ކޮވިޑް-19ޖެހި ނޭޕާލް މީހަކު ނިޔާވެ، ޖުމުލަ 113ށް
ނިޔާވެފައިވަނީ އުމުރުން 39 އަހަރުގެ ނޭޕާލް ފިރިހެނެއް
ތިނަދޫ އިން ޕްޒިޓިވްވި މީހާ ގއ. ވިލިގިނލި ފެސިލިޓީއަށް ގެންދިއުން
ރާއްޖެއިން ކޮވިޑް-19 ޖެހިގެން ނޭޕާލް މީހަކު ނިޔާވެއްޖެއެވެ.
ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ބުނީ، ނިޔާވެފައިވަނީ އުމުރުން 39 އަހަރުގެ ނޭޕާލް ފިރިހެނެއް ކަމަށެވެ. އޭނާ ލ. ކޮވިޑް ފެސިލިޓީގައި ފަރުވާދެމުންދަނިކޮށް ނިޔާވެފައިވަނީ ރޭ މެންދަމު 02:00 ހާއިރު ކަމަށް އެޗްޕީއޭއިން މައުލޫމާތު ދެއެވެ.
މިއީ ރާއްޖެއިން ކޮވިޑް ޖެހިގެން ނިޔާވި 113 ވަނަ މީހާއެވެ. ކޮވިޑްގެ ހަތަރު ވަނަ ރާޅާއެކު މިބަލީގެ ނުރައްކާ އިތުރުވެ މިބަލީގައި ނިޔާވާ މީހުންގެ އަދަދު ވަނީ ވަރަށް ބޮޑަށް އިތުރުވެފައެވެ. އެގޮތުން އަންގާރަ ދުވަހު އެކަނިވެސް 7 މީހުން ވަނީ ނިޔާވެފައެވެ.
މި ބަލީގައި އާންމުގޮތެއްގައި ނިޔާވަނީ އައިސީޔޫގައި ފަރުވާދޭ މީހުންނެވެ. އެ މީހުންގެ ހާލަތާ ގުޅޭގޮތުން ވާހަކަދައްކަވަމުން އައިޖީއެމްއެޗްގެ ޑރ. މުހައްމަދު އިސްމާއިލް ވަނީ ކުރިއާ ޚިލާފަށް ކޮވިޑަށް ޕޮޒިޓިވްވާ ޒުވާނުންގެ ހާލަތު މިހާރު ވަރަށް ބޮޑަށް ސީރިއަސްވަމުން ދާކަމަށް ވިދާޅުވެފައެވެ. ދަރުމަވަންތަ ހޮސްޕިޓަލުގެ އައިސީޔޫގައި މިހާރު ފަރުވާދެމުން އަންނަ 65 ޕަސެންޓް މީހުންނަކީ އުމުރުން 40 އަހަރުން ދަށުގެ މީހުންނެވެ. ކުރިން މި ބަލީގައި ބޮޑުވަރު ވަނީ އުމުރުން ދުވަސްވީ މީހުންނަށް ކަމަށް ވިޔަސް ކޮވިޑްގެ އައު ރާޅާއެކު ހާލަތު މިހާރު ވަނީ ބަދަލުވެފައެވެ. ކޮވިޑް ޖެހޭ ކުޑަކުދިންގެ އަދަދު ވެސް ވަނީ އިތުރެވެ. އެންމެ ފަހުގެ ތަފާސް ހިސާބުތަކަށް ބަލާއިރު އުމުރުން 18 އަހަރުން ދަށުގެ 211 ކުއްޖަކަށް މި ބަލިޖެހިގެން އަންނަނީ ފަރުވާ ހޯދަމުންނެވެ. އައިސީޔޫގައި ފަރުވާ ހޯދާ ގިނަ މީހުންނަކީ ވެކްސިން ވެސް ޖަހާފައިނުވާ މީހުންކަން ވެސް ޑރ. މުހައްމަދު އިސްމާއިލް ފާހަގަކުރެއްވިއެވެ.
