ކައުންޓަރ ޓެރަރިޒަމްގެ އޮޕަރޭޝަނެއްގައި ދަރަވަންދޫން މީހަކު ހައްޔަރުކޮށްފި
އޮޕަރޭޝަން ނުހުއްޓައި ކުރިއަށް ގެންދާކަމުގެ މައުލޫމާތު ވަނީ ލިބިފައި
ބ.ދަރަވަންދޫ - ފުލުހުން އަންނަނީ ދަރަވަންދޫގައި ޚާއްސަ އޮޕަރޭޝަނެއް ހިންގަމުން
ބ. ދަރަވަންދޫގައި ފުލުހުންގެ ޚާއްސަ އޮޕަރޭޝަނެއް ކުރިއަށް ގެންދާ ކަމަށް މޯލްޑިވްސް ޕޮލިސް ސާވިސްއިން ބުނެފިއެވެ.
މޯލްޑިވްސް ޕޮލިސް ސާވިސްއިން ބުނީ ދަރަވަންދޫގައި ފުލުހުންގެ އޮޕަރޭޝަނެއް ކުރިއަށް ގެންދާ ކަމަށާއި މިހާތަނަށް އެކަކު ހައްޔަރު ކޮށްފައިވާ ކަމަށެވެ. ހައްޔަރު ކޮށްފައިވަނީ ދިވެހި ފިރިހެނެއް ކަމަށް ވެސް ބުނެއެވެ.
ރާއްޖެ.އެމްވީއަށް މައުލޫމާތު ލިބިފައިވާ ގޮތުން ދަރަވަންދޫގައި ފުލުހުން ކުރިއަށް ގެންދަނީ ކައުންޓަރ ޓެރަރިޒަމް އޮޕަރޭޝަނެކެވެ.
މީގެ ކުރިން އަންގާރަ ދުވަހު ފުލުހުން ވަނީ މާލޭގައި ވެސް އެފަދަ އޮޕަރޭޝަނެއް ކުރިއަށް ގެންގޮސްފައެވެ. އެ އޮޕަރޭޝަނުގައި ހަރުކަށި ފިކުރުގެ ބޮޑެއް ވަނީ ހައްޔަރު ކޮށްފައެވެ.
ހަރުކަށި ފިކުރުގެ މީހުން ހައްޔަރު ކުރުމަށް ޚާއްސަ އޮޕަރޭޝަންތަކެއް ފުލުހުން ފަށާފައި މިވަނީ ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް މެއި 6 ވަނަ ދުވަހުގެރޭ ދިން ނިރުބަވެރި ހަމަލާއާ ގުޅިގެންނެވެ. ރާއްޖޭގެ އެކި ސަރަހައްދުގައި ސިފައިންވެސް ވަނީ ސަލާމަތީ ކަންކަން ވަރުގަދަކޮށް އޮޕަރޭޝަންތަކެއް ފަށާފައެވެ.
