ކުރީގެ ރައީސް، ރައްޔިތުން މަޖިލީހުގެ ރައީސް މުހައްމަދު ނަޝީދަށް އަމާޒުކޮށް ދިން ޓެރަރިސްޓް ހަމަލާއާ ގުޅިގެން ކުރިއަށް ގެންދާ ތަހުގީގަށް އެހީތެރިކަން ފޯރުކޮށްދިނުމަށް ޔޫއޭއިން ހުށަހަޅައިފިއެވެ.
ރައީސް ނަޝީދު ކުރެއްވި ޓްވީޓެއްގައި ވިދާޅުވީ ޔޫއޭއީގެ ގައުމީ ޝޫރާ މަޖިލީހުގެ ރައީސް ސަގުރް ގުބާޝް ވަނީ އެމަނިކުފާނުގެ ހާލު ބައްލަވާލައްވައި ހަމަލާއާ ގުޅިގެން އެހީތެރިކަން ފޯރުދިނުމަށް ހުށަހަޅުއްވާފައި ކަމަށެވެ. އަދި މިހުށަހެޅުއްވުމަށް ރައީސް ނަޝީދު ވަނީ މަރުހަބާ ވިދާޅުވެފައެވެ.
މިތަހުގީގަށް އެހީތެރިކަން ފޯރުކޮށްދިނުމަށް ޔޫއޭއިން ހުށަހަޅާފައިވާއިރު، ދިވެހި ފުލުހުންނަށް އެހީވުމަށް އޮސްޓްރޭލިއާގެ މަރުކަޒީ ފުލުހުންގެ ޓީމެއް މިމަހުގެ 8 ވަނަ ދުވަހު ރާއްޖެ ވަނީ އައިސްފައެވެ.
މެއި މަހުގެ 6 ވަނަ ދުވަހު ރައީސް ނަޝީދަށް އަމާޒުކޮށް ދިން ޓެރަރިސްޓް ހަމަލާގައި ލިބިވަޑައިގެންނެވި ޒަޚަމްތަކަށް ޖަރުމަނުވިލާތުގައި ފަރުވާ ހޯއްދަވަމުން ގެންދަވާއިރު، އެމަނިކުފާނުގެ ހާލުކޮޅާއި މެދު ގިނަ ރައްޔިތުން ތިބީ ކަންބޮޑުވެފައެވެ. މި ހަމާލާއަކީ މުޅި ގައުމަށް ދިން ހަމަލާއެއްގެ ގޮތުގައި ގިނަ ބަޔަކު ސިފަކުރަމުން ދެއެވެ.
ރައީސް ނަޝީދު އަވަހާރަކޮށްލަން އައިއީޑީއެއް ގޮއްވާލި ހަމަލާއަށްފަހު މިހާތަނަށް ތިން މީހަކު ހައްޔަރުކޮށް، އެ މީހުންގެ ބަންދަށް 15 ދުވަސް ޖަހާފައިވެއެވެ. މި ތިން މީހުން ވެސް މިނިވަން ތަހުގީގަކަށް ފަހު އިންސާފުގެ ކުރިމަށްޗަށް ގެނެވޭނެ ކަމަށް ރައީސް ސާލިހު ވަނީ ވިދާޅުވެފައެވެ. އަދި ހަމަލާގެ ފަހަތުގައި ތިބި އެހެން މީހުން ވެސް ހޯއްދަވާނެ ކަމަށް އެމަނިކުފާނު ވިދާޅުވިއެވެ.
