ކ. މާލެ
|
23 މެއި 2021 | އާދީއްތަ 18:34
ޔުވެންޓަސްއަށް ކުޅެމުން އަންނަ ޕޯޗުގަލުގެ ތަރި ކްރިސްޓިއާނޯ ރޮނާލްޑޯ
ޔުވެންޓަސްއަށް ކުޅެމުން އަންނަ ޕޯޗުގަލުގެ ތަރި ކްރިސްޓިއާނޯ ރޮނާލްޑޯ
ގެޓީ އިމޭޖަސް
ރޮނާލްޑޯގެ ކުރިމަގު
ކޮންމެވެސް ދުވަހަކުން ރޮނާލްޑޯ އެނބުރި އަންނާނެ: ސްޕޯޓިންގެ ރައީސް
 
ރޮނާލްޑޯ އެނބުރި ސްޕޯޓިންއަށް ނުދާނެ ކަމަށް އޭނާގެ އޭޖެންޓް ވަނީ ބުނެފައި
 
ޔުވެންޓެސްއާއެކު ރޮނާލްޑޯ ހަދާފައިވާ އެއްބަސްވުން ހަމަވާނީ 2022 ވަނަ އަހަރު

ކޮންމެވެސް ދުވަހަކުން ޕޯޗުގަލުގެ ތަރި ކްރިސްޓިއާނޯ ރޮނާލްޑޯ އަލުން އަނބުރާ އޭނާގެ ކުރީގެ ކުލަބު ސްޕޯޓިން ލިޒްބަންއަށް އަންނާނެ ކަމަށް އެ ކުލަބުގެ ރައީސް ފްރެޑެރީކޯ ވަރަންޑަސް ވިދާޅުވެއްޖެއެވެ.

ރޮނާލްޑޯ އޭނާގެ ސީނިއާ ކެރިއަރު ފެށީ ސްޕޯޓިންއިންނެވެ. އުމުރުން އެންމެ 12 އަހަރުގައި ސްޕޯޓިންގެ ޒުވާން ޓީމާ ގުޅުނު ރޮނާލްޑޯ ވަނީ އުމުރުން 16 އަހަރުގައި 2002 ވަނަ އަހަރު ސީނިއާ ޓީމަށް ޕްރޮމޯޓްވެފައެވެ. އެކަމަކު އޭގެ އަހަރެއް ފަހުން އޭނާ ވަނީ 12.24 މިލިޔަން ޕައުންޑުގެ ފީއަކަށް މެންޗެސްޓާ ޔުނައިޓެޑަށް ބަދަލުވެފައެވެ.

އޭގެ ފަހުން ޔުނައިޓެޑް ދޫކޮށް ރެއާލް މެޑްރިޑަށް ރޮނާލްޑޯ ބަދަލުވީ 2009 ވަނަ އަހަރު 80 މިލިޔަން ޕައުންޑުގެ ފީއަކަށެވެ. އަދި އެ ޓީމަށް ނުވަ އަހަރު ކުޅެދިނުމަށްފަހު، އުމުރުން މިހާރު 36 އަހަރުގެ ރޮނާލްޑޯ ޔުވެންޓަސްއަށް ބަދަލުވީ 2018 ވަނަ އަހަރުގެ ޖުލައި މަހުގެ ތެރޭގައި 100 މިލިޔަން ޔޫރޯއަށެވެ. އެފަހަރު ރޮނާލްޑޯ ވަނީ ޔުވެންޓަސްއާއެކު ހަތަރު އަހަރުގެ އެއްބަސްވުމެއް ހަދާފައެވެ. އެހެންކަމުން ރޮނާލްޑޯގެ އެއްބަސްވުން ހަމަވާނީ އަންނަ އަހަރުއެވެ.

ދާދި ފަހުން ރޮނާލްޑޯގެ މަންމަ ޑޮލޯރޭސް އަވިއޭރޯ ވަނީ މި ސީޒަން ނިމުމުން ރޮނާލްޑޯ އަލުން އަނބުރާ އޭނާގެ ކުރީގެ ކުލަބު ސްޕޯޓިންއަށް ގެންދަން މަސައްކަތްކުރާނެ ކަމަށް ބުނެފައެވެ. އެކަމަކު ރޮނާލްޑޯގެ އޭޖެންޓް ޖޯޖް މެންޑޭޒް ވަނީ ރޮނާލްޑޯގެ ކެރިއަރު ޕްލޭނުގައި ޕޯޗުގަލް ނުހިމެނޭ ކަމަށް ބުނެފައެވެ.

ނަމަވެސް ދާދި ފަހުން ދިން އިންޓަވިއުއެއްގައި ސްޕޯޓިންގެ ރައީސް ވަރަންޑަސް ވިދާޅުވީ ކޮންމެވެސް ދުވަހަކުން ރޮނާލްޑޯ އަލުން ސްޕޯޓިންއަށް ކުޅޭނެ ކަމުގެ އުއްމީދު އެބައޮތް ކަމަށެވެ. އަދި މި ސީޒަނުގެ ޕޯޗުގީޒް ލީގު ސްޕޯޓިންއިން ކާމިޔާބުކުރުމާއެކު، އެންމެ ފުރަތަމަ މަރުހަބާކީ ރޮނާލްޑޯ ކަމަށާއި، އަދި އޭނާއަކީ ސްޕޯޓިންގެ ވަރަށް ބޮޑު ސަޕޯޓަރެއް ކަމަށްވެސް ވަނީ ވިދާޅުވެފައެވެ.

ރޮނާލްޑޯގެ ޓްރާންސްފާއާ ގުޅޭ ވާހަކަތައް މީޑިއާގައި ގަދަވެފައިވީ ނަމަވެސް، މީގެ ކުރިން ދިން އިންޓަވިއުއެއްގައި ޔުވެންޓަސްގެ ބޯޑް އޮފް ޑިރެކްޓަރުންގެ ވައިސް ޗެއާމަން އަދި ކުރީގެ ކުޅުންތެރިޔާ ޕަވެލް ނެޑްވެޑް ވަނީ އެއްބަސްވުމުގެ މުއްދަތު ހަމަވުމުގެ ކުރިން ރޮނާލްޑޯ އެ ކުލަބު ދޫކޮށް ނުދާނެ ކަމަށް ބުނެފައެވެ.

ޔުވެންޓަސް ދޫކޮށްލަން ރޮނާލްޑޯ އުޅޭ ކަމަށް ރިޕޯޓުތައް ބުނާއިރު، މީގެ ކުރިން ރެއާލާއެކު ޔުއެފާ ޗެމްޕިއަންސް ލީގު ހަތަރު ފަހަރު ރޮނާލްޑޯ ކާމިޔާބުކުރި ނަމަވެސް، އޭނާއަށް ޔުވެންޓަސްއާއެކު އަދި މިހާތަނަށް ޗެމްޕިއަންސް ލީގު ކާމިޔާބުކުރެވިފައެއް ނުވެއެވެ. އަދި ޔުވެންޓަސްއަށް މި ސީޒަނުގެ އިޓާލިއަން ލީގުވެސް ވަނީ ގެއްލިފައެވެ.

އެކަމަކު ޔުވެންޓަސްގައި ރޮނާލްޑޯ މިހާތަނަށް މޮޅު ކުޅުމެއް ދައްކާފައިވާއިރު، އޭނާ ވަނީ އެ ޓީމަށް ކުޅެދިން 133 މެޗުގައި 101 ލަނޑު ޖަހާފައެވެ. މިހާތަނަށް ޔުވެންޓަސްއާއެކު އިޓާލިއަން ލީގާއި، އިޓާލިއަން ކަޕް އަދި އިޓާލިއަން ސުޕަ ކަޕް ދެ ފަހަރު ކާމިޔާބުކޮށްފައިވެއެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: އިމާދު ލަތީފް
0%
0%
0%
0%
0%
0%
ކޮމެންޓް