ފުވައްމުލައް ސިޓީގެ ނަރުދަމާ ނިޒާމުގެ މައްސަލައަށް މިހާރުން މިހާރަށް ގެނެވޭ އަވަސް ހައްލެއް ހޯދުން ފެނަކަ ކޯޕަރޭޝަނަށް އަދި ދާއިިމީ ހައްލެއް ހޯދުން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމްޓީސީސީއާ ހަވާލުކޮށްފިއެވެ.
ރާއްޖެއެމްވީއަށް މައުލޫމާތު ދެއްވަމުން ރައީސް އޮފީހުގެ ތަރުޖަމާނު މުހައްމަދު މަބްރޫކް އަޒީޒް ވަނީ މިހާރު ރާއްޖެއަށް ކުރަމުންދާ ވިއްސާރައިގައި އެންމެ ބޮޑު ގެއްލުމެއް ލިބިފައިވަނީ ފުވައްމުލަކަށް ކަން ފާހަގަކުރައްވާފައެވެ. އެ ސިޓީއަށް މިވަގުތު ކޮންމެހެން ބޭނުންވާ ވަސީލަތްތައް ފޮނުވުމުގެ އިންތިޒާމު ހަމަޖެހިފައިވާކަމަށާއި ގޭގެއާއި މަގުމަގުން ފެން ހިންދުމަށްޓަކައި 6 ޕަމްޕު އާދީއްތަ ދުވަހު ފުވައްމުލަކަށް ކަނޑުމަގުން ފުރުވާލެނެކަމަށް މަބްރޫކް ވިދާޅުވިއެވެ. މިހާރު ފޮނުވާ 6 ޕަމްޕުގެ ތެރެއިން ފަސް ޕަމްޕަކީ ނެޝަނަލް ޑިޒާސްޓަރ މެނޭޖްމެންޓް އޮތޯރިޓީން ދޭ ޕަމްޕުކަމަށާއި، އަނެއް ޕަމްޕަކީ މާލެ ވޯޓަރ އެންޑް ސިވަރެޖް ކޮމްޕެނީގެ ޕަމްޕެއް ކަމަށް މަބްރޫކް ވިދާޅުވިއެވެ.
މިހާރު ކުރަމުންދާ ވިއްސާރައިގެ ސަބަބުން އެންމެ ބޮޑު ގެއްލުމެއް ވެފައިވަނީ ފުވައްމުލައް ސިޓީއަށް ކަމަށް އެންޑީއެމްއޭއިން ބުނެއެވެ. އެގޮތުން 291 ގެއަކަށް ފެންވަދެގެން ރިޕޯޓުކޮށްފައިވެއެވެ. މީގެތެރެއިން 119 ގެއެއްގައި 392 ވެލިބަސްތާ ޖަހާފައިވާ ކަމަށާއި 4 ގެއެއްގެ މުދާ ރައްކާތެރި ހިސާބުތަކަށް ގެންގޮސްފައިވެއެވެ. ފެން ހިންދުމުގެ މަސައްކަތް މިހާރުވެސް ދަނީ ކުރިއަށެވެ.
ބޯކޮށް ވާރޭވެހި ފެންބޮޑުވުމުގެ ހާދިސާތައް އާންމުކޮށް ކުރިމަތިވާ ފުވައްމުލަކުގައި، ފަހަކަށް އައިސް ކުރިމަތިވާ އެންމެ ބޮޑު މައްސަލައަކީ ވާރޭ ވެހުމުގެ ސަބަބުން ނަރުދަމާ ނިޒާމުގައި މައްސަލަޖެހި ނަޖިސްފެން ބޭރުވުމެވެ. މިފަހަރުވެސް މި މައްސަލަ ކުރިމަތިވެ، ބައެއް ގޭގޭގެ ފާޚާނާއިން ނަޖިސްފެން ބޭރުވެ، ރަށުގެ ފެން ތަޣައްޔަރު ވެފައި ވާކަމަށް ސިޓީ ކައުންސިލުން ރާއްޖެ އެމްވީއަށް ވަނީ މަޢުލޫމާތުދީފައެވެ. މާރޗު މަހުގެ ފަހުކޮޅު ކުރި ވިއްސާރާގައި ވެސް ރަށުގެ ފެން ތަޣައްޔަރުވުމުގެ ސަބަބުން ވަޅުފެން ކްލޮރިނޭޓް ކުރުމުގެ މަސައްކަތް ސިޓީ ހޮސްޕިޓަލުން ވަނީ ކޮށްފައެވެ.
މި މައްސަލައަށް ހައްލު ހޯދުމަށްވެސް އަވަސް ފިޔަވަޅުތަކެއް ވަނީ އަޅާފައެވެ. އެގޮތުން ފުވައްމުލަކު ނަރުދަމާ ނިޒާމުގެ މައްސަލައަށް މިހާރުން މިހާރަށް ގެނެވޭ އަވަސް ހައްލެއް ހޯދުމަށް ފެނަކަ ކޯޕަރޭޝަނާއި ވަނީ ހަވާލުކޮށްފައެވެ. ފުވައްމުލަކުގައި ކުރީގެ ސަރުކާރުން އަޅާފައިވާ ނަރުދަމާ ނިޒާމުގައި ހުރި ބޮޑެތިި މައްސަލަތައް ހައްލުނުވާތީ އެމްޓީސީސީން ފުވައްމުލަކުގެ މަގުތައް ޒަމާނީފެންވަރަށް ތަރައްގީކުރާއިރު ރަނގަޅަށް މަސައްކަތްކުރާ ފުރިހަމަ ނަރުދަމާ ނިޒާމެއްވެސް ތަރައްގީކުރުމަށް ވަނީ ނިންމާފައެވެ.
ފުވައްމުލަކުގައި ގާއިމްކޮށްފައިވާ ނަރުދަމާ ނިޒާމަކީ 2018 ވަނަ އަހަރު ބޭއްވި ރިޔާސީ އިންތިޚާބާ ދިމާކޮށް ކުރީގެ ސަރުކާރުން ނިންމާފައިވާ މަޝްރޫއެކެވެ. އޮކްޓޯބަރު 10، 2016 ވަނަ ދުވަހު އިފްތިތާހުކުރި މި މަޝްރޫއު ސެޕްޓެމްބަރު 14، 2018 ވަނަ ދުވަހު ރަސްމީކޮށް އޭރުގެ ސަރުކާރުން ފެށިނަމަވެސް އެ ނިޒާމުން ބޮޑެތި މައްސަލަތަކެއް ވަނީ ފެންމަތިވެފައެވެ.
ފުވައްމުލަކު މަގު ހެދުމުގެ މަޝްރޫއަކީވެސް ކުރީ ސަރުކާރަށް އެކަށޭނަގޮތެއްގައި ކުރިއަށް ނުގެންދެވުނު މަޝްރޫއެކެވެ. ފުވައްމުލަކުގެ ބޮޑެތި މަގުތައް ހަދަން ކުރީގެ ރައީސް އަބްދުﷲ ޔާމީންގެ ސަރުކާރުން ހަވާލުކުރީ އެމްއާރުޑީސީއާ އެވެ. އެކަމަކު އެ މަސައްކަތް ނުކުރެވި އޮތުމުން އާ ސަރުކާރުން ވަނީ މި މަޝްރޫއު އެމްޓީސީސީއާ ހަވާލުކޮށްގެން ކުރިއަށް ގެންދަން ނިންމައިފައެވެ. މިވަރުންވެސް މި މަސައްކަތް ކުރިއަށް ނުގޮސް އޮތީ ހުއްޓިފައެވެ. މައްސަލަ ހައްލުކުރުމަށްޓަކައި މަގު ހެދުމުގެ މަޝްރޫއު ނާއިބުރައީސް ފައިސަލް ނަސީމް ވަނީ 2019 ވަނަ އަހަރު އަލުން އިފްތިތާހުކޮށްދެއްވާފައެވެ.
ނާއިބުރައީސް ވިދާޅުވެފައިވަނީ ރައީސް އިބްރާހިމް މުހައްމަދު ސާލިހާއި އެމަނިކުފާނުގެ ވިސްނުންފުޅަކީ ތަރައްގީގެ މަޝްރޫއުތައް ރައްޔިތުން ބޭނުންވާ ގޮތަށް ކުރިއަށް ގެންދިއުން ކަމަށެވެ. އެގޮތުން ފުވައްމުލަކު މަގު ހެދުމުގެ މަސައްކަތް ކުރިއަށް ދާނީ ރައްޔިތުންގެ ޚިޔާލާއި މަޝްވަރާގެ މަތިން ކަމަށް އެމަނިކުފާނު ވިދާޅުވިއެވެ. ނާއިބުރައީސް ވިދާޅުވީ ފުވައްމުލަކު މަގު ހެދުމުގެ މަޝްރޫއު އަލުން ފެށި އިރު، އެ މަސައްކަތް ކުރިއަށް ދާނީ ރަނގަޅަށް ފަރުމާކޮށްގެން ކަމަށާއި މަގުތައް ހެދުމުގައި އިސްކަން ދޭނެ ތަރުތީބު ފަދަ ކަންކަން ނިންމާނީ ރައްޔިތުން ކަމަށެވެ.
