ޢެއްވެސް ޓެކްސް އެއް ބޮޑު ނުކުރައްވާނެ ކަމަށް ރައީސް މުއިއްޒު ވެވަޑައިގެންނެވި ވައުދާ ޚިލާފުވެވަޑައިގަތުމަށްފަހު، ޓެކްސް ބޮޑު ކުރުމަށް ރައްޔިތުންގެ މަޖިލީހަށް ސަރުކާރުން ހުށަހެޅި ބިލުތައް ފާސް ކުރުމަށް ބުރާސްފަތި ދުވަހު ވޯޓަށް އެހުމުން މަޖިލީހުގައި ތިއްބެވި އެމްޑީޕީގެ މެމްބަރުން ޓެކްސް ބޮޑު ކުރުމާ ދެކޮޅު ހައްދަވާ ރަތް ޖައްސަވައިފިއެވެ.

ސަރުކާރު ހިންގާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ސުޕަރ މެޖޯރިޓީ އޮންނަ ރައްޔިތުންގެ މަޖިލީހުން ހުރިހާ ބިލެއްވެސް ފާސް ކުރީ އެއްވެސް އިތުރު އިސްލާހަކަށް ފުރުސަތު ނުދީ ސަރުކާރުން ހުށަހަޅައި ބޭނުންވި ގޮތައްކަން ފާހަގަ ކުރެވެއެވެ.

ބުރާސްފަތި ދުވަހު މަޖިލީހުން ފާސްކުރި އެއް ބިލަކީ ދުންފަތުން ނަގާ އިމްޕޯޓު ޑިއުޓީ ކުރުމަށް އިމްޕޯޓް އެކްސްޕޯޓާ ބެހޭ ގާނޫނަށް އިސްލާހު ގެނައުމުގެ ބިލެވެ.

ފާސްކުރި އިސްލާހުގައިވާ ގޮތުން އިލެކްޓްރޯނިކް ސިނގިރޭޓާއި ދުންފަތުގެ އިސްތިއުމާލު ކުރުމަށް ބޭނުންކުރާ އެ ނޫން ވެސް އާލާތްތަކަށް އަޅާ ފްލޭވަރ އާއި ކެމިކަލުން ނަގާ ޑިއުޓީ 50 އިންސައްތަ އަދި މިލިލީޓަރަކަށް 8 ރުފިޔާ ބޮޑު ވާނެއެވެ.

އަދި ހީޓެޑް ޓޮބެކޯ ޕްރޮޑަކްޓްސް ނުވަތަ ރޯ ކުރުމަކާ ނުލައި ހޫނުކޮށްގެން ބޭނުން ކުރެވޭ ގޮތައް އުފައްދާފައި ހުންނަ ދުންފަތުގެ އުފެއްދުންތަކުން ނަގާ އިމްޕޯޓު ޑިއުޓީ 50 އިންސައްތަ އަދި ސްޓިކަކުން 8 ރުފިޔާ އަށް ބޮޑު ވާނެއެވެ.

އޭގެ އިތުރުން، ސިނގިރޭޓާއި ބިޑިން ނަގާ އިމްޕޯޓު ޑިއުޓީ ވެސް ސިނގިރޭޓަކުން އަދި ބިޑިއަކުން 8 ރުފިޔާ އަށް ބޮޑު ވެގެންދާނެއެވެ.

ވޭޕުން ނަގާ ޑިއުޓީ ބޮޑު ކުރުމަށް ފާސްކުރި އިރު، ރައީސް ޑރ. މުހައްމަދު މުއިއްޒު ނިންމަވާފައި ވަނީ ނޮވެމްބަރު 15ން ފެށިގެން ރާއްޖެ އަށް ވޭޕް އެތެރެކުރުން މަނާކޮށް، ޑިސެމްބަރު 15ން ފެށިގެން ރާއްޖޭގައި ވޭޕް ވިއްކުމާއި ބޭނުންކުރުން މަނާކުރާށެވެ.

އިމްޕޯޓް އެކްސްޕޯޓު ގާނޫނަށް މި ގެނައި ބަދަލުތަކާއެކު މިއަހަރު ސަރުކާރަށް އިތުރު އާމްދަނީގެ ގޮތުގައި 180.3 މިލިއަން ރުފިޔާ ލިބޭނެ ކަމަށް ވަނީ އަންދާޒާ ކޮށްފައެވެ. ސަރުކާރުން އަންދާޒާ ކުރާ ގޮތުގައި ސިނގިރޭޓުގެ އިމްޕޯޓު ޑިއުޓީން އެކަނިވެސް 2025 ވަނަ އަހަރު އާމްދަނީގެ ގޮތުގައި 1،058.7 މިލިއަން ރުފިޔާ ލިބޭނެއެވެ.

ބުރާސްފަތި ދުވަހު ގްރީން ޓެކްސް ދެގުނަ ކޮށް ޓީޖީއެސްޓީ އަދި ޓިޕާޗާ ޓެކްސް ބޮޑު ކުރުމަށް ވެސް ވަނީ ފާސްކޮށްފައެވެ.

2025 ވަނަ އަހަރުގެ ޖުލައި މަހުން ފެށިގެން ޓީޖީއެސްޓީ 16 އިންސައްތަ އިން 17 އިންސައްތަ އަށް ބޮޑު ކުރަން ފާސްކުރުމުގެ އިތުރުން ގްރީން ޓެކްސް ދެ ގުނައަށް ބޮޑު ކުރުމަށްވެސް ވަނީ ފާސްކޮށްފައެވެ.

ގްރީން ޓެކްސް އަށް ގެންނަ ބަދަލުގައިވާ ގޮތުން 50 ކޮޓަރިއަށް ވުރެ ކޮޓަރި މަދު ގެސްޓްހައުސް ތަކުން ގްރީން ޓެކުހުގެ ގޮތުގައި ނަގައި އަދަދު 3 ޑޮލަރުން 6 ޑޮލަރަށް ބޮޑު ވެގެން ދާނެއެވެ. އަދި އެއަށް ވުރެ ބޮޑެތި ގެސްޓްހައުސްތަކާއި ރިސޯޓުތަކުން ނަގައި ގްރީން ޓެކްސް 6 ޑޮލަރުން 12 ޑޮލަރަށް ބޮޑު ވެގެން ދާނެއެވެ.

އެއާޕޯޓުން ފުރާ ފަސިންޖަރުންގެ އަތުން ނަގާ ޓެކްސް ޑިސެމްބަރު 1 ވަނަ ދުވަހުން ފެށިގެން ބޮޑުކުރަން ވެސް ވަނީ މަޖިލީހުން ފާސްކޮށްފައެވެ.

މި ގޮތުން އިކޮނޮމީ ކުލާހުން ފުރާ ބިދޭސީންގެ އަތުން މިހާރު ނަގައި 30 ޑޮލަރު، 50 ޑޮލަރަށް ބޮޑުކުރުމާއި، ބިޒްނަސް ކުލާހުން ފުރާ ދިވެހިންނާއި ބިދޭސީންގެ އަތުން ނަގައި 60 ޑޮލަރު، 120 ޑޮލަރަށް ބޮޑުކުރުމާއި، ފަސްޓް ކުލާހުން ފުރާ ދިވެހިންނާއި ބިދޭސީންގެ އަތުން ނަގައި 90 ޑޮލަރު، 240 ޑޮލަރަށް ބޮޑުކުރުން ހިމެނެއެވެ. މީގެ އިތުރުން، ޕްރައިވެޓް ޖެޓްގައި ފުރާ މީހުންގެ އަތުން ނަގައި 120 ޑޮލަރު، 480 ޑޮލަރަށް ބޮޑުކުރަންވެސް ވަނީ މިގެންނަ ބަދަލުގެ ތެރޭގައި ހިމަނާފައެވެ.

ޓެކްސް ބޮޑު ކުރަން ސަރުކާރުން ހުށަހެޅި ބިލުތައް ފާސްކުރުމަށް 71 މެންބަރުން ވޯޓު ދެއްވިއެވެ. ބިލާ ދެކޮޅަށް އެމްޑީޕީ އަށް ނިސްބަތްވެވަޑައިގަންނަވާ 8 މެމްބަރުން ވަނީ ވޯޓު ދެއްވާފައެވެ.

ރިޔާސީ އިންތިޚާބުގައި ޑރ. މުއިއްޒު ރައްޔިތުން ގާތު ވިދާޅުވީ، އެމަނިކުފާނުގެ ވެރިކަމެއްގައި އެއްވެސް ޓެކްސް އެއް ބޮޑު ނުކުރައްވާނެ ކަމަށާއި، އެމަނިކުފާނު ކުރައްވާނެ ކަމަކީ ޓެކްސް ބޭސް ފުޅާކުރެއްވުން ކަމުގައެވެ.