މި ރަމަޟާން މަހު އެމްޕީއެލްގެ ސަބަބުން ބާޒާރުގެ އަގަށް ބަދަލު އައިސްފައެއް ނުވާނެ: އެމްޕީއެލް
މި ރަމަޟާން މަހު އެމްޕީއެލްގެ ގްރައުންޑް އޮޕަރޭޝަންތައް ކުރިއަށް ގޮސްފައި ވަނީ ވަރަށް "ސްމޫތު"ކޮށް
އެމްޕީއެލް ބަނދަރު
އެހެން އަހަރުތަކާ އަޅައިބަލާއިރު މިއަހަރުގެ ރަމަޟާން މަހު މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ ސަބަބުން ބާޒާރުގައި ތަކެތީގެ އަގުތަކަށް އެއްވެސް ބަދަލެއް އައިސްފައި ނުވާނެ ކަމަށް އެ ކުންފުނިން ބުނެފިއެވެ.
ރާއްޖެޓީވީގެ ހަބަރުފީތާ ޕްރޮގްރާމުގައި ވާހަކަދައްކަވަމުން އެމްޕީއެލްގެ ޗީފް މެނޭޖަރ ހެޑް އޮފް ކްލިއަރަންސް ޑިޕާޓްމަންޓް ތޮލްހަތު ސައީދު ވިދާޅުވީ ރަމަޟާން މަހަކީ އަބަދުވެސް ބާޒާރުގައި ތަކެތީގެ އަގުތަކަށް ބަދަލުތަކެއް އައިސް ތަކެތީގެ އަގު ބޮޑުވާ މަހެއް ކަމަށެވެ. ވިޔަފާރިވެރިން ބުނާގޮތުގައި އެކަމުގެ އެއް ސަބަބަކީ އެމްޕީއެލްގެ ޚިދުމަތްތައް ކަމަށް ތޮލްހަތު ވިދާޅުވިއެވެ. އެހެންނަމަވެސް މި ރަމަޟާން މަހު އެ މައްސަލަ ދިމާވެފައި ނުވާނެ ކަމަށާއި ބާޒާރުގެ އަގުތަކަށް ބަލައިލިޔަސް އެކަން އެނގޭނެ ކަމަށް ވިދާޅުވިއެވެ.
ތޮލްހަތު ވިދާޅުވީ އެހެން އަހަރުތަކާ އަޅައިބަލާއިރު މި ރަމަޟާން މަހު އެމްޕީއެލްގެ ގްރައުންޑް އޮޕަރޭޝަންތައް ކުރިއަށް ގޮސްފައި ވަނީ ވަރަށް "ސްމޫތު"ކޮށް ކަމަށެވެ. އެގޮތުން އިމްޕޯޓްކުރި މުދާ ބޭލުމާއި އޭގެ ވެރިފަރާތައް މުދާ ލިބުމުގައި އެއްވެސް ލަސްކަމެއް އަދި އެއްވެސް ތާއްޓެއް ދިމާވެފައި ނުވާނެ ކަމަށް ވިދާޅުވިއެވެ. ރަމަޟާން މަހު އާންމުކޮށް ގެންނާނީ ޕެރިޝަބަލް ގުޑްސް ނުވަތަ ކާބޯތަކެތި ކަމަށާއި އުސޫލެއްގެ ގޮތުން އެއީ ބަނދަރު ކުރާތާ 24 ގަޑިއިރު ތެރޭގައި ނަގަން ޖެހޭ ތަކެތި ކަމަށެވެ.
އޭނާ ވިދާޅުވީ މި ރަމަޟާން މަހު ވިޔަފާރިވެރިން ތިބެނީ ތަކެތި ގެންނަ އިރު ތައްޔާރަށް ކަމަށާއި، ހަމަ ގެނައުމާ އެކު ތަކެތި ނަގާ ކަމަށެވެ. އެހެން އަހަރުތަކާ އަޅައިބަލާއިރު އެ ޕްރޮސެސް ރަނގަޅަށް ދިޔަކަން ބާޒާރުގެ އަގުތަކާއި މުދަލުގެ އެވެއިލަބިލިޓީ އިން ވެސް އެނގޭނެ ކަމަށެވެ.
ތޮލްހަތު ވިދާޅުވީ ޕެންޑަމިކްއެއްގެ ތެރޭގައި އޮތް ނަމަވެސް މި ރަމަޟާން މަހުވެސް އެހެން އަހަރުތަކާ އެއް ވަރަކަށް މުދާ އެތެރެކޮށްފައިވާ ކަމަށެވެ. އެކަމުގައި އެއްވެސް ބަދަލެއް އައިސްފައި ނުވާ ކަމަށް ވިދާޅުވިއެވެ.
އޭނާ ވިދާޅުވީ ޕެންޑަމިކް ތެރޭގައި މަސައްކަތްކުރާތީ އޮޕަރޭޝަންތަކަށް ވަރަށް ބޮޑެތި ބަދަލުތަކެއް ގެނެސްފައިވާނެ ކަމަށެވެ. އެގޮތުން މީގެ ކުރިން އެމްޕީއެލް އަކީ ހުރިހާ ކަމެއްވެސް މީހާ އެތަނަށް ގޮސް ހުރެގެން ކުރަން ޖެހުނު ތަނެއް ކަމަށެވެ. އެކަމަކު އެ ކަންކަމަށް ވަރަށް ބޮޑެތި ބަދަލުތަކެއް ގެނެސް ހުރިހާ އިދާރީ ޚިދުމަތްތަކެއް އޮންލައިންކޮށް ލިބޭނެ ގޮޮތް މިހާރު ހަމަޖައްސާފައިވާނެ ކަމަށް ވިދާޅުވިއެވެ.
އޭނާ ވިދާޅުވީ އެމްޕީއެލްއިން މަސައްކަތްކުރަމުން އަންނަނީ ވީހާވެސް މަދު މުވައްޒަފުން ނެރެގެން ކަމަށެވެ. އެމްޕީއެލް އަކީ ކޮންމެހެން ވެސް ގްރައުންޑް މަސައްކަތްތައް ކުރިއަށްދާނެ ތަނެއް ކަމުން އެތަނުގައި މަސައްކަތަށް ނެރެނީ ހަމައެކަނި ބޭނުންވާ އަދަދަށް މުވައްޒަފުން ކަމަށާއި، ޝިފްޓު ތަކަށް ބަހާއިރު ވެސް އެއް ބަޔަކު އަނެއް ބަޔަކާ ބައްދަލުނުވާނެ ގޮތަށް ރާވާފައިވާ ކަމަށް ވިދާޅުވިއެވެ.
ތޮލްހަތު ވިދާޅުވީ އެމްޕީއެލް އިން ތިބީ މުވައްޒަފުން ވެސް ޕޮޒިޓިވްވާނެ ކަން ދަނެ، އެ ހުރިހާ ހާލަތަކަށް ވެސް ތައްޔާރަށް ކަމަށެވެ.
