ރާއްޖޭގައި ހަލާލް ޓޫރިޒަމް ކުރިއަރުވަން، ލުއިތަކާ އެކު ރަށްތަކެއް ދޫކުރަން ހަމަޖެހިފައިވާ ކަމަށް ރައީސް ޑރ.މުހައްމަދު މުއިއްޒު ވިދާޅުވެއްޖެއެވެ.

ހުކުުރު ދުވަހު އެކްސްގައި ކުރެއްވި ޕޯސްޓެއްގައި އެ މަނިކުފާނު ވިދާޅުވީ ހަލާލް ޓުއަރިޒަމްގެ ދާއިރާ ފުޅާކޮށް އާ ހަރުފަތަކަށް ގެންދިއުމަށްޓަކާ ރާއްޖޭގެ ރަށްތަކެއް ދޫކުރަން ނިންމަވާފައިވާ ކަމަށެވެ. އެހެންނަމަވެސް އެކަމަށްޓަކާ ކަނޑައަޅާ ރަށްތަކުގެ އަދަދާއި ގުޅޭ ތަފްސީލެއް އެމަނިކުފާނު ހާމަކުރައްވާފަ އެއް ނުވެއެވެ.

އެ މަނިކުފާނު ވިދާޅުވީ ރާއްޖޭގެ ފަތުރުވެރިކަމަކީ ދުނިޔެ އަށް މަޝްހޫރު ފަތުރުވެރިކަމެއް ކަމަށެވެ. އެހެންކަމުން މިހާރު ބޭނުމީ ހަލާލް ޓުއަރިޒަމްގެ ކުރިއަރާފައިވާ ޤައުމަކަށް ވާން ކަމަށް އެ މަނިކުފާނު ވަނީ ފާހަގަކުރައްވާފައެވެ.

ހަލާލް ޓުއަރިޒަމް އަށް އިންވެސްޓް ކުރާ އިންވެސްޓަރުންނަށް ގިނަ ލުއިތަކެއް ދެއްވާނެ ކަމަށް ވެސް އެ މަނިކުފާނު ވިދާޅުވިއެވެ. އެކަމުގެ ސަބަބުން ދިވެހި ފަތުރުވެރިކަމުގެ ސިނާއަތް އިތުރަށް ޑައިވަރސިފައި ކުރެވޭނެ ކަމަށް ރައީސް މުއިއްޒު ވަނީ ވިދާޅުވެފައެވެ.

އެ މަނިކުފާނު ވިދާޅުވީ އެ މަޝްރޫއާ ގުޅޭ ތަފުސީލުތައް އަންނަ ހަފުތާގައި ޓޫރިޒަމް މިނިސްޓްރީން ހާމަ ކުރާނެ ކަމަށެވެ.