ތައްޔާރުވީ ދަރިފުޅު ނިންދަވަން, ނިދީ މުޅި އުމުރަށް

ކުރިމަތިން ފެންނަމުންދަނީ ސުންނާފަތި ވެފައިވާ އިމާރާތްތަކެވެ. ދުރާއި ގާތުން އިވެމުން ދަނީ ބިރުވެރި ހަޅޭކާއި ރުއިމުގެ އަޑެވެ. ގައިގައި އަޅަމުން ދަނީ ރަހުމެއް ނެތް އަނިޔާތަކުގެ ގަދަ ވޭނެވެ. ލޮލުން ފައިބަމުން ދަނީ ހިފެހެއްޓުމެއް ނެތް ހިތި ކަރުނައެވެ. ބަނޑުގައި ވަނީ ދުނިޔެއަށް ނޭވާލެވޭނެ ކަމުގެ އުންމީދެއް ނެތް ދަރިފުޅެވެ. އުރުގައި އޮތީ ހަމަލާތަކަށް ސިހިސިހި އޮތް ތުއްތު ދަރިފުޅެވެ. މިއީ މިއަދު ފަލަސްތީނުގެ މައިންގެ ހާލެވެ.

ފަލަސްތީނުގެ ރައްޔިތުން މިއަދު ކުރަމުންދަނީ ވޭނީ އިހުސާސްތަކެކެވެ. މި އަސަރުގެ ހިތި ރަހަ އެންމެ ބޮޑަށް ތަޖުރިބާ ކުރަން ޖެހިފައި ވާ ބަޔަކީ މައިންނެވެ. އެހެނީ ދަރިއަކަށް ކުޑަ ނަމަވެސް އަނިޔާއެއް ލިބުމަކީ މަޔަކަށް ކެތްވާ ވަރުގެ ކަމެއް ނޫނެވެ. އެކަމަކު ފަލަސްތީނުގެ މައިންނަށް ޖެހިފައި ވަނީ އެ ހިތްދަތިކަން މެދުކެނޑުމެއްނެތި ތަހައްމަލް ކުރާށެވެ. ނުވަމަހާއި ނުވަދުވަހު ހަށިގަނޑުގެ ހިމާޔަތުގައި ގެންގުޅުނު ދަރިން 'ކަތިލަނީ' ލޯ ކުރިމަތީގައެވެ. ލެއިން ކާންދީގެން ބޮޑުކުރި ދަރިފުޅު ގެއިން ނިކުތުމަށްފަހު ދެން ފެންނަނީ ފުރާނަ ނެތް މަސްގަނޑެވެ. ރެއާ ދުވާލު މި ފަދަ އެތަކެއް ހާދިސާއެއް ފަލަސްތީނުގެ ގާޒާގައި ދަނީ ތަކުރާރު ވަމުންނެވެ.

ފަލަސްތީނުގައި ހިނގަމުންދާ ހާދިސާތަކުގެ ތެރެއިން ހިތުގެ ފުންމިނަށް އަސަރު ކުރުވި އެއް ހާދިސާއަކީ އުމުރުން އެންމެ 11 އަހަރުގެ ހަމްޒާ ނަސީރު ޝަހީދުވި ހާދިސާއެވެ. މީސްމީޑިއާގައި ދައުރުވި ފަލަސްތީނުގެ ކުޑަކުދިންގެ ގަބުރުތަކުގެ ފޮޓޯ ތަކުގެ ތެރެއިން ގިނަބައެއްގެ ލޮލުގައި އަޅައިގަތީ ހަމްޒާގެ ފޮޓޯއެވެ. ޚާއްސަ ސަބަބަކަށްޓަކައެވެ. ޝަހީދުވެފައި އޮތްއިރު ހަމްޒާ އޮތީ ރީތި ހިނިތުންވުމެއްގައެވެ. އެކަމަކު ހަމްޒާ ވަކިވެ ދިޔުމުގެ ހާދިސާއިން އޭނާގެ މަންމަ އަށް ލިބުނީ ކެތްކުރަންދަތި ހިތާމައެކެވެ.

ހަމްޒާ ވަކިވެ ދިޔައީ އޭނާގެ ބޭބެއާއި ބައްޕަ ޝަހީދުވި ހަފުތާގެތެރޭގައެވެ. ރަމަޟާން މަހުގެ ފަހު ރޯދަ ދުވަހު ހަމްޒާ ގެއިން ނިކުތީ ރޯދަވީއްލާނެ ކާއެއްޗެއް ތައްޔާރު ކުރުމަށް ތަރުކާރީ ގަންނަން މާރުކޭޓަށެވެ. އޭނަގެ ލޯފަން މަންމައަށް ނޭނގި މަންމަ އުފާ ކޮށްލުމުގެ މަގުސަދުގައެވެ. އެކަމަކު އެނބުރި ގެއަށް އައުމުގެ ފުރުސަތެއް ހަމްޒާއަކަށް ނުލިބުނެވެ. ގެއަށް ވައްދަން ޖެހުނީ މަންމައަށް އެހީވާން ދުނިޔޭގައި ހުރި ހަމައެކަނި ދަރިފުޅުގެ ފުރާނަނެތް މަސްގަނޑެވެ.

ދެން އޮތީވެސް ޔަހޫދީ އަނިޔާވެރީންގެ ޝިކާރައަކަށްވި މައެއްގެ ވާހަކައެވެ. ސްކޫލެއްގައި އަރަބި ކިޔަވައިދެމުން ދިޔަ ހިތްހެޔޮ މުދައްރިސެކެވެ. ނަމަކީ ޚުލޫދް އަލްޒަމީލީ އެވެ. ދަންނަ އެންމެން ވެސް ޚުލޫދު ސިފަކޮށްފައި ވަނީ އަބަދު ވެސް ހިނިތުންވެފައި ހުންނަ ލޯބި މީހެއްގެ ގޮތުގައެވެ.

ބަލިވެ އިނދެ ބަނޑަށް ފަސް މަސްފުރިފައިވާ ޚުލޫދު ތައްޔާރުވަމުން ދިޔައީ އޭނާގެ ދެއަހަރުގެ ދަރިފުޅު ހޫރް ނިންދެވުމަށެވެ. ދަރިފުޅު ނިންދަވަން ނާނާ ކިޔައިދޭން ފެށުމުގެ ހިނދުކޮޅެއް ކުރިން އިޒްރޭލުގެ ޔަހޫދީންގެ ހަމަލާ ޚުލޫދުގެ ގެއަށް އަމާޒުވިއެވެ. އެއްވެސް އިންޒާރެއް ނެތިއެވެ. ޚުލޫދު އެރޭ އޮށޯވެލީ ދަރިފުޅު ނިންދަވާށެވެ. އެހެނަސް ދެއަހަރުގެ ދަރިފުޅާއި, ބަނޑުގައި އޮތް ދަރިފުޅާއެކު އެރޭ ޚުލޫދު ނިދީ ތާއަބަށެވެ.

ޔަހޫދީންގެ އަނިޔާތަކުން ބަނަވެފައިވާ ފަލަސްތީނުގެ ބިމުން ފެންނަނީ ހަމައެކަނި އިންތިހާ ދަރަޖައިގެ ހިތްދަތިކަމެއް ނޫނެވެ. ހިއްވަރުގަދަ މައިންގެ ފުރިހަމަ އީމާނާއި ކެތްތެރިކަމެވެ. އެކަން އެންމެ ރަނގަޅަށް ފެނިގެން ދިޔައީ ޔަހޫދީންގެ އުދުވާންތަކުގައި އެކިފަހަރުމަތިން ޝަހީދުވި ތިން ފިރިހެން ދަރީންގެ މައެއްގެ ފުށުންނެވެ. ލޯބި ލޯބިން ދަރިފުޅުގެ ފުރާނަނެތް މަސްގަނޑުގައި ފަހުފަހަރު ބޮސްދިނުމަށްފަހު ފަލަސްތީނުގެ އެ މަންމަ ވާހަކަ ދެއްކީ އެންމެ ކަރުނަ ތިއްކެއް އޮހޮރުވުމަކާ ނުލައެވެ.

ޝަހީދުވެފައިވާ ތިން ދަރީންގެ މަންމަ ބުނަމުން ދިޔައީ الله އަށް ޝުކުރުކުރާ ކަމުގައެވެ. މިއީ الله ގެ އިމްތިހާނެއް ކަމަށާއި اللهގެ އިރާދަފުޅުކަމަށް އޭނާ ބުނަމުންދިޔައެވެ. ފަޚުރުވެރިކަމާއެކު އޭނާ ބުނަމުން ދިޔައީ ކޮންމެ މަޔަކުވެސް ދަރިން ތަރުބިއްޔަތު ކުރަން ޖެހޭނި އިސްލާމީ އަގީދާގެ މަތީގައި ކަމުގައެވެ. އެ މަންމަ އެންމެ ފަހުން ބުނެލީ "އަލްޙަމްދުލިالله. އަހަރެންގެ ތިން ދަރީންނަށް ވެސް ސުވަރުގޭގެ މަތުވެރި ނިއުމަތް ލިބޭނެ. އިންޝާ الله"  މިފަދައިންނެވެ.

މިއީ ފަލަސްތީނުގެ މައިންގެ ވޭނާއި ކެކުޅުމުގެ މަދު މިންވަރެކެވެ. ޔަހުދީންގެ އަނިޔާވެރިކަމުގެ ހިޔަނީގައި އެމައިން އަބަދުމެ ތިބެނީ ސިހިސިހިއެވެ. ފުރާނަ އަތްމައްޗަށް ލައިގެން ކޮޅުކޮޅު މައްޗަށް ދުވަމުން ދަނީ މައުސޫމް ދަރީންގެ ހައްގުގައެވެ. ދީނާއި ގައުމައްޓަކައި ކުރަމުންދާ ޖިހާދަށް ނަސްރު ދެއްވާނެ ދުވަހެއްގެ އިންތިޒާރުގައެވެ.