ސަފާރީ ފީއަށް ގެނައި ބަދަލާއި ގުޅޭ ކުއްލި ބައްދަލުވުމެއް ބާއްވަން ނިންމައިފި

ފުވައްމުލައް ސިޓީގެ ބަނދަރަށް ވަންނަ ސަފާރީތަކުން ނަގާ ފީ ބޮޑުކުރުމާއި ގުޅިގެން ޚިޔާލު ތަފާތުވުންތަކެއް އުފެދިފައިވާތީ މިކަމާއި ގުޅޭ ޚާއްސަ ބައްދަލުވުމެއް ބާއްވަން ފުވައްމުލައް ސިޓީ ކައުންސިލުން ނިންމައިފިއެވެ.  

ރާއްޖެއެމްވީއަށް މަޢުލޫމާތުދެއްވަމުން ފުވައްމުލައް ސިޓީ ކައުންސިލްގެ ސެކްރެޓަރީ ޖެނެރަލް އަސްލަމް ރަޝީދު ވިދާޅުވީ ކައުންސިލްގެ ނިންމުމާމެދު ޚިޔާލު ތަފާތުވެ ގިނަ ބައެއްގެ ޝަކުވާ ލިބެމުން ދިޔުމާއި ގުޅިގެން އެނިންމުން އަލުން މުރާޖަޢާ ކުރުމަށްޓަކައި ކުއްލި ބައްދަލުވުމަކަށް މިހާރު ތައްޔާރުވަމުން އަންނަ ކަމަށެވެ.

އަސްލަމް ވިދާޅުވީ މިއަދުގެ ބައްދަލުވުމުން މިމައްސަލައަށް އެދެވޭ ހެޔޮ ބަދަލެއް ގެނެވޭނެ ކަމުގެ އުއްމީދު ވަރަށް ބޮޑު ކަމަށެވެ. ފުވައްމުލައް ސިޓީގެ ބަނދަރަށް ވަންނަ ސަފާރީތަކުން ނަގާ ފީ ބޮޑުކުރުމުން، ގިނަ ބަޔަކު ދަނީ އެކަމުގެ ނުރުހުން ފާޅުކުރަމުންނެވެ. ފުވައްމުލައް ސިޓީ ކައުންސިލުން ވަނީ ފުވައްމުލައް ސިޓީގެ ބަނދަރަށް ވަންނަ ސަފާރީތަކުން ނަގަމުން އައި 50 ޑޮލަރުގެ ބަދަލުގައި 500 ޑޮލަރު ނަގަން ނިންމާފައިވާ ނިންމުމަށް އޭޕްރީލް 1އިން ފެށިގެން ޢަމަލުކުރަން ފަށާފައެވެ.

2022 ޖެނުއަރީ 12 ވަނަ ދުވަހު ބޭއްވި ސިޓީ ކައުންސިލްގެ 33 ވަނަ ޖަލްސާއިން ނިންމި މި ނިންމުމަކީ ފުވައްމުލައް ސިޓީގެ ބަނދަރުގެ ޖާގައިގެ ދަތިކަން އޮތުމާއެކު ކޮންމެހެން ބަނދަރަށް ކައިރިކުރަން މަޖުބޫރު އުޅަނދުތައް ފިޔަވައި އެހެން އުޅަނދުފަހަރު އައުން މަދުކުރުމަށް އެޅި ފިޔަވަޅެއް ކަމަށް ސިޓީ ކައުންސިލުން ވަނީ ބުނެފައެވެ.