ބާރުގަދަ ފަރާތްތަކާ ގުޅުން އޮންނަ މީހުން ކުށެއްގެ ތުހުމަތުގައި ހައްޔަރު ކުރިއަސް އެމީހުންގެ ފޮޓޯ އާއި ވަނަވަރު އަދި ބައެއް ފަހަރު ކުށުގެ ރިކޯޑު ވެސް މުއައްސަސާތަކުގެ ވެބްސައިޓުން ޑިލީޓުވާ މަންޒަރު މިއަދު ފެންނަ ކަމަށް ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) ވިދާޅުވެއްޖެ އެވެ.

ހޯމަ ދުވަހުގެ ރައްޔިތުންގެ މަޖިލީހުގެ ޖަލްސާގައި ކުޑޫ ވިދާޅުވީ ރާއްޖޭގައި ކަންކަން އޮތީ ބާރުގަދަ މީހަކާ ނުގުޅި އިންސާފު ނުލިބޭ ހާލަތުގައި ކަމަށެވެ. އަދި މިއަދު ގައުމު މި އޮތް ހާލަތަކީ ލަދުގަންނަން ޖެހޭ ހާލަތެއް ކަމަށް ވެސް މެންބަރު ވިދާޅުވި އެވެ.

މަޖިލީހުގެ ތެރެއިން ވެސް ކަންކަން ނިމި، ނިޒާމުތައް ބައްޓަން ވެގެން ދަނީ ބޮޑެތި ކުށްވެރިންނަށް ސަލާމަތްވެވޭ ގޮތަށް ކަމަށާ ވެރިން ބޭނުންވާ ބަޔަކު ސަލާމަތް ކުރެވޭ ގޮތަށް ކަމަށް ވެސް ކުޑޫ ވިދާޅުވި އެވެ.

ކުޑޫ ވިދާޅުވީ ކަންތައްތައް އެގޮތަށް ވަނީ ކޯޓުތަކާ، ސަރުކާރުގެ އިތުރުން ކަމާ ގުޅުން ހުރި އެކި ފަރާތްތަކާ މުއައްސަސާތަކުން އެކަންކަމަށް ޖާގަ ދޭތީ ކަމަށެވެ. އަދި އެފަދަ ކަންކަން ކުރާ މީހުންނަށް އެ މަގު ފަހި ކޮށްދީ ހިތްވަރު ދޭ ބަޔަކު ތިބޭތީ ކަމަށެވެ.

ރައީސް ޑރ. މުހައްމަދު މުއިއްޒު ވެރިކަމަށް ވަޑައިގަތުމަށް ފަހު ވެސް އެންމެ ބޮޑަށް ދެއްކެވި އެއް ވާހަކައަކީ ޝަރުއީ ދާއިރާ މިނިވަން ކުރާނެ ވާހަކަ ކަމަށާ ޝަރުއީ ނިޒާމަށް ނުފޫޒު ނުފޯރު ވާނެ ވާހަކަ ކަމަށް ކުޑޫ ވިދާޅުވި އެވެ. ނަމަވެސް މިއަދު ފެންނަ މަންޒަރު ތަކުން ކަން ހިނގަނީ އެގޮތަށް ނޫން ކަން ހާމަވާ ކަމަށް މެންބަރު ވިދާޅުވި އެވެ.

ވެރިން ރުހޭ މީހެއް ނަމަ ކޮންމެ ކަމެއް ކުރިއަސް އެއީ މިިނިވަނެއް ކަމަށާ ނުރެހޭ މީހެއް ނަމަ އެމީހަކު ސައިކަލު މަޑިދަށުން ވިޔަސް އެއްޗެއް ނަގައިގެން ވެސް ހައްޔަރު ކުރާ ކަމަށް މެންބަރު ވިދާޅުވި އެވެ. ކުޑޫ ވިދާޅުވީ މިއީ މިއަދު މި ގައުމުން ފެންނަ ހިތާމަވެރި ކަންކަން ކަމަށެވެ.

ކުޑޫ ވިދާޅުވީ ބައެއް ކުށުގެ ތުހުމަތުގައި ހައްޔަރު ކޮށް ވަނަވަރާ ފޮޓޯ އާންމު ކުރާ މީހުންގެ ތެރެއިން ބާރުގަދަ ފަރާތްތަކާ ގުޅުން އޮންނަ މީހުންގެ މައުލޫމާތާ ރިކޯޑު އަދި ފޮޓޯތައް ވެސް މުއައްސަސާތަކުން ޑިލީޓުވާ މަންޒަރު ވެސް މިއަދު ފެންނަ ކަމަށެވެ.

މެންބަރު އެހެން ވިދާޅުވި އިރު މަސްތުވާތަކެއްޗާއި އެކު ހައްޔަރުކުރި ޒުވާނެއްގެ ފޮޓޯ އާންމު ކުރުމަށް ފަހު ސުވާލު އުފެދޭ ގޮތަކަށް އޭނާގެ ފޮޓޯ އާއި މައުލޫމާތު ފުލުހުން ވަނީ ސޯޝަލް މީޑި އާއި ވެބްސައިޓުން ނަގާފަ އެވެ.

އެކަމާއި މެދު އާއްމުންނާއި މީޑިއާއިން ސުވާލުކުރަމުން ދަނިކޮށް ފުލުހުން ބުނެފައި ވަނީ އެ ފޮޓޯ ނެގީ ތަހުގީގު ބޭނުމަށް ކަމަށެވެ. ފުލުހުން ފޮޓޯ ޑިލީޓް ކުރީ ޖޭއެސްސީގެ ރައީސް ހުސްނީ މުބާރަކަށް ބޮޑުބޭބެ ކިޔާ މީހެއްގެ ކަން އޭގެ ފަހުން ވަނީ ހާމަވެފަ އެވެ.

ހައްޔަރު ކުރީ ނ. މަނަދޫ / ރޯޝަނީގެ، ޙަސަން ނާހިލް (18އ) އެވެ. އޭނާ ހައްޔަރުކޮށްފައި ވަނީ ނޮވެމްބަރު މަހުގެ 22 ވަނަ ދުވަހު ހުޅުމާލެތެރެ ޕެޓްރޯލް ކުރުމުގެ ތެރެއިންނެވެ.

ފުލުހުން މިފަދައިން ބުނެފައިވާ އިރު، "މަސްތުވާތަކެއްޗާ އެކު ހުޅުމާލެ އިން މީހަކު ހައްޔަ ރުކޮށްފި" މި ސުރުހީގެ ދަށުން ފުލުހުންގެ ވެބްސައިޓް "ޕޮލިސް ލައިފް" ގައި ލިޔެފައިވާ ހަބަރު ފޮޓޯއާއެކު ސޯޝަލް މީޑިއާގައި ފޮޓޯ އާއްމު ކޮށްފައި ވެއެވެ.

ޕޯސްޓްތައް ފުލުހުން ޑިލީޓް ކުރި މައްސަލައިގައި ފުލުހުން ބުނީ އެކަން ކުރީ ތަހުގީގު ބޭނުމަށް ކަމަށެވެ. އަދި އެކަމާއި ގުޅޭ އިތުރު ތަފްސީލެއް ފުލުހުން ދީފަ އެއް ނުވެ އެވެ. އޭނާ ހައްޔަރު ކުރި މައްސަލަ އާއި އަތުލައިގަތް މަސްތުވާތަކެއްޗާއި އަދި ގުޅުންހުރި މައުލޫމާތު ވެސް ފުލުހުން ހާމަކޮށްފަ އެއް ނުވެ އެވެ.

ފުލުހުންގެ ޕޯސްޓްތައް ޑިލީޓް ކޮށްފައިވާ އިރު، ކްރިމިނަލް ކޯޓުގެ ވެބްސައިޓުގައި ވެސް އޭނާގެ ބަންދުގެ މުއްދަތު ޖަހާފައިވާ ބަންދު އަމުރު ފެންނަން ނެތްކަން ފާހަގަކޮށްލެވެ އެވެ. އޭނާ ހައްޔަރު ކުރީ 22 ވަނަ ދުވަހުގައި ކަމަށް ފުލުހުން ބުނެފައިވާ އިރު، އެ ދުވަހުވެސް އަދި 23 ވަނަ ދުވަހު ވެސް ކްރިމިނަލް ކޯޓުގެ ބަންދު އަމުރުތަކުގައި އޭނާގެ އަމުރު ފެންނަން ނެތެވެ.