ފްރާންސްގެ ވެރި ރަށް ޕެރިހުގައި އެންމެ މަޝްހޫރު ދާރުލްއާސާރު ކަމަށްވާ ލޫޚަވް އިން ވައްކަން ކުރި މައްސަލައިގައި އިތުރު ފަސް މީހަކު ހައްޔަރު ކޮށްފި އެވެ.

ޕެރިހުގެ ޕްރޮސެކިއުޓަރ ބުރާސްފަތި ދުވަހު ވިދާޅުވެފައި ވަނީ، ހައްޔަރު ކުރި ފަސް މީހުންގެ ތެރެގައި އެ މައްސަލައިގައި އެންމެ މައިގަނޑު ތުހުމަތު ކުރެވޭ މީހާ ވެސް ހިމެނޭ ކަމަށެވެ. ޕްރޮސެކިއުޓަރ ލޯރާ ބެކޯ ވިދާޅުވީ، އެ ޚިޔާނާތުގައި ގެއްލުނު 102 މިލިއަން އެމެރިކާ ޑޮލަރުގެ އަގުހުރި ޒީނަތްތެރި ތަކެތީގެ ތެރެއިން އެއްވެސް އެއްޗެއް ހޯދިފައި ނުވާ ކަމަށެވެ.

ބެކޯ ވިދާޅުވެފައި ވަނީ މައްސަލައިގެ މައިގަނޑު ތުހުމަތު ކުރެވޭ މީހާގެ ޑީއެންއޭ އިން، އެ މައްސަލައިގައި އޭނާ ހިމެނޭ ކަމުގެ ހެކިތައް ލިބިފައިވާ ކަމަށެވެ. އެކަމުން ދޭހަ ވަނީ، މި ހިނގާ އޮކްޓޫބަރު މަހުގެ 19 ވަނަ ދުވަހު ހިނގި މި ހާދިސާ ގައި ބައިވެރިވެރި ހަތަރު މީހުންގެ ޓީމުގައި އޭނާ ހިމެނޭ ކަމުގައެވެ.

އިތުރަށް ބެކޯ ވިދާޅުވެފައި ވަނީ، މައްސަލައިގެ ތުހުމަތުހައި ހައްޔަރު ކޮށްފައިވާ މީހުންގެ އިތުރު ތަފްސީލް ހާމަ ކުރަން މިވަގުތު އަދި މާ އަވަސް ކަމަށެވެ. ހަމަ އެހެންމެ، ފުލުހުންގެ ބެލުމުގެ ދަށުގައި ތިބި އެހެން މީހުންނަކީ، އެ ހާދިސާ ހިނގި ގޮތުގެ މައުލޫމާތު އިނގޭ، އަދި އެ މައުލޫމާތު ދެވިދާނެ މީހުން ކަމަށް ވެސް ބެކޯ ވަނީ ވިދާޅުވެފަ އެވެ.

މައްސަލައިގެ ތުހުމަތު ކޮށްފައިވާ ފަސް މީހުން ހައްޔަރު ކޮށްފައި ވަނީ، ޕެރިސް އާއި ޕެރިސް ވަށައިގެންވާ ސަރަހައްދު ތަކުން ބުދަ ދުވަހުގެ ވަގުތެއްގަ އެވެ. ޚާއްސަކޮށް، ޕެރިހުގެ ބޭރުގައި ސެއިން ސެއިންޓް ޑެނިސް ސަރަހައްދުން ކަމަށް ހާމަ ކޮށްފައިވެ އެވެ،

މީގެ ކުރިން، މިދިޔަ ހޮނިހިރު ދުވަހު ވެސް ވަނީ މި މައްސަލައިގައި ދެ މީހަކު ހައްޔަރު ކޮށްފަ އެވެ. އެ މީހުންނަށް ތުހުމަތު ކޮށްފައި ވަނީ ޚިޔާނާތާއި، ކްރިމިނަލް ކޮންސްޕިރަސީގެ ކުށުގެ ދައުވާ އެވެ. ޕްރޮސެކިއުޓަރުންގެ ބަޔާނުގައި ބުނެފައިވާ ގޮތުން، އެ ދެ މީހުންނާ ދެކޮޅަށް ކޮށްފައިވާ ތުހުމަތުތަކަށް އެ މީހުން ވަނީ ކޮންމެ ވެސް މިންވަރަކަށް އެއްބަސްވެފަ އެވެ.

ދާރުލްއާސާރުން ކުރި ވައްކަމުގައި ގެއްލުނު ތަކެތީގެ ތެރޭގައި ނެޕޯލިއަންގެ ފުރަތަމަ އަނބިކަނބަލުން އިމްޕްރެސް މަރީ ލުއިސް އަށް ހަދިޔާ ކުރި އެމެރަލްޑް، އަދި ޑައިމަންޑު ހަރުކޮށްފައިވާ ހާރެއް ވެސް ހިމެނެ އެވެ. އަދި އިމްޕްރެސް ޔުޖީނީ އަށް ނިސްބަތްވާ، ގާތް ގަނޑަކަށް 2000 ޑައިމަންޑު ހަރުކޮށްފައިވާ ޑައިމަންޑެއް ވެސް މި ހާދިސާގައި ވަގަށް ނަގާފައިވާ ކަމަށް ހާމަ ކޮށްފައިވެ އެވެ.

މި ވައްކަމުގެ ހާދިސާ އަކީ ފްރާންސްގައި މިހާތަނަށް ހިނގި އެންމެ ބޮޑު ވައްކަމުގެ ތެރޭގައި ހިމެނޭ އެއް ހާދިސާ އެވެ. ލޫވްޚަ މިޔުޒިއަމް އަކީ ދުނިޔޭގެ އެންމެ މަޝްހޫރު މިޔުޒިއަމް ތަކުގެ ތެރޭގައި ހިމެނޭ މިޔުޒިއަމް އެކެވެ. އަދި ކޮންމެ އަހަރަކު އެތައް މިލިއަން ފަތުރުވެރިން މި މިޔުޒިއަމް އަށް ޒިޔާރާތް ކުރެ އެވެ. ފުލުހުން މިހާރު މަސައްކަތް ކުރަމުން އަންނަނީ މި ވައްކަމުގެ ހާދިސާގައި ވަގަށް ނަގާފައިވާ ޖަވާހިރުތައް ހޯދުމުގެ މަސައްކަތް ކުރަމުންނެވެ.

އެ ހާދިސާއާ ގުޅިގެން ފްރާންސްގެ އިންޓަ ރޭޑިއޯ އަށް ދެއްވި އިންޓަވިޔުއެއްގައި ޖަސްޓިސް މިނިސްޓަރު ޖެރަލްޑް ދަރްމަނިން ވިދާޅުވީ، ޕެރިހުގެ މެދު ތެރޭގައި ފަރުނީޗަރު އުފުލާ ހޮއިސްޓެއް ބަހައްޓައި، މަދު ވަގުތު ކޮޅެއްގެ ތެރޭގައި އަގު ހުރި ޖަވާހިރު ތަކެއް ވަގަށް ނަގައި، ފްރާންސްގެ ނަން ހަޑި ކޮށްލުމުގެ ފުރުސަތު ލިބުނުކަމީ، ސެކިއުރިޓީ ނިޒާމު ފެއިލްވެފައިވާ ކަމުގެ ހެއްކެއް ކަމަށެވެ.