މައުލޫމާތު ބަލި ކުރެވޭނީ މައުލޫމާތުން - ޝަފީޤް
ހަމައެކަނި ޓްވީޓުން ޚަބަރު ހެދުން ހުއްޓާލަން ޖެހޭ
މުހައްމަދު އަބްދުﷲ ޝަފީޤް، ވެލިދޫ ދާއިރާގެ މެމްބަރ - ނޫސްވެރިން ހުރިހާ މައުލޫމާތެއް ހޯދައިގެން ރިޕޯޓް ކުރަން ޖެހޭ
ރާއްޖޭގައި އިންވެސްޓިގޭޓިވް ޖާރނަލިޒަމް އިތުރަށް ޕްރެކްޓިސް ކުރަން ޖެހޭ ކަމަށް ވެލިދޫ ދާއިރާގެ މެމްބަރު މުހައްމަދު އަބްދުއްﷲ ޝަފީގު ވިދާޅުވެއްޖެއެވެ.
ރާއްޖެ ޓީވީގެ ފަލަ ސުރުޚީ ޕްރޮގްރާމުގައި ވާހަކަދައްކަވަމުން ޝަފީގު ވިދާޅުވީ، ރާއްޖޭގައި ނޫސްވެރިކަން ކުރުމަށް ހުޅުވިފައިވާ ފުރަސަތު ފަހިވެފައި ފުޅާ މިންވަރާބަލާއިރު، އިންވެސްޓިގޭޓިވް ޖާރނަލިޒަމް ރާއްޖޭގައި ޕްރެކްޓިސް ކުރަނީ ވަރަށް މަދު ބައެއް ކަމަށެވެ. އެއަށްވުރެ ބޮޑަށް އެކަން ކުރަން ޖެހޭ ކަމަަށް ވިދާޅުވިއެވެ.
ޝަފީގު ވިދާޅުވީ، އިތުރު މައުލޫމާތު ހޯދައިގެން ޚަބަރުހެދުމަށް އިސްކަން ދޭންޖެހޭ ކަމަށެވެ. މީހަކު ޓުވީޓެއް ކުރީމަ އެ ޓްވީޓް އެކަނި ހިމެނުމުގެ ބަދަލުގައި، އެއާ ބެހޭގޮތުން ހޯދެން އޮތް ހުރިހައި ކޮޅެއް ހޯދައިގެން ޚަބަރު ގެންއުމުން އެއަށް އިތުރު ފުރިހަމަ ކަމެއް ލިބޭނެ ކަމަށެވެ. މިހާރު އެމަންޒަރު ނުފެންނަ ކަމަށް ޝަފީގު ވިދާޅުވިއެވެ.
ހަގީގަތާ ޚިލާފު ވާހަކަތައްވެސް ނޫސްތަކުން ފެންނަ ކަމަށާއި، އޭގެ ބަދަލުގައި އިންވެސްޓިގޭޓިވް ޖާރނަލިޒަމް ޕްރެކްޓިސް ކޮށް، ހަގީގަތް ހޯދަން ޖެހޭ ކަމަށް ވިދާޅުވިއެވެ.
ނޫސްވެރިކަމުގެ މިނިވަންކަން ކިތަންމެ ބޮޑަށް ލިބިފައި އޮތްނަމަވެސް ގާނޫނުތަކާ ގަވައިދުތަކަަށް ބޯލަނބަން ޖެހޭ ކަމަށް ޝަފީގު ވިދާޅުވިއެވެ. ގައުމުގެ ސަލާމަތާ އަމަން އަމާންކަން އަދި ރައްޔިތުންގެ ސަލާމަތާ ރައްކާތެރިކަމަށް އިސްކަން ދޭން ޖެހޭ ކަމަށާއި، ހަރުކަށި ފިކުރާ ޓެރަރިޒަމް ޕްރޮމޯޓްވާ ގޮތަށް މަސައްކަތް ކޮށްގެން ނުވާނެ ކަމަށެވެ. ނޫސްތަކުގެ ކޮމެންޓް ސެކްޝަނަށް އަންނަ ކޮމެންޓްތައްވެސް ފިލްޓަރވާން ޖެހޭ ކަމަށް ވިދާޅުވިއެވެ. މައުލޫމާތު ބަލި ކުރެވޭނީ މައުލޫމާތުން ކަމަށާއި، މިހާރު ދިމާވެގެން އުޅޭ މައްސަލައަކީ، ބަޔަކަށް ނުރަނގަޅު މައުލޫމާތުތަކެއް ދިނުން ކަމަށެވެ. އެހެންވީމާ ރަނގަޅު މައުލޫމާތު ފޯރުކޮށްދޭން ޖެހޭ ކަމަށް ވިދާޅުވެ މެމްބަރު މިސާޅު ޖެއްސެވީ ހިމަންދޫ ހާދިސާއަށެވެ.
އިންފޮމޭޝަން ކޮމިޝަނަރގެ މަގާމަށް މީހަކު އައްޔަން ކުރުމަށް މަޖިލީހުގެ ތަޅުމަށް އެއްވެސް ނަމެއް ނުދިޔަ މައްސަލާގައި ވާހަކަ ދައްކަވަމުން ޝަފީގު ވިދާޅުވީ، މިނިވަން މުއައްސަސާތަކަށް އަންނަން ޖެހޭނީ، ވަކި ޕާޓީއަކަށް ނިސްބަތްވާ މީހުން ނޫން ކަމަށެވެ. ގަވައިދު ބުނާގޮތުން ތަޅުމަށް ނަން ފޮނުވުމަށް ކޮމިޓީން މަދުވެގެން 8 ވޯޓު ލިބެންޖެހެއެވެ. އެހެންނަމަވެސް މިފަހަރު ފޮނުވާފައިވާ ނަންތަކަށް ލިބުނީ 7 ވޯޓު ކަަމަށް ވިދާޅުވިއެވެ.
އެހެންވެގެން މަޖިލީހުގެ ތަޅުމަށް އެއްވެސް ނަމެއް ނުދިޔައީ ކަމަށާއި ދެން ކޮމިޓީ ރިޕޯޓް މަޖިލީހަށް އިއްވުމުން އިންފޮމޭޝަން ކޮމިޝަނަރގެ މަގާމަށް އަލުން ކުރިމަތިލުމަށް ހުޅުވާލުމާމެދު ގޮތެއް ނިންމާނީ މަޖިލީހުގެ ރިޔާސަތުން ކަމަށް ވެސް ވިދާޅުވިއެވެ.
