ރައީސް ނަޝީދުގެ މެސެޖް "މަސްއޫލިއްޔަތު އަދާކުރުންމަތީ ހިތްވަރާއެކު ދެމިހުންނާނަން"
މިފަދަ މިނުރައްކާތެރި ބިރުވެރި ހާލަތުގައިވެސް މެމްބަރުން މަސްއޫލިއްޔަތު އަދާކުރުމުގައި ފަސްޖެހުމެއްނެތި މަސައްކަތްކުރައްވާނެ ކަމަށް ވިދާޅުވި
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
މެއި މަހުގެ 6 ވަނަ ދުވަހު ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ދިން ޓެރަރިސްޓް ހަމަލާގައި ލިބިވަޑައިގެންނެވި ޒަޚަމްތަކަށް ޖަރުމަނުވިލާތުގައި ފަރުވާ ހޯއްދަވަމުން ގެންދަވާއިރު، ހޯމަ ދުވަހު ފެށި ރައްޔިތުންގެ މަޖިލީހުގެ މިއަހަރުގެ ދެވަނަ ދައުރުގެ ޖަލްސާއަށް ޚާއްސަ މެސެޖެއް ފޮނުއްވައިފިއެވެ.
ޖަލްސާއަށް ރައީސް ނަޝީދު ފޮނުއްވެވި ޚާއްސަ މެސެޖް ތަޅުމުގައި އިއްވަވައި ދެއްވީ އަމީން އާންމު ފާތުމަތު ނިއުޝާއެވެ. ހަމަލާއަށްފަހު ރައީސް ނަޝީދު ދެއްވި ފުރަތަމަ މެސެޖް ފައްޓަވަމުން ފިތުރު އީދުގެ ތަހުނިޔާ މަޖިލީހުގެ މެމްބަރުންނާއި ރާއްޖޭގެ ރައްޔިތުންނަށް އަރިސްކުރައްވާފައިވެއެވެ. އަދި ދެވަނަ ދައުރަށް މެމްބަރުންނަށް މަރުޚަބާ ވިދާޅުވެފައިވެއެވެ.
އެއަށްފަހު ވިދާޅުވެފައިވަނީ މަޖިލީހުގެ މިދައުރުގެ މަސައްކަތް ފެށިގެން މިދަނީ އެމަނިކުފާނުގެ ފުރާނަފުޅު ދުއްވާލުމުގެ ނިޔަތުގައި ނުރައްކާތެރި ހަމަލާއެއް ދެވިފައި ވަނިކޮށްކަމަށެވެ. އަދި މިފަދަ ނުރައްކާތެރި ބިރުވެރި ހާލަތުގައި ވެސް ރައްޔިތުންގެ މަޖިލީހުގެ މަސްއޫލިއްޔަތު އަދާކުރުމުގައި އެއްވެސް ފަސްޖެހުމެއްނެތި ހީވާގިކަމާއެކު މެމްބަރުން މަސައްކަތްކުރައްވާނެ ކަމާމެދު އެމަނިކުފާނު ޝައްކެއް ނުކުރައްވާ ކަމަށް ވިދާޅުވިއެވެ.
ރައީސް ނަޝީދަށް އަމާޒުކޮށް ދިން ޓެރަރިސްޓް ހަމަލާގައި ލިބިވަޑައިގެންނެވި ޒަޚަމްތަކަށް އޭޑީކޭގައި ވަނީ ފަރުވާ ހޯއްދަވާފައެވެ. އެގޮތުން 16 ގަޑިއިރަށް ދިގުދެމިގެންދާ ގޮތަށް 3 އޮޕަރޭޝަނެއް ކޮށްފައިވެއެވެ. އަދި މިހާރުވަނީ އިތުރު ފަރުވާއަށް މިމަހުގެ 13 ވަނަ ދުވަހު ޖަރުމަނުވިލާތަށް ވަޑައިގެންފައެވެ.
ދެ ވަނަ ދައުރުގެ ޖަލްސާތައް ހޯމަ ދުވަހު ފަށާފައިވާއިރު ފުރަތަމަ ޖަލްސާއަށް އެޖެންޑާކޮށްފައިވަނީ ވަނީ ދެ ކަމެކެވެ. އެއީ ރިޔާސަތުން ހުށަހަޅުއްވާ ކަމެއްގެ ގޮތުގައި ރައީސް ނަޝީދު އަވަހާރަކޮށްލުމަށް ދެވުނު ހަމަލާއާ ގުޅިގެން ރިޔާސަތުން ހުށަހަޅާ މައްސަލައިގެ އިތުރުން ރައީސް ނަޝީދަށް ދިން ހަމަލާއާގުޅޭ ހާއްސަ މައްސަލަ ދިރާސާ ކުރުމަށް މަޖިލީހުގެ ސަލާމަތީ ހިދުމަތްތަކާބެހޭ (241) ކޮމިޓީން ނިންމިގޮތުގެ ރިޕޯޓެވެ.
މިހާރު ކުރިޔަށްދަނީ ނައިފަރު ދާއިރާގެ މެމްބަރ އަހުމަދު ޝިޔާމް ހުށަހަޅުއްވާފައިވާ ކުއްލި މައްސަލައިގެ ބަހުސެވެ. މިމައްސަލައަކީ އިސްރާއީލުން ފަލަސްތީނުގެ ރައްޔިތުންނަށް އަމާޒުކޮށް ދެމުންގެންދާ ހަމަލާތަކާއި ގުޅިގެން އެކަން ކުށްވެރިކުރުމުގެ ގޮތުން އަމަލީ ފިޔަވަޅުތަކެއް އެޅުމަށް ސަރުކާރަށް ގޮވާލާ ހުށަހަޅުއްވާފައިވާ ކުއްލި މައްސަލައެވެ.
