ހަރުކަށި ފިކުރު ފަތުރާ "ބޮޑެއް" ފުލުހުން ހައްޔަރުކޮށްފި!
މާލެ ސިޓީއިން ހައްޔަރުކުރީ 49 އަހަރުގެ ފިރިހެނެއް
ފުލުހުން ހިންގި އޮޕަރޭޝަނެއްގެ ތެރެއިން
ހަރުކަށި ފިކުރު ފެތުރުމުގަައި އިސްކޮށް ހަރަކާތްތެރިވާ މީހެއްކަމަށް ތުހުމަތުކުރެވޭ މީހަކު ފުލުހުން ހައްޔަރުކޮށްފިއެވެ.
ފުލުހުން ހާމަކުރިގޮތުގައި ހައްޔަރުކޮށްފައިވަނީ އަންގާރަ ދުވަހުގެ ދުވަހުގެ ރޭ މާލެ ސިޓީއިންކަމަށެވެ. ހައްޔަރުކޮށްފައިވަނީ ހަރުކަށި ފިކުރު ފެތުރުމުގަައި އިސްކޮށް ހަރަކާތްތެރިވާ މީހެއްކަމަށް ތުހުމަތުކުރެވޭ 49 އަހަރުގެ ދިވެހި ފިރިހެނެއްކަމަށް ފުލުހުން މަޢުލޫމާތުދެއެވެ. މިކަމާއި ގުޅޭ އިތުރު އެއްވެސް ތަފްސީލެއް ފުލުހުން ހިއްސާކޮށްފައެއް ނުވެއެވެ.
ހަރުކަށި ފިކުރު ފެތުރުމުގަައި އިސްކޮށް ހަރަކާތްތެރިވާ މީހެއްކަމަށް ތުހުމަތުކުރެވޭ މީހަކު ފުލުހުން ހައްޔަރުކޮށްފައިވާއިރު، ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށް މެއި 6 ވަނަ ދުވަހުގެ ރޭ ދިން ނިރުބަވެރި ހަމަލައާ ގުޅިގެން މާލެއާއި ރާއްޖޭގެ އެކި ސަރަހައްދުތަކުގައި ސިފައިން ހަތިޔާރާއެކު ހަރަކާތްތެރިވާން ވަނީ ފަށާފައެވެ.
އެމްއެންޑީއެފުން ވަނީ ހަތިޔާރާއެކު ސިފައިން ރާއްޖޭގެ އެކި ކަންކޮޅުތަކުގައި ހަރަކާތްތެރިވަމުންދާކަން ހާމަކޮށްފައެވެ. އެމްއެންޑީއެފުން ބުނެފައިވަނީ، ރައީސް ނަޝީދަށް ދިން ހަމަލާއާއި ގުޅިގެން މާލެ ސަރަހައްދުގެ އިތުރުން ރާއްޖޭގެ އެކި ކަންކޮޅުތަކުގެ ސަލާމަތީކަންކަން ވަރުގަދަކޮށްފައިވާކަމަށެވެ. އަދި އެތަން ތަނުގައި ހަތިޔާރާއެކު ސިފައިން ހަރަކާތްތެރިވަމުން ގެންދާނެކަމަށްވެސް ވަނީ ބުނެފައެވެ. ރައީސް ނަޝީދު، ކާރުކޮޅަށް އަރާވަޑައިގަންނަވަނިކޮށް އެއްޗެއް ގޮއްވާލައި، އެމަނިކުފާނުގެ ހަށިކޮޅަށް ގެއްލުން ދިނުމާއި ގުޅިގެން އެމްއެންޑީއެފްގެ ސެކިއުރިޓީ ވަރުގަދަކޮށް، އެލާޓް ސްޓޭޓަސް ވަނީ މަތިކޮށްފައެވެ. މި ހަމަލާއާ ގުޅިގެން މިހާތަނަށް 3 މީހަކު ހައްޔަރުކޮށްފައިވާއިރު، ގޮއްވާލި ބޮމާއި ގުޅޭ އިތުރު ކަންތައްތަކެއް ދެނެގަތުމުގެ މަސައްކަތް ސިފައިންނާއި ގުޅިގެން ފުލުހުންވެސް ދަނީ ކުރަމުންނެވެ.
ޓެރަރިޒަމާ ދެކޮޅަށް އައްޑޫ ސިޓީގައިވެސް ސިފައިންނާއި ފުލުހުން ގުޅިގެން ކުރިއަށް ގެންދާ ޚާއްސަ އޮޕަރޭޝަނެއްގައި ބަޔަކު ވަނީ ހައްޔަރުކޮށްފައެވެ. މިއޮޕްރޭޝަންއާ ބެހޭ ގޮތުން ފުލުހުންގެ މީޑިއާ އޮފިސަރު ވިދާޅުވީ މިހާތަނަށް ހަތް މީހަކު ފުލުހުންގެ ބެލުމުގެ ދަށަށް ގެނެސްފައިވާ ކަމަށެވެ. އަދި ވިދާޅުވީ ތިން މީހެއްގެ ބަންދަށް 15 ދުވަސް، ހަތަރު މީހެއްގެ ބަންދަށް 7 ދުވަސް ޖަހާފައިވާ ކަމަށެވެ. މީގެ ކުރިން ވެސް އައްޑޫ ސިޓީގައި ހަރުކަށި ފިކުރާއި ޓެރަރިޒަމާއި ދެކޮޅަށް ޚާއްސަ އޮޕަރޭޝަންތަކެއް ކުރިއަށް ގެންގޮސްފައިވެއެވެ.
މީގެ އިތުރުން ޓެރަރިޒަމްގެ ކުށްތަކާއި ހައްދު ފަހަނައަޅާ ދިއުމުގެ ކުށްކުށަށް ހިތްވަރުދޭ ސިވިލް ސަރވިސްގެ މުވައްޒަފުންނާމެދު ފިޔަވަޅު އަޅާނެކަމުގެ އިންޒާރު ސިވިލް ސަރވިސް ކޮމިޝަނުންވެސް ވަނީ ދީފައެެވެ.
ސިވިލް ސަރވިސް ކޮމިޝަންގެ ރައީސް މުހައްމަދު ނާސިހު ސޮއިކުރައްވައި ނެރުއްވާފައިވާ ސަރކިއުލަރއެއްގައި ވަނީ ޓެރަރިޒަމް މަނާކުރުމުގެ ގާނޫނުގައި ބަޔާންކޮށްފައިވާ އެއްވެސް އަމަލެއް ކުރުން ނުވަތަ އެފަދަ ކަމަކަށް ހިތްވަރުދޭ އަމަލެއް ކޮށްފިނަމަ، ދިވެހި ސިވިލް ސަރވިސްގެ ގާނޫނާއި ގަވާއިދާ އެއްގޮތްވާ ގޮތުގެމަތިން މައްސަލަ ބަލައި އިދާރީ ފިޔަވަޅު އަޅާނެކަމަށެވެ. މި ސަރކިއުލަރގައި ބަޔާންކޮށްފައިވާ ކަންކަމުގެ ތެރޭގައި ޓެރަރިޒަމްގެ އަމަލެއް ކުރުމާއި ކުރަން އުޅުމާއި އެފަދަ ކަމެއް ކުރުމުގައި އެހީތެރިވެދިނުމާއި އެއްވެސް ސިފައެއްގައި އެފަދަ އަމަލެއްގައި ބައިވެރިވުން ނުވަތަ ސީދާ ގޮތުންނާ ނުސީދާގޮތުންވިއަސް، ޓެރަރިޒަމްގެ ގާނޫނުން މަނާކުރާކަމަށް ހިތްވަރުދޭ އަމަލެއް ކުރާނަމަ އެމައްސަލައެއް ބެލުން ހިމެނެއެވެ.
މީގެތެރޭގައި މީޑިއާގެ ވަސީލަތްތަކާއި އެނޫންވެސް ވަސީލަތްތައް މުވައްޒަފުން ބޭނުންކުރުމުގައާއި މުޖުތަމައުގައި އުޅޭ އުޅުމުގައިވެސް ޓެރަރިޒަމްގެ އަމަލުތަކަށް ހިތްވަރުދޭ ކަންކަން ހިމެނެއެވެ. ޓެރަރިޒަމްގެ އަމަލުތަކަށް ހިތްވަރުދިނުމުގެ ގޮތުން ބޭނުންކުރާފަދަ ބަސްތައް ބޭނުންކުރުމާއި އެފަދަ ފޮޓޯއާއި ވީޑިއޯ އާއްމުކުރުމާއި ޓެރަރިސްޓް ޖަމާތްތަކަށް ތާއީދުކުރާކަން ދޭހަވާފަދަ އެއްވެސް އަމަލެއް ސިވިލް ސަރވިސް މުވައްޒަފުން ނުހިންގުމަށް ވަނީ އަންގަވާފައެވެ. އެ އިދާރާއިން ވަނީ ޓެރަރިޒަމްގެ ކުށްތަކާއި ހައްދު ފަހަނައަޅާ ދިއުމުގެ ކުށްކުށަށް ހިތްވަރުދޭ ސިވިލް ސަރވިސް މުވައްޒަފުންނާމެދު ސިވިލް ސަރވިސްގެ ގާނޫނާ އެއްގޮތަށް މައްސަލަ ބަލައި އިދާރީ ފިޔަވަޅު އަޅާނެކަމަށް ބުނެފައެވެ.
