މާލޭ ގެއެއްގެ ފަސްވަނަ ބުރިން މީހަކު ވެއްޓިއްޖެ
ހާދިސާގައި އަނިޔާ ލިބުނު މީހާއަށް މިހާރު ގެންދަނީ އައިޖީއެމްޗްގައި ފަރުވާ ދެމުން
ޕޮލިސް
މާލޭ ގެއެއްގެ ފަސްވަނަ ބުރިން މީހަކު ވެއްޓިއްޖެއެވެ.
އެމީހާ ވެއްޓިފައިވަނީ ކުރީގެ ރައީސް މައުމޫން އަބްދުލްގައްޔޫމް ދިރިއުޅުއްވާ ގެކޮޅާ ޖެހިގެން ހުރި މ. އެންދެރިކުރި ގެއިންނެވެ. އެސަރަހައްދުގައި ފުލުހުން ވަނީ ހަރަކާތްތެރިވެފައެވެ.
މިކަމާ ގުޅޭގޮތުން ފުލުހުން ބުނީ މ.އިތާ ގޯޅީގައި ހުންނަ ގެއަކުން ދިވެހި ފިރިހެނަކު ވެއްޓިފައިވާކަމުގެ މައުލޫމާތު ލިބިފައި ވާކަމަށެވެ. މި ހާދިސާ ހިނގާފައިވާ ކަމުގެ މައުލޫމާތު ލިބިފައި ވަނީ ހުކުރު ދުވަހުގެ ރޭ މެންދަމު 1:00 ހާއިރު ކަމަށް ފުލުހުން ބުނެއެވެ.
ހާދިސާގައި އަނިޔާ ލިބުނު މީހާއަށް މިހާރު ގެންދަނީ އައިޖީއެމްޗްގައި ފަރުވާ ދެމުންނެވެ.
ހުޅުމާލޭގައި ވެސް މިފަދަ ހާދިސާއެއް ބުރާސްފަތި ދުވަހުގެރޭ ހިނގާފައި ވެއެވެ. މި. ހާދިސާގައި އަނިޔާވެފައި ވަނީ 21 އަހަރުގެ ޒުވާނަކަށެވެ. އޭނާއަށް ވެސް އައިޖިއެމްއެޗްގައި ފަރުވާދެމުން ދާއިރު, ހޮސްޕިޓަލަށް ގެންދިޔައިރު ހޭވެރިކަން ވެސް ނެތް ކަމަށް ފުލުހުން ވަނީ ބުނެފައެވެ.
މި ދެ މައްސަލަ ވެސް ފުލުހުން މިހާރު ގެންދަނީ ތަހުގީގު ކުރަމުންނެވެ.
