މި ދައުރު ކައުންސިލުތަކަށް ސަރުކާރާ ގުޅިގެން މަސައްކަތް ކުރެވޭނެ – ފިރުޝާން
21 މެއި 2021 | ހުކުރު 03:08އައު ކައުންސިލްތަކަށް އެތައް ބާރުތަކެއް ވަނީ ލިބިފައި
ރައްޔިތުންގެ މަޖިލީހުގެ މަޑަވެލި ދާއިރާގެ މެމްބަރު ހުސެއިން ފިރުޝާން
ކައުންސިލްތަކުން މިނިސްޓްރީތަކުގައި ކަންކަމުގައި އެދުމުން ކުރިމަތީ އެކަން ބޭރުކޮށްލި ޒަމާނެއް ދިޔަ ކަމަށާއި، އެކަމަކު މިހާރުގެ ކައުންސިލްތަކަށް ސަރުކާރާ ގުޅިގެން ގިނަ މަސައްކަތްތަކެއް ކުރެވޭނެ ކަމަށް ރައްޔިތުންގެ މަޖިލީހުގެ މަޑަވެލި ދާއިރާގެ މެމްބަރު، ހުސެއިން ފިރުޝާން ވިދާޅުވެއްޖެއެވެ.
ރާއްޖެ ޓީވީގެ ފަލަ ސުރުހީ ޕްރޮގްރާމްގައި ވާހަކަ ދައްކަވަމުން ފިރުޝާން ވިދާޅުވީ އެބޭފުޅާ ކައުންސިލްގައި މަސައްކަތް ކުރެއްވިއިރު، ކައުންސިލްގައި މަސައްކަތް ކުރަން ޖެހުނީ ވަރަށް ހަނި ގޮތަކަށް ކަމަށާއި، ކައުންސިލްތަކުން މިނިސްޓްރީތަކުގައި ކަންކަމުގައި އެދުމުން އެކަން ކުރިމަތީގައި ބޭރުކޮށްލި ޒަމާނެއްވެސް ދިޔަ ކަމަށެވެ. އެހެން ނަމަވެސް އަލަށް އިންތިޚާބުވި ކައުންސިލްތަކަށް ލާމަރުކަޒީ ގާނޫނުގެ ދަށުން ގިނަ ބާރުތަކެއް ލިބިފައިވާ ކަމަށާއި، މިހާރު ކައުންސިލުތަކަށް ސަރުކާރާ ގުޅިގެން ގިނަ މަސައްކަތްތަކެއް ކުރެވޭނެ ކަމަށެވެ.
ފިރުޝާން ވިދާޅުވީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވަނީ ކައުންސިލްތަކާ ގުޅިގެން ސަރުކާރުން ކަންކަން ކުރަން ތައްޔާރަށް އޮތް ކަމަށް ވިދާޅުވެފައި ކަމަށާއި، އެހެން ކަމުން މިއީ ކައުންސިލްތަކުން ސަރުކާރާ ގުޅިގެން މަސައްކަތް ކުރަންވީ ދަނޑިވަޅު ކަމަށެވެ.
އަލަށް އިންތިޚާބުވި ކައުންސިލްތަކުގެ އަމާޒެއް އޮންނާނެ ކަމަށާއި، އެކައުންސިލްތަކުން ކުރަން ބޭނުންވާ ކަންކަން މައި ސަރުކާރުގެ އުސޫލާ އެއްގޮތަށް ކުރުން އެއީ ރައްޔިތުންނަށް އެންމެ ފައިދާވާނެ ގޮތް ކަމަށް ފިރުޝާން ވިދާޅުވިއެވެ.
ފިރުޝާން އިތުރަށް ވިދާޅުވީ ކައުންސިލްތަކުން ސަރުކާރުން ކުރަން ނިންމާފައިވާ ކަންކަން ހުއްޓުވުމަށް މަސައްކަތް ކުރުމުން ރައްޔިތުންނަށް ގެއްލުން ވާނެ ކަމަށާއި، އޭގެ ބަދަލުގައި ކޮންމެ ކައުންސިލަކުން ވެސް ތަރައްގީގެ ޕްލޭނެއް އެކުލަވާލަން ޖެހޭ ކަމަށާއި، އެކަމުގައި ރައްޔިތުންގެ ހިޔާލާއި މަޝްވަރާ ހޯދަން ޖެހޭ ކަމަށެވެ.
އަލަށް އިންތިޚާބުވި ކައުންސިލްތަކުގެ ތެރެއިން މިހާތަނަށް އެންމެ ގިނަ ކަންކަން ނިންމާފައިވަނީ މާލޭ ސިޓީ ކައުންސިލުންނެވެ. އެހެން ނަމަވެސް މާލޭ ސިޓީ ކައުންސިލުން މިހާތަނަށް ނިންމި ނިންމުންތަކުގެ ތެރޭގައި ސަރުކާރުން ހިންގަން ފަށާފައިވާ މަޝްރޫއުތަކުގެ ބަދަލުގައި އެހެން މަޝްރޫއުތަކެއް ހިންގުމަށް ވަނީ ނިންމާފައެވެ. އެގޮތުން ގުޅީ ފަޅު ޕޯޓު އެޅުމުގެ ބަދަލުގައި މާލޭ ސިޓީ ރައްޔިތުންނަށް ގުޅީ ފަޅުން ގޯތި ދޫކުރުމަށް ވަނީ ނިންމާފައެވެ.
