''ވެއްޓޭވަރަށް ވުރެ ބާރަށް ތެދުވާށެވެ. ތެދުވެފައި ދުއްވައިގަންނާށެވެ''
ޖަރުމަނުވިލާތުގައި ގެންދަވަނީ ފަރުވާ ހޯއްދަވަމުން
ރައީސް ނަޝީދަށް އާމަޒުކޮށް ދިން ޓެރަރިސްޓް ހަމަލާގައި ބޮޑެތި ޒަޚަމްތަކެއް ލިބިފައިވޭ
ވޭއްޓޭ ވަރަށް ވުރެ ބާރަށް ތެދުވުމަށް ގޮވާލައްވާ ކުރީގެ ރައީސް، ރައީސް މުހައްމަދު ނަޝީދު ދިވެހި ރައްޔިތުންނަށް މެސެޖެއް ދެއްވައިފިއެވެ.
ރައްޔިތުންގެ މަޖިލީހުގެ ނާއިބުރައީސް އަދި ގަލޮޅު އުތުރު ދާއިރާގެ މެންބަރު އީވާ އަބްދުﷲ އެމަނިކުފާނަށް އުފަން ދުވަހުގެ ތަހުނިޔާ ފޮނުއްވާ ކުރެއްވި ޓްވީޓެއްގައި ރައީސް ނަޝީދުގެ ވީޑިއޯއެއް ވަނީ އާއްމުކުރައްވާފައެވެ. ރައީސް ނަޝީދު ވިދާޅުވެފައިވަނީ ''ވެއްޓޭ ވަރަށްވުރެ ބާރަށް ތެދުވާށެވެ. ތެދުވެފައި ދުއްވައިގަންނާށެވެ.''
މެއި މަހުގެ 6 ވަނަ ދުވަހު ރައީސް ނަޝީދަށް އަމާޒުކޮށް ދިން ޓެރަރިސްޓް ހަމަލާގައި ލިބިވަޑައިގެންނެވި ޒަޚަމްތަކަށް ޖަރުމަނުވިލާތުގައި ފަރުވާ ހޯއްދަވަމުން ގެންދަވާއިރު، އެމަނިކުފާނުގެ ހާލުކޮޅާއި މެދު ގިނަ ރައްޔިތުން ތިބީ ކަންބޮޑުވެފައެވެ. މި ހަމާލާއަކީ މުޅި ގައުމަށް ދިން ހަމަލާއެއްގެ ގޮތުގައި ގިނަ ބަޔަކު ސިފަކުރަމުން ދެއެވެ.
ރައީސް ނަޝީދުގެ ފުރާނަފުޅަށް ގެއްލުން ދިނުމަށްޓަކައި ހިންގުނު ޓެރަރިސްޓް ހަމަލާއަށް ފަހު އެމަނިކުފާނު ތަކުރާރުކޮށް، އެކި ބޭފުޅުން މެދުވެރިކުރައްވައި އަދި ހަމަލާއަށް ފަހު އާންމުންނަށް ކުރެއްވި ފުރަތަމަ ޓުވީޓުގައި ވެސް ވިދާޅުވެފައި ވަނީ ގަދަކޮށް އެނބުރި ވަޑައިގަންނަވާނެ ކަމުގައެވެ.
ރައީސް ނަޝީދު އިތުރު ފަރުވާ ހޯއްދެވުމަށް ރާއްޖެއިން ބޭރަށް ވަޑައިގަތުމަށް ފަހު އެމަނިކުފާނުގެ ހާލުކޮޅު ރަނގަޅުވަމުން އަންނަކަން ދައްކުވައިދޭ ވީޑިއޯއެއް ވެސް ވަނީ އާންމުކުރައްވާފައެވެ.
ސޯޝަލް މީޑިއާގައި އާންމުވެފައިވާ ވީޑިއޯގައި ފެނިގެންދަނީ އެމަނިކުފާނު ފަރުވާ ހޯއްދަވަމުން ގެންދަވާ ހޮސްޕިޓަލްގެ ސިޑިން މައްޗަށް އަދި ތިރިއަށް ވަޑައިގަންނަވާ މަންޒަރެވެ. އެ ވީޑިއޯއިން އެކަނިވެސް އެމަނިކުފާނުގެ ހިތްވަރާއި ނުގުޑާ އަޒުމް ފެނިގެންދެއެވެ.
