ދައުވާއެއް ކޮށްފިނަމަ އެންމެ ދުވަހަކުވެސް މަގާމުގައި ނުހުންނާނަން: މަޚްލޫފް

ކުޅިވަރާ ބެހޭ ވަޒީރު އަޙްމަދު މަޚްލޫފުގެ މައްޗަށް ތުހުމަތުކުރެވޭ ކޮރަޕްޝަނުގެ މައްސަލައިގެ އެއްވެސް ހަގީގަތެއް ނެތް ކަމަށާއި، އެ މައްސަލައިގައި ދައުވާކޮށްފިނަމަ ވަގުތުން އިސްތިއުފާދެއްވާނެ ކަމަށް މަޚްލޫފް ވިދާޅުވެެއްްޖެއެވެ.

އެމްއެމްޕީއާރްސީ ކޮރަޕްޝަނުގެ ބޮޑު ހިޔާނާތުގެ ފައިސާގައި މަޚްލޫފް ޖެހިފައިވާ ކަމަށް ރައްޔިތުންގެ މަޖިލީހުގެ އިދާރާއިން އާންމުކުރި ލިސްޓުގައި އޮތްއިރު، އަންގާރަ ދުވަހު މަޚްލޫފް ވިދާޅުވީ މީގެ ކުރިންވެސް އެ މައްސަލައިގައި ސަސްޕެންޑްކޮށް ފިޔަވަޅުތަކެއް އަޅާފައިވާ ކަމަށް ވިދާޅުވެފައެވެ. އަދި އަލުން މަގާމު ހަވާލުކޮށްފައި ވަނީ ތަހުގީގީ އިދާރާތަކުން މައްސަލައެއް ނެތް ކަމަށް ނިންމުން ކަމަށްވެސް މަޚްލޫފް ވިދާޅުވިއެވެ.

މަޖިލީހުން އާންމުކުރި ލިސްޓަކީ ސިޔާސީ ބަޔަކު އެކުލަވާލި، އަދި އެ ‎މައްސަލައާ ސީދާ ގުޅުންނެތް އެތައް ބައެއްގެވެސް ހައްގުތައް ގެއްލިގެންދިޔަ ލިސްޓެއް ކަމަށާއި، އެފަދަ ލިސްޓެއްގައި ނަން އޮތުމަކީ ކުށްވެރިއެއްގެ ގޮތުގައި ބެލޭނެ ކަމެއް ނޫން ކަމަށްވެސް ވަޒީރު ވިދާޅުވިއެވެ. އަދި ކުށްވެރިއެއް ކަމަށް ނިންމޭނީ އެކަން ތަހުގީގުކޮށް ދައުވާކޮށްގެން ކަމަށާއި، ތަހުގީގުގެ މަރުހަލާތައް ނިމި ދައުވާކުރަން މައްސަލަ ފޮނުވާ ހިސާބުން ވަޒީރު ކަމުގެ މަގާމުން އިސްތިއުފާ ދެއްވާނެ ކަމަށް މަޚްލޫފް ވިދާޅުވިއެވެ.

އޭސީސީން މީގެ ކުރިން އާންމުކުރި އެމްއެމްޕީއާރްސީގެ ހިޔާނާތުގެ ރިޕޯޓާ ގުޅިގެން މަޚްލޫފު ގޭގައި މަޑުކުރަން ރައީސް އަންގަވާފައިވަނީ 2019 ވަނަ އަހަރުގެ ފެބްރުއަރީ މަހުގެ 14 ވަނަ ދުވަހުއެވެ. އެމްއެމްޕީއާރްސީގެ ހިޔާނާތުގެ ރިޕޯޓުގައި މަޚްލޫފުގެ އެކައުންޓަށް 33،000 ޑޮލަރު ޖަމާވެފައިވާ ކަމަށް ދައްކައެވެ. 

އެކަމާ ގުޅިގެން އޭނާގެ އެއްވެސް މައްސަލައެއް ތަހުގީގު ކުރަމުންދޭތޯ އަދި އެފަދަ މައްސަލައަކާ ގުޅިގެން ދައުވާ ކުރަމުންދޭތޯ ބެލުމަށް އޭސީސީއަށް ސިޓީއެއް ފޮނުވުމުން، އެ ސިޓީގެ ޖަވާބުގައި އެސީސީން މަޚްލޫފުގެ ކޮރަޕްޝަނުގެ މައްސަލައެއް އެ ކޮމިޝަނުން ބަލާފައިނުވާކަން ވަނީ ކަށަވަރުކޮށްދީފައެވެ.

މަޚްލޫފް ވިދާޅުވީ އެސްއޯއެފްއިން އޭނާގެ އެކައުންޓަށް ޖަމާކޮށްފައިވާ ފައިސާއަކީ ޑޮލަރު ގަތުމުގެ މުއާމަލާތެއްގަައި ޖަމާކޮށްފައިވާ ފައިސާ ކަމަށެވެ. އަދި އެ މުއާމަލާތަކީ އޭނާގެ އެއްބަނޑު އެއްބަފާ ކޮއްކޮ މެދުވެރިވެގެން ހިންގި "ސައްހަ ކަރަންސީ އެކްސްޗޭންޖްގެ މުއާމާލެތެއް" ކަމަށާއި، އެ ފައިސާ އޭނާގެ އެކައުންޓަށް ޖަމާކުރަން ޖެހުނީ މުއާމަލާތުގައި ހިމެނޭ "ދަ ޖީންސް" ފިހާރައިގެ ޑޮލަރު އެކައުންޓެއް ނެތުމުން ކަމަށްވެސް ވަނީ ވިދާޅުވެފައެވެ. "ދަ ޖީންސް" ފިހާރައަކީ މަޚްލޫފުގެ އާއިލީ ވިޔަފާރީއެކެވެ.

މަޚްލޫފް ވަނީ 33،000 ޑޮލަރަށް ވާ ދިވެހި ފައިސާ (508،860ރ.) އެސްއޯއެފްއަށް ލިބުނު ކަމަށް އެ ކުންފުނީގެ ނަމުގައި ދޫކޮށްފައިވާ ސްލިޕެއްވެސް ޓްވީޓުކުރައްވާފައެވެ. އަދި އެ ޑޮލަރުގެ މުއާމަލާތް އެސްއޯއެފްއިން ކޮށްފައިވަނީ ބޭންކް ރޭޓް ކަމަށްވާ 15.42ރ. ގެ ރޭޓުން އެއްވެސް ފައިދާއެއް ނެތް ގޮތަށް ކަން އެނގެއެވެ.