގުން ޔުވެންޓަސް އާއި އޭސީ މިލާން ޖާގަ ހޯދައިފިއެވެ.
ގަދަ ހަތަރެއްގެ ޖާގައެއް ޔުވެންޓަސްއަށް ލިބުނީ ލީގުގައި އާދީއްތަ ދުވަހުގެރޭ ބޮލޯނިއާ އަތުން 4-1 ގެ ނަތީޖާއަކުން މޮޅުވެ، މީގެ ކުރިން ހަތަރުވަނައިގައި އޮތް ނާޕޮލީ ވެރޯނާއާ 1-1 ގެ ނަތީޖާއަކުން އެއްވަރުވުމާ ގުޅިގެންނެވެ.
ރަށުން ބޭރުގައި ކުޅުނު މެޗުގައި ޔުވެންޓަސްއިން އެ ޓީމުގެ ޕޯޗުގަލުގެ ތަރި ކްރިސްޓިއާނޯ ރޮނާލްޑޯ ބޭނުންކޮށްފައެއް ނުވެއެވެ. އެކަމަކު މި މެޗުގައި ޔުވެންޓަސްއިން މޮޅު ކުޅުމެއް ދެއްކިއިރު، މެޗު ފަށައިގެން ހަވަނަ މިނެޓުގައި ފެޑެރިކޯ ކިއެސާ ވަނީ އެ ޓީމަށް ލީޑު ނަގައިދީފައެވެ. އަދި މެޗުގެ 29 ވަނަ މިނެޓުގައި ޔުވެންޓަސްއަށް ލިޑު ފުޅާކޮށްދިނީ އަލްވާރޯ މޮރާޓާއެވެ.
އޭގެ ފަހުންވެސް ޔުވެންޓަސްއިން މި މެޗުގައި ގިނަ ހަމަލާތަކެއް އުފެއްދިއިރު، ފުރަތަމަ ހާފުގެ ފަހު މިނެޓުގައި އޭޑްރިއަން ރަބިއޯ ވަނީ އެ ޓީމުގެ ތިންވަނަ ލަނޑު ކާމިޔާބުކޮށްދީފައެވެ. އަދި ޔުވެންޓަސްގެ ހަތަރުވަނަ ލަނޑު ދެވަނަ ހާފު ފަށައިގެން ދެވަނަ މިނެޓުގައި ކާމިޔާބުކޮށްދިނީ މޮރާޓާއެވެ. މި މެޗުގައި ބޮލޯނިއާއިން ކާމިޔާބުކުރި ހަމައެކަނި ލަނޑު މެޗު ނިމެން ފަސް މިނެޓަށް ވެފައި ވަނިކޮށް ކާމިޔާބުކޮށްދިނީ ރިކާޑޯ އޯސޮލީނީއެވެ.
މި މޮޅާއެކު ތާވަލުގެ ހަތަރުވަނައަށް ޔުވެންޓަސް ޖެހިލީ 78 ޕޮއިންޓާއެކުއެވެ. އަދި ތާވަލުގެ ފަސްވަނައަށް ވެއްޓުނު ނާޕޮލީއަށް ލިބިފައިވަނީ 77 ޕޮއިންޓެވެ.
މީގެ އިތުރުން މިލާނުން ތާވަލުގެ ދެވަނަ ޔަގީންކުރީ ލީގުގެ ފަހު މެޗުގައި އެޓަލާންޓާ އަތުން 2-0 ގެ ނަތީޖާއަކުން މޮޅުވެގެންނެވެ. މި މޮޅާއެކު އަންނަ ސީޒަނުގެ ޗެމްޕިއަންސް ލީގުގެ ޖާގައެއް މިލާން ހޯދިއިރު، މިއީ 2013-2014 ވަނަ އަހަރުގެ ސީޒަނަށްފަހު މިލާން ޗެމްޕިއަންސް ލީގުން ޖާގައެއް ހޯދި ފުރަތަމަ ފަހަރެވެ.
އެޓަލާންޓާގެ ދަނޑުގައި ކުޅުނު މެޗުގައި މިލާނުން މޮޅު ކުޅުމެއް ދެއްކިއިރު، ފުރަތަމަ ހާފުގައި އެ ޓީމުން ވަނީ ލީޑު ނަގާފައެވެ. މި ހާފު ނިމެން ދެ މިނެޓަށް ވެފައި ވަނިކޮށް ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ ފްރޭންކް ކެސީއެވެ. އަދި މެޗުގެ އިތުރު ވަގުތުގައި ރެފުރީ މިލާނަށް އިތުރު ޕެނަލްޓީއެއް ދިންއިރު، މި ޕެނަލްޓީވެސް ކެސީ ވަނީ ކާމިޔާބުކޮށްފައެވެ.
މި މޮޅާއެކު ތާވަލުގެ ދެވަނައިގައި މިލާން އޮތީ 79 ޕޮއިންޓާއެކުއެވެ. އަދި ތިންވަނައިގައި އޮތް އެޓަލާންޓާއަށް ވަނީ 78 ޕޮއިންޓް ލިބިފައެވެ. މީގެ އިތުރުން ލީގު ޗެމްޕިއަންކަން ހޯދި އިންޓަ މިލާން އެއްވަނައިގައި އޮތީ 91 ޕޮއިންޓާއެކުއެވެ.
