ހަރުކަށި ފިކުރާ ގުޅޭ ހުރިހާ މައްސަލަތައް އަވަސް އަދި ނަތީޖާނެރެވޭ ގޮތަށް ތަހުގީގުކުރުމަށް މަޖިލީހުން އެދެނީ

ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށްދިން ޓެރަރިސްޓް ހަމަލާ ތަހުގީގުކުރަމުން އަންނައިރު މޯލްޑިވްސް ޕޮލިސް ސަރވިސްއަށް 6 ކަމެއްގެ މައްޗަށް ލަފާދިނުމަށް ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީ (241)ން ހުށަހަޅައިފިއެވެ.

މިމަހު ހަވަނަ ދުވަހު ރައީސް ނަޝީދަށް ދިން ޓެރަރިސްޓް ހަމަލާއާ ގުޅިގެން އެ މައްސަލަ ވަނީ 241 ކޮމިޓީން ބަލާފައެވެ. އަދި ކޮމިޓީ ރިޕޯޓް ފާސްކޮށް ހޯމަ ދުވަހުގެ ޖަލްސާއަށް މިރިޕޯޓް ވަނީ ހުށަހަޅާފައެވެ.

Advertisement

ރިޕޯޓުގައި ލަފާދިނުމަށް ފާސްކޮށްފައިވާ ހަކަމުގެ ތެރެއިން އެއް ކަމަކީ ޓެރަރިޒަމްގެ އެފަދަ މައްސަލަތައް ތަހުގީގުކުރުމުގައި މިހާތަނަށް ދިމާވެފައިވާ ގޮންޖެހުންތަކަށް ރިއާޔަތްކޮށް، ރައީސް ނަޝީދަށް ދިން ހަމަލާގެ މައްސަލަ ސީރިއަސް އަދި އަވަސް މައްސަލައެއްގެ ގޮތުގައި ތަހުގީގުކުުރުމަށް ފުލުހުންނަށް ދެންނެވުމެވެ.

މީގެއިތުރުން ހަރުކަށި ފިކުރާ ގުޅޭ އެންމެހައި މައްސަލަތައް އަވަސް އަދި ނަތީޖާ ނެރެވޭ ގޮތަށް ތަހުގީގުކޮށް ފިޔަވަޅު އެޅުމަށް ފުލުހުންނަށް ދެންނެވުމަށްވެސް ކޮމިޓީން ނިންމާފައިވެއެވެ.

ރައީސް ނަޝީދަށް ދިން ހަމަލާގެ ތަހުގީގާ ގުޅިގެން ކޮމިޓީގެ ފަރާތުން ފުލުހުންނަށް ދަންނަވަން ޖެހޭ ކަމަށް ނިންމާފައިވާ ނިންމުންތަކަކީ:

- އެމައްސަލައިގެ ހެކީގެ ގޮތުގައި ބޭނުންކުރެވިދާނެ ހެކި ނައްތާލުމުގެ ކުރިން މައްސަލައަށް ބޭނުންވާ ހެކި ހޯދުން

- މައްސަލައިގެ ތަހުގީގު ކުރިޔަށްދާއިރު ކަމާގުޅުންހުރި ބޭރުގެ ފަންނީ އަދި ގާބިލް ބޭފުޅުންގެ އެހީތެރިކަން ހޯދައިގެން ތަހުގީގުކުރިޔަށް ގެންދިޔުން

- ތަހުގީގު ކުރިޔަށްދާ މިންވަރަކުން ތަހުގީގާގުޅޭ އެންމެހައި ކަންކަން ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީ އާ ހިއްސާކުރުން

މީގެއިތުރުން މިމައްސަލަ ތަހުގީގުކުރަމުން ދާއިރު ކޮމިޓީން އެކަން ގާތުން ބަލަމުން ދިޔުމަށްވެސް ވަނީ ނިންމާފައެވެ.

ރައީސް ނަޝީދުގެ ސެކިޔުރިޓީ ފެއިލްވި ގޮތުގެ ތަހުގީގެއް ހިންގުމަށް މީގެ ކުރިން ކޮމިޓީން ވަނީ ފާސްކޮށްފައެވެ. ކޮމިޓީ ރިޕޯޓުގައި ބުނެފައިވަނީ އެ ކަމުގައި ކޮމިޓީގެ މެމްބަރުންނާއެކު މަޝްވަރާކުރުމަށްފަހު، ގާނޫނާއި ގަވައިދުތައް ތަންދޭ އެންމެ ފުޅާދާއިރާއެއްގައި އެ ތަހުގީގު ކުރިއަށް ގެންދިޔުމަށެވެ.

ރައީސް ނަޝީދަށް ދިން ޓެރަރިސްޓް ހަމަލާއާ ގުޅިގެން ލިބިވަޑައިގެންނެވި ޒަޚަމްތަކަށް އޭޑީކޭ ހޮސްޕިޓަލްގައި ފަރުވާ ހޯއްދެވުމަށްފަހު މިހާރު ގެންދަވަނީ ޖަރުމަނުވިލާތުގައި ފަރުވާ ހޯއްދަވަމުންނެވެ.