އީރާނުން އިސްރާއީލަށް ހޯމަ ދުވަހުގެ ރޭ ދިން ހަމަލާތަކުގެ ޓާގެޓް ތަކުގެ ތެރޭގައި ވައިގެ ބަނދަރުތަކާއި އީރާނުގެ ޖާސޫސީ މައި އިދާރާ މޮސާޑް ހިމެނޭ ކަމަށް ސީއެންއެން އިން ބުނެފިއެވެ.

އިސްރާއީލުގެ ބައިނަލް އަގްވާމީ ޖާސޫސީ ޚިދުމަތަކުގެ މައި އިދާރާ މޮސާޑް ގެ ހެޑްކޯޓަރު އަކީ ތެލް އަވީވްގެ އުތުރު ސަރަހައްދުގައި ގާއިމު ކޮށްފައިވާ މަރުކަޒެކެވެ.

އިސްރާއީލުގެ ބްރޯޑްކާސްޓިންގ އޮތޯރިޓީން ބުނެފައިވަނީ ގިނަ މިސައިލްތަކެއް ހުސް ސަރަހައްދުތަކަށް ވެއްޓި، ޝެލްޓަރުތަކަށް ވަންނަން ދިޔަ އިސްރާއީލީން ތެރެއިން ގިނަ ބަޔަކަށް އަނިޔާވެފައިވާ ކަމަށެވެ.

އަލް ޖަޒީރާ އިން ބުނެފައިވަނީ މިހާތަނަށް އެންމެ ބޮޑު ގެއްލުމެއް ލިބިފައިވާ ކަން އެނގިފައިވަނީ ހައިފާ ގެ ކޮމާޝަލް ބަނދަރަށެވެ. އެތަނުގެ ރިފައިނަރީ އަށް ލިބުނު ބޮޑު ގެއްލުމުގެ ސަބަބުން ރިފައިނަރީގެ މަސައްކަތްތައް ވަނީ ހުއްޓާލަން ޖެހިފައެވެ. މިއީ އިސްރާއީލުގައި ހުންނަ ދެ ރިފައިނަރީގެ ތެރެއިން އެއް ތަނެވެ. އިސްރާއީލުން ޕެޓްރޯލް، ޑީސަލް އަދި ޖެޓް ފިއުލްގެ ބޮޑު ބައެއް ރިފައިން ކުރަނީ މިތަނުންނެވެ. އަދި މިކަމުގެ ސަބަބުން އިސްރާއީލަށް ވަރަށް ބޮޑު ދަތިތަކާއި އުނދަގޫތަކާ ކުރިމަތިލާން ޖެހޭނެ ކަމަށް އަލް ޖަޒީރާ އިން ބުނެފައިވެއެވެ.

އަލް ޖަޒީރާ ގެ ރިޕޯޓަރު ބުނެފައިވަނީ އިސްރާއީލު މީހުންނަށް ވޭތުވެދިޔަ 40 ނުވަތަ 50 އަހަރުގެ ތެރޭގައި ވެސް މިފަދަ ނުރައްކަލެއް ތަޖުރިބާކުރަން ޖެހިފައި ނުވާ ކަމަށެވެ. އެހެން ކަމުން މިކަމަކީ ގިނަ މީހުންނަށް ކުއްލި ސިހުމެއް ގެނުވި ކަމެއް ކަމަށް ބުނެފައިވެއެވެ.

އަންމާނު ގައި ހުންނަ އަލްޖަޒީރާގެ ރިޕޯޓަރު އިތުރަށް ބުނީ އިސްރާއީލުގެ ރައްޔިތުންނަށް މިހާރު ވަނީ އެމީހުން ތިބީ ވަރަށް ނުރައްކާތެރި ހާލަތެއްގައިކަން އިހުސާސް ކުރެވިފައި ކަމަށެވެ.

ބައިނަލް އަގްވާމީ މީޑިއާ ތަކަށް ހަނގުރާމައިގެ މައުލޫމާތު ގެނެސް ދިނުމުގައި އިސްރާއީލު ސަރުކާރުން ވަނީ ވަރަށް ބޮޑު ހުރަސްތައް ކުރިމަތި ކޮށްފައެވެ. އަލް ޖަޒީރާ އިސްރާއީލުގައި މަނާ ކޮށްފައިވާތީ އެ ސްޓޭޝަނުން ރިޕޯޓު ކުރަނީ އުރުދުންގެ ވެރިރަށް އައްމާނުން ނެވެ.

އީރާނުގެ ހަމަލާތަކުގައި އެތައް ތަނެއްގައި ރޯވެފައިވާ މަންޒަރުތައް ވަނީ އާންމު ވެފައެވެ. ސީދާ ހަމަލާތައް އަމާޒުވެފައިވާކަމަށް ރިޕޯޓު ކޮށްފައި ވަނީ އިސްރާއީލުގެ ތެލް އަވީވު ސަރަހައްދަށާއި ހާރޒިލިޔާ އަށެވެ.

އިސްރާއީލުގެ އަސްކަރިއްޔާ އިން ވަނީ އެ ސަރަހައްދުގެ މަންޒަރުތަކާއި މަޢުލޫމާތު ޝާއިޢު ކުރުން މަނާ ކޮށްފައެވެ. ހަމަލާ އަމާޒުވި ސަރަހައްދު ކަނޑައަޅާފައިވަނީ ސެންސިޓިވް ސަރަހައްދެއްގެ ގޮތުގައެވެ - މިއީ އާންމުކޮށް އިސްރާއީލުގެ އަސްކަރިއްޔާ އިން ސެންސަރު ކުރަން ބޭނުންވާ މުހިންމު ތަންތަން ދަރަޖަ ކުރާ ގޮތެއް ކަމަށް އަލް ޖަޒީރާ އިން ބުނެފައިވެއެވެ.

ހޯމަ ދުވަހުގެ ރޭގެ ވަގުތުތަކުގައި، މަޢުލޫމާތު ހިފެހެއްޓުމުގެ ފިޔަވަޅުތައް ވަނީ އިތުރަށް ހަރުކަށިކޮށްފައެވެ. އެހެންކަމުން މަޢުލޫމާތު ޔަޤީންކުރުމަކީ އުނދަގޫ ކަމެއް ކަމަށް އަލް ޖަޒީރާ އިން ބުނެއެވެ.

އެހެންނަމަވެސް، އީރާނުގެ އައި.އާރް.ޖީ.ސީން ފަހުން ނެރުނު ބަޔާނެއްގައި ބުނެފައި ވަނީ އެމީހުންގެ ހަމަލާ އަމާޒު ކޮށްފައި ވަނީ ހަރޒިލިޔާގައި ހުރި އިންޓެލިޖެންސް އިމާރާތްތަކަށާއި، މޮސާޑް އަދި އަމަން މިލިޓަރީ އިންޓެލިޖެންސް އަށް ކަމަށެވެ.

އެހެން ނަމަވެސް އިސްރާއީލުގެ ފަރާތުން އެކަމަށް އަދި ރައްދެއް ދީފައެއް ނުވެއެވެ.

އަލް ޖަޒީރާ ގެ ރިޕޯޓަރު ބުނެފައިވަނީ އިސްރާއީލު މީހުންނަށް ވޭތުވެދިޔަ 40 ނުވަތަ 50 އަހަރުގެ ތެރޭގައި ވެސް މިފަދަ ނުރައްކަލެއް ތަޖުރިބާކުރަން ޖެހިފައި ނުވާ ކަމަށް