ޖާބިރުގެ ނަން އިއްވައި ތަޅުމުން ބޭރުކޮށްފި
17 މެއި 2021 | ހޯމަ 06:43ޖާބިރު ވަނީ ތަކުރާރުކޮށް ނިޒާމީ ނުކުތާ ނަންގަވައި ވާހަކަދައްކަވާފައި
ކާށިދޫ ދާއިރާގެ މެމްބަރ އަބްދުﷲ ޖާބިރު
މިހާރު ކުރިއަށްދާ މި އަހަރުގެ ދެވަނަ ދައުރުގެ ފުރަތަމަ ޖަލްސާގައި ކާށިދޫ ދާއިރާގެ މެމްބަރ އަބްދުﷲ ޖާބިރުގެ ނަން އިއްވައިފިއެވެ.
މަޖިލީހުގެ ނައިބު ރައީސް އީވާ އަބްދުﷲ ރިޔާސަތު ބަލަހައްޓަވަމުން ގެންދަވާ ޖަލްސާ ފެށުނީއްސުރެ ކަހަލަ ގޮތަކަށް ޖާބިރު ގެންދެވީ ނިޒާމީ ނުކުތާ ނަންގަވައި ތަޅުމުގައި އަޑުގަދަކުރައްވަމުންނެވެ. ޖާބިރު ވިދާޅުވަމުން ގެންދެވީ "މަޖިލީހުގެ ތަޅުމުގައި ވަގުން ތިބިއިރު ވަގުންނައިގެން ޖަލްސާ ކުރިއަށް ނުގެންދެވޭނެކަމަށެވެ. އެކި މެމްބަރުން ވާހަކަދައްކަވަމުން ގެންދެވިއިރު ނިޒާމީ ނުކުތާ ނަންގަވައި ތަކުރާރުކޮށް އެވާހަކަ ދައްކަވަމުން ގެންދެވިއެވެ. އަދި މެމްބަރުން ވާހަކަދައްކަވަމުން ގެންދަވާއިރުވެސް ތަޅުމުގައި އަޑުގަދަ ކުރައްވަމުން ގެންދެވިއެވެ.
ޖާބިރު މިމޭރުމުން އަޑުގަދަކުރެއްވިއިރު ދާދިފަހުން މަޖިލީހުން އާންމުކުރި އެމްއެމްޕީއާރުސީގެ ބޮޑު ޚިޔާނާތުގެ ލިސްޓުގައި މިހާރު ހިނގަމުންދާ މަޖިލީހުގެ 16 މެންބަރެއްގެ ނަން ވަނީ ހިމެނިފައެވެ.
ޖާބިރު އަޑުގަދަ ކުރައްވާތީ ރިޔާސަތުގައި އިންނެވި މަޖިލީހުގެ ނައިބު ރައީސް ވަނީ ޖަލްސާ ކުރިޔަށް ގެންދިޔުމުގެ ފުރުސަތު ދެއްވުމަށް ތަކުރާރުކޮށް އެދިވަޑައިގެންފައެވެ. ނަމަވެސް ޖާބިރު ގެންދެވީ ތަޅުމުގައި އަޑުގަދަކުރައްވަމުންނެވެ. އެންމެފަހުން އީވާ ވަނީ ޖާބިރުގެ ނަން އިއްވާފައެވެ.
ދެވަނަ ދައުރުގެ ފުރަތަމަ ޖަލްސާގައި މިހާރު ކުރިޔަށްދަނީ ނައިފަރު ދާއިރާގެ މެމްބަރ އަހުމަދު ޝިޔާމް ހުށަހަޅުއްވާފައިވާ ކުއްލި މައްސަލައިގެ ބަހުސެވެ. މިމައްސަލައަކީ އިސްރާއީލުން ފަލަސްތީނުގެ ރައްޔިތުންނަށް އަމާޒުކޮށް ދެމުންގެންދާ ހަމަލާތަކާ ގުޅިގެން އެކަން ކުށްވެރިކުރުމުގެ ގޮތުން އަމަލީ ފިޔަވަޅުތަކެއް އެޅުމަށް ސަރުކާރަށް ގޮވާލާ ހުށަހަޅުއްވާފައިވާ ކުއްލި މައްސަލައެވެ.
މިޖަލްސާގެ އެޖެންޑާގައި ވަނީ ދެ ކަމެކެވެ. އެއީ ރިޔާސަތުން ހުށަހަޅުއްވާ ކަމެއްގެ ގޮތުގައި ރައީސް ނަޝީދު އަވަހާރަކޮށްލުމަށް ދެވުނު ހަމަލާއާ ގުޅިގެން ރިޔާސަތުން ހުށަހަޅާ މައްސަލައިގެ އިތުރުން ރައީސް ނަޝީދަށް ދިން ހަމަލާއާގުޅޭ ހާއްސަ މައްސަލަ ދިރާސާކުރުމަށް މަޖިލީހުގެ ސަލާމަތީ ޚިދުމަތްތަކާބެހޭ ކޮމިޓީ (241 ކޮމިޓީ) ން މައްސަލަ ނިންމިގޮތުގެ ރިޕޯޓު ވަނީ އެޖެންޑާކޮށްފައެވެ.
