ރައްޔިތުންގެ މަޖިލީހުގެ ރައީސް ، ރައީސް މުހައްމަދު ނަޝީދަށް ދިން ޓެރަރިސްޓް ހަމަލާގައި، އެމަނިކުފާނުގެ ސެކިއުރިޓީ ފެއިލްވި ގޮތުގެ ތަހުގީގެއް ހިންގުމަށް މަޖިލީހުގެ ސަލާމަތީ ހިދުމަތްތަކުގެ ކޮމިޓީ (241 ކޮމިޓީ)ން ނިންމި ނިންމުން މަޖިލީހުން ފާސްކޮށްފިއެވެ.

މެއި މަހުގެ 6 ވަނަ ދުވަހުގު ރޭ ރައީސް ނަޝީދަށް އަމާޒުކޮށްދިން ޓެރަރިސްޓް ހަމަލާއާއި ގުޅިގެން އެމައްސަލަ ޚާއްސަ މައްސަލައެއްގެ ގޮތުގައި ހަމަ އެރޭ ވަނީ 241 ކޮމިޓީގެ ބައްދަލުވުމެއް ބާއްވާފައެވެ. އެއަށްފަހު ކޮމިޓީން ވަނީ އެމައްސަލަ ދިރާސާކުރުމަށްފަހު 6 ކަމަކަށް ދެންނެވުމަށް ފާސްކޮށްފައެވެ. ކޮމިޓީން މިކަން ދިރާސާކޮށް ނިންމި ގޮތުގެ ރިޕޯޓް ހޯމަ ދުވަހުގެ ޖަލްސާގައި ވަނީ ފާސްކޮށްފައެވެ. ރިޕޯޓް ފާސްކޮށްފައިވަނީ ކޮމިޓީގައި ބައިވެރިވެވަޑައިގެންނެވި 42 މެމްބަރުންގެ އިއްތިފާގުންނެވެ.

ކޮމިޓީ ރިޕޯޓް ފާސްވުމާއި ގުޅިގެން ރިޔާސަތުގައި އިންނެވި މަޖިލީހުގެ ނައިބު ރައީސް، އީވާ އަބްދުﷲ ވިދާޅުވީ ތަހުގީގާ ގުޅިގެން މިރޭ ޖަލްސާއެއް ބާއްވަވާނެކަމަށެވެ.

މަޖިލީހުން ލަފާދިނުމަށް ފާސްކޮށްފައިވާ ހަކަމުގެ ތެރެއިން އެއް ކަމަކީ ޓެރަރިޒަމްގެ އެފަދަ މައްސަލަތައް ތަހުގީގުކުރުމުގައި މިހާތަނަށް ދިމާވެފައިވާ ގޮންޖެހުންތަކަށް ރިއާޔަތްކޮށް، ރައީސް ނަޝީދަށް ދިން ހަމަލާގެ މައްސަލަ ސީރިއަސް އަދި އަވަސް މައްސަލައެއްގެ ގޮތުގައި ތަހުގީގުކުުރުމަށް ފުލުހުންނަށް ދެންނެވުމެވެ.

މީގެއިތުރުން ހަރުކަށި ފިކުރާ ގުޅޭ އެންމެހައި މައްސަލަތައް އަވަސް އަދި ނަތީޖާ ނެރެވޭ ގޮތަށް ތަހުގީގުކޮށް ފިޔަވަޅު އެޅުމަށް ފުލުހުންނަށް ދެންނެވުމަށްވެސް ނިންމާފައިވެއެވެ.

ރައީސް ނަޝީދަށް ދިން ހަމަލާގެ ތަހުގީގާ ގުޅިގެން ކޮމިޓީގެ ފަރާތުން ފުލުހުންނަށް ދަންނަވަން ޖެހޭ ކަމަށް ނިންމާފައިވާ ނިންމުންތަކަކީ:

- އެމައްސަލައިގެ ހެކީގެ ގޮތުގައި ބޭނުންކުރެވިދާނެ ހެކި ނައްތާލުމުގެ ކުރިން މައްސަލައަށް ބޭނުންވާ ހެކި ހޯދުން

- މައްސަލައިގެ ތަހުގީގު ކުރިޔަށްދާއިރު ކަމާގުޅުންހުރި ބޭރުގެ ފަންނީ އަދި ގާބިލް ބޭފުޅުންގެ އެހީތެރިކަން ހޯދައިގެން ތަހުގީގުކުރިޔަށް ގެންދިޔުން

- ތަހުގީގު ކުރިޔަށްދާ މިންވަރަކުން ތަހުގީގާގުޅޭ އެންމެހައި ކަންކަން ރައްޔިތުންގެ މަޖިލީހުގެ ސަލާމަތީ ޚިދުމަތްތަކާއި ބެހޭ ކޮމިޓީ އާ ހިއްސާކުރުން

މީގެއިތުރުން މިމައްސަލަ ތަހުގީގުކުރަމުން ދާއިރު ކޮމިޓީން އެކަން ގާތުން ބަލަމުން ދިޔުމަށްވެސް ވަނީ ނިންމާފައެވެ.

ރައީސް ނަޝީދުގެ ސެކިޔުރިޓީ ފެއިލްވި ގޮތުގެ ތަހުގީގެއް ހިންގުމަށް ނިންމާފައިވާއިރު ގާނޫނާއި ގަވައިދުތައް ތަންދޭ އެންމެ ފުޅާދާއިރާއެއްގައި އެ ތަހުގީގު ކުރިއަށް ގެންދިޔުމަށް ކޮމިޓީން ވަނީ ނިންމާފައެވެ.

ރައީސް ނަޝީދަށް ދިން ޓެރަރިސްޓް ހަމަލާއާ ގުޅިގެން ލިބިވަޑައިގެންނެވި ޒަޚަމްތަކަށް އޭޑީކޭ ހޮސްޕިޓަލްގައި ފަރުވާ ހޯއްދެވުމަށްފަހު މިހާރު ގެންދަވަނީ ޖަރުމަނުވިލާތުގައި ފަރުވާ ހޯއްދަވަމުންނެވެ.