އޮސްޓްރިއާގެ ކްލިނިކެއްގައި އުމުރުން ދުވަސްވީ މީހެއްގެ ބުރިކޮށްލަން ޖެހިފައި އޮތް ފައި ނޫން އަނެއް ފައި ބުރިކޮށްލައިފިއެވެ.
މިކަން ހިނގާފައިވަނީ އޮސްޓްރިއާގެ ކުޑަ އަވަށެއް ކަމަށްވާ ފްރެއިސްޓަޑްގައި ހުރި ފްރެއިސްޓަޑް ކްލިނިކްގައެވެ. ފަޔަށް ދިމާވާ އެކި އެކި މައްސަލަތަކުގައި ފައި ބުރި ކޮށްލަން ޖެހުމަކީ ޑޮކްޓަރުންނަށް އާންމު ކަމެއް ނަމަވެސް, މިފަހަރު އެގޮތަށް ދިމާވީ އެރި އޮޅުމެއްގެ ސަބަބުން ކަމަށް އެ ހޮސްޕިޓަލުން ބުނެއެވެ.
އުމުރުން 82 އަހަރުގެ ބަލިމީހާއަށް ޖެހުނު ބައްޔެއްގެ ސަބަބުން ބުރިކޮށްލަން ޖެހުނީ އޭނާގެ ވާތުފައެވެ. އެކަމަކު އޮޕަރޭޝަން ތިއޭޓަރަށް ވެއްދިއިރު ޑޮކްޓަރުން ފާހަގަ ޖަހާފައިވަނީ ކަނާތު ފައިގައި ކަމަށް ކްލިނިކުން ބުނެއެވެ.
ބުރިކޮށްލެވިފައިވަނީ ބަލިމީހާގެ ސަލާމަތުން އޮތް ފައިކަން ކްލިނިކަށް އެނގުނީ އޭގެ ދެ ދުވަސްފަހުން ބޭސްގަނޑު ބަދަލު ކުރި ނަރުހުންނަށް އެކަން ފާހަގަކުރެވުމުންނެވެ.
އެ މައްސަލައިގައި ކްލިނިކުން ވަނީ މާފަށް އެދި ބަޔާނެއް ނެރެފައެވެ. ބަޔާނުގައި ކްލިނިކުން މިކަން ސިފަކޮށްފައި ވަނީ އޮޅިގެން ހެދުނު ގޯހެއްގެ ގޮތުގައެވެ.
މިކަން ހިނގިގޮތުގެ މިނިވަން ތަހުގީގެއް ކުރިއަށް ގެންދިޔުމަށް ކްލިނިކުން ވަނީ ނިންމާފައެވެ.
