ކޮވިޑްގައި 124 ވަނަ މީހަކު ނިޔާވެއްޖެ
މިހާތަމަށް މިއަހަރު 51 މަރު
ސަލާމަތީ ބާރުތަކުން ކޮވިޑް-19 އިން ރައްކާތެރިވުމަށް އަޅާފައިވާ ފިޔަވަޅުތައް ތަންފީޒު ކުރުމުގެ މަސައްކަތުގައި
ކޮވިޑް-19ގައި ރާއްޖެއިން 124 ވަނަ މީހާ ނިޔާވެއްޖެއެވެ.
ހުޅުމާލެ ކޮވިޑް ފެސިލިޓީގައި ފަރުވާ ދެމުން އަންނަނިކޮށް ނިޔާވީ އުމުރުން 66 އަހަރުގެ ދިވެހި ފިރިހެނެކެވެ. ކޮވިޑް ބަލީގައި ރާއްޖެއިން ނިޔާވާ މީހުންގެ އަދަދު މިހާރު މިވަނީ އިތުރުވާން ފަށާފައެވެ. ދުވާލަކަށް އެވްރެޖްކޮށް 3 މީހުން ބަލީގައި ނިޔާވެގެން ރިޕޯޓު ކުރެއެވެ. ފާއިތުވި ހަފްތާގެ ތަފާސް ހިސާބުތަކަށް ބަލާއިރު މިމަހުގެ 16 ވަނަ ދުވަހުން ފެށިގެން މިހާތަނަށް މި ބަލީގައި 31 މީހަކު ނިޔާވެފައިވެއެވެ. އެއްމެ ގިނަ މީހުން ނިޔާވެގެން ރިޕޯޓުކޮށްފައިވަނީ މިމަހުގެ 19 ވަަނަ ދުވަހުއެވެ. އެއީ 7 މީހެކެވެ.
މިހިނގާ މެއި މަހުގެ މިހާތަނަށް 51 މީހަކު ނިޔާވިއިރު ހުސްވި 2020 ވަނައަހަރު މިބަލީގައި ނިޔާވީ ޖުމްލަ 51 މީހުންނެވެ. 2021 ވަނަ އަހަރު މިހާތަނަށް 73 މީހުން ނިޔާވެފައިވާކަމަށް ތަފާސް ހިސާބުތަކުން ދައްކައެވެ.
ބަލިޖެހޭ މީހުންގެ އަދަދު އިތުރުވެ، ހޮސްޕިޓަލުގައި ފަރުވާ ދޭ މިހުންގެ ނިސްބަތްވެސް މިވަނީ އިތުރުވާން ފަށާފައެވެ. އަސީޔޫގައި ފަރުވާދޭ މިންވަރު އިތުރުވެފައިވާއިރު، މީގެ 60 އިންސަތަ ހިއްސާ ކުރަނީ ޒުވާނުންކަން އެޗްއީއޯސީސް ފާހަގަކުރެއެވެ. ހޮސްޕިޓަލުގެ އެދުތައް ފުރި، ފަރުވާދޭން ޖެހޭ މީހުން ޕްރައިއޮޓައިޒް ކުރަން ޖެހިދާނެ ކަމުގެ އިންޒާރު ޑޮކްޓަރުންވަނީ ދީފައެވެ.
ބަލިޖެހޭ މީހުންގެ އަދަދުތައް ކުއްލިއަކަށް މައްޗަށްދާން ފެށުމުން މާލެ ސަރަހައްދުގައި މިހާރު ޚާއްސަ ފިޔަވަޅުތަކެއް އަޅާ ކާފިއު މިވަނީ ހިންގަން ފަށާފައެވެ.
