ޒާހިރުގެ ހަނދާނުގައި މަޖިލީހުގައި ހަމަހިމޭންކަމުގެ ސުކޫތެއް
ޒާހިރު ވަނީ 2005ން ފެށިގެން 2014ށް މަޖިލީހުގައި މެމްބަރުކަން ކުރައްވާފައި
ރައްޔިތުންގެ މަޖިލީހުގެ ޖަލްސާގެ ތެރެއިން
ރައްޔިތުންގެ މަޖިލީހުގެ ގައްދޫ ދާއިރާގެ ކުރީގެ މެންބަރު ޒާހިރު އާދަމް (ގައްދޫ ޒާހިރު) އަވަހާރަވުމާ ގުޅިގެން ރައްޔިތުން މަޖިލީހުގެ އަންގާރަ ދުވަހުގެ ޖަލްސާގައި ހަމަހިމޭން ކަމުގެ ސުކޫތެއް ގެނެސްފިއެވެ.
އަންގާރަ ދުވަހުގެ ޖަލްސާގައި ރިޔާސަތުގައި އިންނެވި މަޖިލީހުގެ ނައިބު ރައީސް އީވާ އަބްދުﷲ ވަނީ ޒާހިރު މަޖިލީހުގެ އެކި ދައުރުތަކުގައި މެމްބަރެއްގެ ގޮތުގައި އުޅުއްވި އަހަރުތަކުގެ ތަފްސީލުދެއްވާފައެވެ. އަދި އެވަގުތު ޖަލްސާގައި ތިއްބެވި މެމްބަރުން ސުކޫތުގައި ބައިވެރިވެވަޑައިގަތުމަށް ކޮޅަށް ތެދުވެވަޑައިގަތުމަށް އެދިވަޑައިގެންނެވިއެވެ.
އަލްމަރުހޫމް ޒާހިރު އާދަމް ވަނީ 27 ފެބްރުއަރީ 2005ން ފެށިގެން 27 މެއި 2014 އާ ހަމައަށް ރައްޔިތުންގެ މަޖިލީހުގެ ދެ ދައުރުގައި މެމްބަރުކަން ކުރައްވާފައެވެ. އެގޮތުން 27 ފެބްރުއަރީ 2005ން 27 މެއި 2009ގެ ނިޔަލަށް ގދ. އަތޮޅުގެ މެމްބަރުކަން ކުރައްވާފައިވެއެވެ. އަދި ރައްޔިތުންގެ ޚާއްސަ މަޖިލީހުގައި 28 ފެބްރުއަރީ 2005ން ފެށިގެން 26 ޖޫން 2008 ގެ ނިޔަލަށް އިންނެވިއެވެ. އޭގެފަހުން ގައްދޫ ދާއިރާގެ މެމްބަރުކަން 28 މެއި 2009ން 27 މެއި 2014ށް ވަނީ އަދާކުރައްވާފައެވެ.
ޒާހިރުގެ އާއިލާގެ ފަރާތުން ރާއްޖެ އެމްވީއާ ވާހަކަ ދައްކަވަމުން ވިދާޅުވީ ހޯމަ ދުވަހުގެ ރޭގެ ވަގުތެއްގައި ޒާހިރުގެ ހާލުކޮޅު ގޯސްވެގެން އެމަރޖެންސީގައި އައިޖީއެމްއެޗަށް ގެންދެވި ފަރުވާ ދެވިފައިވާ ކަމަށެވެ. އާއިލާއިން ވިދާޅުވެފައިވަނީ ޒާހިރުގެ ހާލުކޮޅު ގޯސްވެފައިވަނީ ކޮވިޑުގެ ސަބަބުން ކަމަށެވެ. ޒާހިރު އަވަހާރަވި އިރު އުމުރުފުޅުން 80 އަހަރެވެ.
ގައްދޫ ދާއިރާ މިހާރު ތަމްސީލް ކުރައްވަމުން ގެންދަވަނީ ޒާހިރުގެ ދަރިކަލުން އަހްމަދު ޒާހިރެވެ.
