ލޭ ހުއްދަކަމަށް ގޮވުން އާންމުވެފައިވާތީ އަވަސް ފިޔަވަޅު އެޅުމަށް ގޮވާލާ މައްސަލައެއް
18 މެއި 2021 | އަންގާރަ 12:47މި މައްސަލަ ހުށަހެޅުއްވީ ގަލޮޅު ދެކުނު ދާއިރާގެ މެމްބަރު މީކާއިލް
ގަލޮޅު ދެކުނު ދާއިރާގެ މެންބަރު މީކާއީލު އަހުމަދު ނަސީމް މައްސަލަ ހުށަހަޅުއްވަނީ
މީސްމީހުންގެ ލޭ ހުއްދަކަމަށް ގޮވުން އާންމުވެފައިވާތީ އެފަދަ ފަރާތްތަކާމެދު އަވަސް ފިޔަވަޅު އެޅުމަށް ގޮވާލާ މައްސަލައެއް ރައްޔިތުންގެ މަޖިލީހަށް ހުށަހަޅައި ބަހުސްކޮށްފިއެވެ.
ގަލޮޅު ދެކުނު ދާއިރާގެ މެންބަރު މީކާއީލު އަހުމަދު ނަސީމް މިމައްސަލަ ހުށަހަޅުއްވަމުން ވިދާޅުވީ ފަހަކަށް އައިސް މީސް މީޑިޔާގަޔާއި ތަފާތު އޮންލައިން ޕްލެޓްފޯމްތަކުގައި ވަކިވަކި ފަރުދުންނާ ދެކޮޅަށް ހަރުކަށި ފިކުރުގެ ތެރެއިން ނަފުރަތު އުފައްދާ އެމީހުންގެ ލޭ ހުއްދަ ކަމަށް ގޮވާ އެއީ އިސްލާމުން ނޫންކަމަށް ބުނެ ތަފާތު ލޭބަލްތައް އެޅުވުން އާންމުވެފައިވާކަމަށެވެ. މިގޮތުން ދާދިފަހުންވެސް އެއީ ކާކުކަން އެނގޭ ފަރުދެއް އުނގޫފާރު ދާއިރާގެ މެމްބަރ މުހައްމަދު ވަހީދަށް ނިސްބަތްކޮށް މުހައްމަދު ވަހީދަކީ މަރާލަންޖެހޭ މީހެއްކަމަށް ބުނެ ވަރަށް ފާޅުގައި ފޭސްބުކް ސްޓޭޓަސްތައް ޝާއިއުކޮށްފައިވާކަމަށެވެ.
މިމައްސަލަ ބަލައިގަތުމަށް ނެގުނު ވޯޓުގައި ބައިވެރިވެވަޑައިގެންނެވި 33 މެމްބަރުން ވަނީ މައްސަލަ ބަލައިގަތުމަށް ވޯޓު ދެއްވާފައެވެ. އެއާއެކު މެމްބަރުން މިމައްސަލައަށް ބަހުސްކުރައްވަމުން މިއީ ސީރިއަސް މައްސަލައެއްގެ ގޮތުގައި ވަނީ ފާހަގަކުރައްވާފައެވެ. އަދި ގިނަ މެމްބަރުންތަކެއް ވަނީ ރައްޔިތުންގެ މަޖިލީހުގެ އުނގޫފާރު ދާއިރާގެ ކުރީގެ މެމްބަރ ޑރ އަފްރާޝީމް އަލީ އަވަހާރަކޮށްލުމާއި، ޔާމީން ރަޝީދު މަރާލުމާއި އަދި ނޫސްވެރިޔާ އަހުމަދު ރިލްވާން ވަގަށް ނެގުން އަދި ދާދިފަހުން ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށްދިން ހަމަލާއަކީ "ލާދީނީ"ޓެގްގެ ދަށުން ކޮށްފައިވާ ކަންކަންކަމަށް ވިދާޅުވެފައެވެ.
މިއީ ކިހާ ނުރައްކާތެރިކަމެއްކަން އާންމުންނަށް އަންގައިދީ އެކަމަށް ހޭލުންތެރިކުރުވަން ޖެހޭކަމަށް މެމްބަރުން ވިދާޅުވިއެވެ. މީގެއިތުރުން ލާދީނީ ޓެގް އެޅުވުން ނުވަތަ ދީނީ ހަރުކަށި ފިކުރާ އެއްގޮތަށް ދީނާ ޚިލާފު ވާހަކަދައްކާ މީހުންނަށްވެސް ފިޔަވަޅު އަޅަންޖެހޭކަމަށް މެމްބަރުން ފާހަގަކުރެއްވިއެވެ. އަދި ނަފްރަތު އުފައްދަން ދައްކާ ވާހަކަ އާއި ޚިޔާލުފާޅުކުމުގެ މިނިވަންކަމުގެ ތެރެއިން ދެކެވޭ ވާހަކަތައް ވަކިވާންޖެހޭކަމާއި ސިޔާސީ މަގްސަދުގައި ކުރެވޭ މިފަދަ ކަންކަން މިހާރަށްވުރެ ބޮޑަށް ސީރިއަސް ކަމެއްގެ ގޮތުގައި ނަގަންޖެހޭކަމަށް މެމްބަރުން ވިދާޅުވިއެވެ.
