ރައީސް ނަޝީދަށް ދިން ޓެރަރިސްޓް ހަމަލާ: ޕާލަމަންޓްރީ އިންކުއަރީއެއް ހެދުމަށް މަޖިލީހުން އިގުރާރުވެއްޖެ
މިއިގުރާރު ހުށަހެޅުއްވީ 241 ކޮމިޓީގެ މުގައްރިރު މުހައްމަދު އަސްލަމް
ރައްޔިތުންގެ މަޖިލީހުގެ ޖަލްސާގެ ތެރެއިން
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް ދިން ޓެރަރިސްޓް ހަމަލާ އާ ގުޅޭ ޕާލަމަންޓްރީ އިންކުއަރީއެއް ހެދުމަށް މަޖިލީހުން އިގުރާރުވެއްޖެއެވެ.
ރައީސް ނަޝީދަށް އަމާޒުކޮށްދިން ޓެރަރިސްޓް ހަމަލާއާއި ގުޅިގެން އެމައްސަލަ ޚާއްސަ މައްސަލައެއްގެ ގޮތުގައި 241 ކޮމިޓީން ވަނީ ބަލާފައެވެ. އެމައްސަލަ ދިރާސާކުރުމަށްފަހު ކޮމިޓީން ނިންމާފައިވަނީ ސެކިއުރިޓީ ފެއިލްވި ގޮތުގެ ތަހުގީގެއް ހިންގުމަށެވެ. ކޮމިޓީގެ ރިޕޯޓް ހޯމަ ދުވަހު ކުރިޔަށްދިޔަ ޖަލްސާގައި ފާސްކޮށްފައިވަނީ ވޯޓުގައި ބައިވެރިވެވަޑައިގެންނެވި 42 މެމްބަރުންގެ އިއްތިފާގުންނެވެ.
ސެކިޔުރިޓީ ފެއިލްވި ގޮތުގެ ތަހުގީގެއް ހިންގުމަށް މަޖިލީހުން ފާސްކުރުމާއި ގުޅިގެން ހޯމަ ދުވަހުގެ ރޭވެސް ޖަލްސާއެއް ބާއްވާފައެވެ. މިޖަލްސާއަށް މިއިގުރާރު ހުށަހަޅުއްވާފައިވަނީ ސަލާމަތީ ޚިދުމަތްތަކާއި ބެހޭ ކޮމިޓީ (241 ކޮމިޓީ)ގެ މުގައްރިރު ހިތަދޫ އުތުރު ދާއިރާގެ މެމްބަރ މުހައްމަދު އަސްލަމެވެ.
މިގަރާރު ހުށަހަޅުއްވަމުން އަސްލަމް ވިދާޅުވީ މެއި މަހުގެ 6 ވަނަ ދުވަހު ރައީސް ނަޝީދު ދިރިއުޅުއްވާ ގެކޮޅު ހުންނަ ނީލޯފަރު މަގުގައި ބާރުގަދަ އެއްޗެއް ގޮއްވާލާ ނުރައްކާތެރި ޓެރަރިސްޓް ހަމަލާއެއް ދީފައިވީ ހިނދު އަދި އެ ނުރައްކާތެރި ހަމަލާގައި އެމަނިކުފާނަށް އެކިވަރުގެ އަނިޔާ ލިބި ފުރާނަފުޅަށް ނުރައްކާވެ، އެމަނިކުފާނުގެ ފުރާނަފުޅަށް އޮތް ނުރައްކާ އަދިވެސް އޮތްކަމަށެވެ.
އަދި ޤާނޫނު އަސާސީގެ 105 ވަނަ މާއްދާ އާއި، ރައްޔިތުންގެ މަޖިލީހުގެ އިމްތިޔާޒުތަކާއި ބާރުތަކުގެ ޤާނޫނުގެ 6 ވަނަ މާއްދާ އާއި 7 ވަނަ މާއްދާގެ ރ އާއި ރައީސުލްޖުމްހޫރިއްޔާކަން ކޮށްފައިވާ މީހަކަށް ދޭންޖެހޭ ރައްކާތެރިކަމާއި އިނާޔަތްތަކާބެހޭ ޤާނޫނުގެ 5 ވަނަ މާއްދާގެ ދަށުން ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް ރައްކާތެރިކަމާއި ހިމާޔަތް ލިބެންޖެހޭކަމަށް ބަޔާންކޮށްފައިވާކަމަށެވެ.
ޤާނޫނު އަސާސީގެ 241 ވަނަ މާއްދާ އާއި ރައްޔިތުންގެ މަޖިލީހުގެ ގަވާއިދުގެ 119 ވަނަ މާއްދާގެ ދަށުން ސަލާމަތީ ޚިދުމަތްތައް ހިނގާ ނުހިނގާގޮތް ބަލައި ސަލާމަތީ ޚިދުމަތްތަކުން މަސައްކަތްކުރަމުން ގެންދަނީ ގާނޫނުތަކާއި ގަވާއިދުތަކާ އެއްގޮތަށްކަން ކަށަވަރުކޮށް އެތަންތަން ޖަވާބުދާރީކުރުވުމަށް ރައްޔިތުންގެ މަޖިލީހުގެ ކޮމިޓީއެއް އެކުލަވާލާފައިވާކަމަށެވެ.
މިއިގްރާރު ފާސްކޮށްފައިވަނީ ވޯޓުގައި ބައިވެރިވެވަޑައިގެންނެވި 49 މެމްބަރުންގެ އިއްތިފާގުންނެވެ.
މިއިގުރާރަށް ބަހުސްކުރެއްވި މެމްބަރުން ވަނީ މިފަދަ ކަމެއް މިމަޖިލީހުން އަލަށް ކުރިނަމަވެސް މިއީ ދުނިޔޭގެ އެހެން ޤާނޫނު ހަދާ މަޖިލިސް ތަކުގައި ކުރާ ކަމެއްކަމަށް ވިދާޅުވިއެވެ. އަދި ރައީސް ނަޝީދަށް މިހަމަލާ އަމާޒުވުމުގައި އެމަނިކުފާނުގެ ސެކިޔުރިޓީ ފެއިލްވެފައިވަނީ ކޮންގޮތަކަށްތޯ ބަލާ އެކަންކަމަށް ކަމާބެހޭ ފަރާތްތަކަށް ލަފާދިނުމުގެމުހިންމުކަން ވަނީ ފާހަގަކުރައްވާފައެވެ.
