މަތީ ތައުލީމު ހާސިލްކުރާ ދަރިވަރުންނާއި މާސީ ގުޅިގެން ފަލަސްތީނު ރައްޔިތުންނަށް އެހީވުމަށް ހަރަކާތްތަކެއް ބާއްވަނީ

ދިވެހިރާއްޖޭގެ ގައުމީ ޔުނިވަރސިޓީގެ ދަރިވަރުންގެ ޔޫނިއަން (އެމްއެންޔޫއެސްޔޫ) އަދި މާސީ އިސްވެއޮވެ، އެހެން ކޮލެޖު / ޔުނިވަރސިޓީ ތަކާއިއެކު ފަލަސްތީނު ރައްޔިތުންނަށް އެހީވުމަށް ފަންޑް ރައިސިންގ ހަރަކާތެއް ބޭއްވުމެއް ނިންމައިފިއެވެ.

ރާއްޖެ އެމްވީއަށް ދިން އިންޓަރވުއުގައި މި ހަރަކާތުގައި އިސްކޮށް ހަރަކާތްތެރިވާ އެމްއެންޔޫއެސްޔޫގެ ރައީސް އަބްދުﷲ ޝަހުނީޒް ވިދާޅުވީ މި ހަރަކާތަކީ ފަލަސްތީނުގެ މުސްލިމުންނާއި ދެކޮޅަށް އިސްރާއީލުގެ ޔަހޫދީން ހިންގަމުން އަންނަ ލާއިންސާނީ އަމަލުތަކާއި ގުޅިގެން މުސްލިމު އަޚުންނާއި އުޚުތުންތަކެއް ހާލުގައި ޖެހިފައިވުމުން ފަލަސްތީނުގެ މުސްލިމުންނަށް އެހީވުމަށް މަތީ ތައުލީމު ހާސިލުކުރާ ދަރިވަރުން އިސްކޮށް ތިބެ، މާސީ ޖަމާއަތާއި ގުޅިގެން ހިންގޭ ފަންޑްރައިސިންގ ހަރަކާތެއް ކަމަށެވެ. އަދި މިހަރަކާތުގެ ދަށުން ޓީޝާޓް ވިއްކުމާއި، މާސްކު ވިއްކުމުގެ އިތުރުން އެޗްޕީއޭގެ ހުއްދަ ލިބޭ މިންވަރަކުން މިސްކިތްތައް ކައިރީ ފަންޑު ފޮށި ބެހެއްޓުން ހިމެނޭ ކަމަށެވެ. މީގެ އިތުރުން، ޣާޒާ ހަނގުރާމަ އާއި ބެހޭ އެންމެ ފަހުގެ މައުލޫމާތު ދިނުމަށް ޕެނަލް ޑިސްކަޝަންތަކެއް ބޭއްވުމަށް ނިންމާފައިވާ ކަމަށް ވެސް ޝަހުނީޒް ވިދާޅުވިއެވެ.

މި ހަރަކާތުގައި މިހާތަނަށް އިސްލާމިކް ޔުނިވަރސިޓީ އޮފް މޯލްޑިވްސް (އައިޔޫއެމް)، ވިލާ ކޮލެޖް، ކްލިކް ކޮލެޖް، ސައިރެކްސް ކޮލެޖް، މެޕްސް ކޮލެޖް، އެމްއައި ކޮލެޖް އަދި އެވިޑް ކޮލެޖުން ވަނީ ބައިވެރިވެފައެވެ. އަދި ކުރިޔަށް އޮތްތަނުގައި އިތުރު ކޮލެޖުތަކުން ބައިވެރިވާނެ ކަމަށް ހަރަކާތް އިންތިޒާމް ކުރާ ފަރާތުން ވަނީ ބުނެފައެވެ.

ޝަހުނީޒް ވިދާޅުވީ މިހަރަކާތުން ލިބޭ ފައިސާ މާސީއާ ހަވާލުކުރުމަށް ނިންމާފައިވާ ކަމަށާއި، އެ ފައިސާ މާސީ މެދުވެރިކޮށް އިންޓަނޭޝަނަލް އެއިޑް ކެމްޕެއިން (އައިއޭސީ) މެދުވެރިކޮށް ފަލަސްތީނުގެ ރައްޔިތުންނަށް ފޯރުކޮށްދިނުމަށް ނިންމާފައިވާ ކަމަށެވެ.

ފަލަސްތީނުގެ ޣާޒާއަށް އިސްރާއީލުގެ ޔަހޫދީން ދެމުން ގެންދާ ހަމަލާތަކުގައި އެތަށް ބަޔަކު ގެދޮރު ދޫކޮށް ރެފިއުޖީ ކޭމްޕުތަކަށް ބަދަލުވެފައިވާއިރު، މި ހަމަލާތަކުގައި ފަލަސްތީނުގެ އެތަށް ރައްޔިތުންނެއް ވަނީ ޝަހީދުވެފައެވެ. އަދި އަނިޔާވި މީހުންގެ އަދަދު 2000ން މަތިވެފައިވާ ކަމަށް ރިޕޯޓްތައް ބުނެއެވެ.