ރާއްޖޭގެ 25 ރަށެއްގައި ފެންވަރު ރަނގަޅު އައުޓްޑޯ ވޮލީބޯޅަ ކޯޓު އެޅުމަށް ނިންމާފައިވާ ކަމަށް ކުޅިވަރާ ބެހޭ ވަޒީރު އަޙްމަދު މަޚްލޫފް ވިދާޅުވެއްޖެއެވެ.

އަންގާރަ ދުވަހު ކުރެއްވި ޓްވީޓެއްގައި ވަޒީރު ވަނީ ވޮލީބޯޅަ މުޅި ރާއްޖޭގައި ފުޅާކުރުމަށްޓަކައި ކުރަމުން އަންނަ މަސައްކަތުގެ ދަށުން އައުޓްޑޯ ވޮލީބޯޅަ ކޯޓުތައް އެޅުމަށް ނިންމި 25 ރަށް އިއުލާން ކޮށްފައެވެ. އެ ރަށްތަކަކީ ހދ. ފިނޭ، ހދ. ކުމުންދޫ، ހދ. ނޭކުރެންދޫ، ށ. ފުނަދޫ، ށ. މިލަންދޫ، ބ. ކެންދޫ، ބ. ގޮއިދޫ، ޅ. ހިންނަވަރު، ކ. ތުލުސްދޫ، ވ. ކެޔޮދޫ، ވ. ފެލިދޫ، ވ. ފުލިދޫ، މ. ދިއްގަރު، ފ. މަގޫދޫ، ފ. ނިލަންދޫ، ތ. މަޑިފުށި، ތ. ހިރިލަންދޫ، ލ. ފޮނަދޫ، ގއ. ވިލިނގިލި، ގއ. ނިލަންދޫ، ގއ. ކޮލަމާފުށި، ގއ. ދާންދޫ، ޏ. ފުވައްމުލައް އަދި ސ. ފޭދުއެވެ.

ކުޅިވަރާ ބެހޭ ވުޒާރާއިން މައުލޫމާތުދޭ ގޮތުން މި ކޯޓުތައް އެޅުމަށް ގާތްގަނޑަކަށް 25 މިލިޔަން ރުފިޔާ ޚަރަދުވާނެއެވެ. އަދި އެ ވުޒާރާގެ އަމާޒަކީ ވީ އެންމެ އަވަހަކަށް މި ދަނޑުތަކުގެ މަސައްކަތް ނިންމާލުން ކަމަށްވެސް ވަނީ ބުނެފައެވެ.

ރާއްޖޭގެ 25 ރަށެއްގައި މި ސަރުކާރުން އައުޓްޑޯ ވޮލީބޯޅަ ކޯޓު އަޅާއިރު، މީގެ ކުރިން ވަނީ ހަތަރު ރަށެއްގައި އައުޓްޑޯ ވޮލީބޯޅަ ކޯޓު ގާއިމުކޮށްފައެވެ. އެއީ އަދ. ދިއްދޫ، ރ. ކިނަޅޮސް، އއ. އުކުޅަސް އަދި ކ. ހުރާއެވެ. އަދި ރާއްޖޭގައި ވޮލީބޯޅަ ކުރިއެރުވުމަށް ކުޅިވަރާ ބެހޭ ވަޒީރު އިސްނަންގަވައިގެން އަންނަނީ ގިނަ މަސައްކަތްތަކެއް ކުރައްވަމުންނެވެ.