ނަފުރަތުގެ އަމަލު ހިންގުމަކީ ކުށެއްކަމަށް ކަނޑައަޅަނީ
17 މެއި 2021 | ހޯމަ 14:57މަޖިލީހުގެ ރައީސަށާއި އުއްތަމަ ފަނޑިޔާރަށް ރަސްމީ ގެ ހަމަޖެއްސުމަށްވެސް ވަނީ އިސްލާހު ހުށަހަޅާފައި
ފުލުހުން ކުރިއަށް ގެންދާ އޮޕަރޭޝަނެއްގެ ތެރެއިން
ނަފުރަތުގެ އަމަލު ހިންގުމަކީ ކުށެއް ކަމުގައި ކަނޑައެޅުމަށް ކަމާބެހޭ ގާނޫނަށް އިސްލާހު ގެނައުމަށް ބިލެއް ރައީސް އޮފީހަށް ފޮނުވާފައިވާކަމަށް ބަންޑާރަނައިބު އަލްއުސްތާޒު އިބްރާހީމް ރިފްއަތު ވިދާޅުވެއްޖެއެވެ.
މިކަމާއި ގުޅިގެން ރިފްއަތު ކުރެއްވި ޓްވީޓެއްގައި ވިދާޅުވީ "ނަފުރަތުގެ އަމަލު ހިންގުމަކީ ކުށެއް ކަމުގައި ކަނޑައެޅުމަށާއި މަޖިލީހުގެ ރައީސަށާއި އުއްތަމަ ފަނޑިޔާރަށް ރަސްމީ ގެ ހަމަޖައްސައި، ހިމާޔަތާއި ރައްކާތެރިކަން އިތުރުކުރަން ކަމާބެހޭ ގާނޫނަށް އިސްލާހު ގެނައުމުގެ ދެ ބިލެއް، މަޖިލީހަށް ހުށަހެޅުމަށްޓަކައި މިއަދު ރައީސް އޮފީހަށް ފޮނުވައިފިން" ކަމުގައެވެ.
މި ދެ ބިލު ރައީސް އޮފީހަށް ފޮނުވާފައިވާކަމަށް ބަންޑާރަނާއިބު ވިދާޅުވީ ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށް ދިން ޓެރަރިސްޓް ހަމަލާ އަށްފަހު، މަޖިލީހުގެ ރައީސާއި އުއްތަމަ ފަނޑިޔާރަށް ދައުލަތުން ދެމުން ގެންދާ ހިމަޔާތާއި ރައްކާތެރިކަން އިތުރަށް ޔަގީން ކުރުމަށްޓަކައި، އެ ދެ ބޭފުޅުންނަށް ޚާއްސަ ރަސްމީ ގެކޮޅެއް ހަމަޖެއްސުމަށް ރައީސް އިބްރާހިމް މުހައްމަދު ސާލިހު އިރުޝާދު ދެއްވާފައި ވަނިކޮށެވެ.
ދައުލަތުގެ ތިން ބާރުގެ ވެރިންނަށް ދެމުންގެންދާ ފުރިހަމަ ރައްކާތެރިކަމާއި ސަލާމަތްތެރިކަން އިތުރަށް ޔަގީން ކުރުމަށް ކުރަންޖެހޭ ކަންކަން ކުރުމަށް ބަންޑާރަނާއިބަށް ރައީސް އެންގެވީ މިދިޔަ ހަފުތާގައެވެ. ރައީސް އަންގަވާފައިވަނީ މިހާރު އޮތް ގާނޫނުގެ ތެރެއިން އެކަން ކުރެވެން ނެތް ނަމަ، އައު ގާނޫނެއް އެކުލަވައިލައިގެން ވިޔަސް އެ މަސައްކަތް ކުރިއަށް ގެންދެވުމަށެވެ.
ދައުލަތުގެ އެންމެ އިސްވެރިންގެ ތެރެއިން ރަސްމީ ގެކޮޅެއް ސަރުކާރުން މިހާރު ހަމަޖައްސައިދީފައި ވަނީ ރައީސުލްޖުމްހޫރިޔާ އަށާއި ނާއިބުރައީސަށް އެކަންޏެވެ. ރައީސްގެ ރަސްމީ ގެކޮޅަކީ މުލީއާގެ ކަމަށް ވާއިރު ނާއިބުރައީސްގެ ރަސްމީ ގެކޮޅަކީ ހިލާލީގެ އެވެ.
ރައީސް ނަޝީދަށް އަމާޒުކޮށްދިން ޓެރަރިސްޓް ހަމަލާ އާ ގުޅިގެން ގާނޫނީ ގޮތުން ހުރި މައްސަލަތައް ދެނެގަނެ އެކަންކަން އިސްލާހުކުރާނެކަމަށް ސަރުކާރުން ވަނީ ބުނެފައެވެ.
