މާލެ ލޮކްޑައުން ކުރާކަށް އަދިނުނިންމާ
21 މެއި 2021 | ހުކުރު 17:51ހުކުރު ދުވަހު މިހާތަނަށް 4 މަރު
މާލެ ސަރަަހައްދުގައި ހަވީރު 4:00ން ފެށިގެން ފަތިހު 4:00ށް ކާރފިއު ދަނީ ހިންގަމުން
މާލެ ސަރަހައްދު އަދި ލޮކްޑައުން ކުރަން ނިންމާފައި ނުވާކަމަށް ސަރުކާރުގެ ތަރުޖަމާނު ވިދާޅުވެއްޖެއެވެ.
މާލެ ސަރަހައްދު އަންގާރަދުވަހު ލޮކްޑައުން ކުރަނީ ކަމަށް ބައެއް މީޑިއާތަކުގައި ރިޕޯޓުކޮށްފައިވާތީ އެކަމާ ގުޅިގެން ރައީސް އޮފީހުގެ ތަރުޖަމާނު މަބްރޫކް އަޒީޒް ވިދާޅުވީ، މާލެ ސަރަހައްދު ލޮކްޑައުން ކުރުމަށް އަދި ނިންމާފައި ނުވާ ކަމަށެވެ. ސިދާ ލޮކްޑައުން ކުރުމަށް މަޝްވަރާތަކެއް ކުރިއަށް ނުދާ ކަމަށެވެ. އެހެން ނަމަވެސް ކޮންމެ ރެއަކުވެސް ހާލަތަށް އަންނަ ބަދަލުތަކާއެކު އަޅާނެ ފިޔަވަޅުތަކާ ބެހޭ ގޮތުން ފުޅާދާއިރާއެއްގައި މަޝްވަރާތައް ކުރިއަށްދާ ކަމަށެވެ.
ހުކުރު ދުވަހުގެ މިހާތަނަށް 4 މީހަކު ބަލީގައި ދުނިޔެ ދޫކޮށްފައިވާއިރު، ނިޔާވި މީހުންގެ އަދަދު ވަނީ 120ށް އަރާފައެވެ.
ރާއްޖޭގައި މިފަހުން ކޮވިޑްގެ ހާލަތު ވަނީ ވަރަށް ބޮޑަށް ގޯސްވެފައެވެ. އަދި މިއާއެކު ކޮވިޑް ކޮންޓްރޯލްކުރުމަށް އެޗްޕީއޭއިން ވަނީ މާލެ ސަރަހައްދާއި އަތޮޅު ތެރޭގައި ގިނަ ފިޔަވަޅުތަކެއް އަޅާފައެވެ.
ކޮވިޑް ޖެހިގެން ރާއްޖޭގައި މިފަހުން އެންމެ ގިނަ މީހުން އެއްދުވަހާ ނިޔާވެގެން ރިޕޯޓްކޮށްފައިވަނީ ބުދަ ދުވަހުއެވެ. އެދުވަހު އެކަނި 7 މީހުން ވަނީ ނިޔާވެފައެވެ.
ދަރުމަވަންތަ ހޮސްޕިޓަލުގެ އައިސީޔޫގައި މިހާރު ފަރުވާދެމުން އަންނަ 65 ޕަސެންޓް މީހުންނަކީ އުމުރުން 40 އަހަރުން ދަށުގެ މީހުންނެވެ. ކުރިން މި ބަލީގައި ބޮޑުވަރު ވަނީ އުމުރުން ދުވަސްވީ މީހުންނަށް ކަމަށް ވިޔަސް ކޮވިޑްގެ އައު ރާޅާއެކު ހާލަތު މިހާރު ވަނީ ބަދަލުވެފައެވެ.
