ރަޝިޔާ އިން އީރާނުގެ އެއަރ ޑިފެންސް ސައިޓްތަކާ ބެހޭ މަޢުލޫމާތު އިސްރާއީލަށް ދިންކަމަށް އިރާނުގެ އިސް އޮފިޝަލަކު ތުހުމަތުކޮށްފިއެވެ.

އީރާނުގެ އެކްސްޕީޑިއެންސީ ޑިސަރންމަންޓް ކައުންސިލްގެ މެންބަރު މުޙައްމަދު ސަދުރު، އާދީއްތަ ދުވަހުގެ ރޭ ނޫސްވެރިންނަށް ދެއްކި ވާހަކައިގައި ރަޝިޔާ އިން އީރާނުގެ އެއަރ ޑިފެންސް ސައިޓްތަކާ ބެހޭ މަޢުލޫމާތު އިސްރާއީލަށް ދީފައިވާ ކަމަށް ވިދާޅުވިއެވެ.

ފާއިތުވި ޖޫން މަހު އީރާނާއި އިސްރާއީލާ ދެމެދު ހިނގި 12 ދުވަހުގެ ހަނގުރާމަ އަށް އިޝާރާތް ކުރަމުން މި ހަނގުރާމައިން ސާބިތުވީ މޮސްކޯ އާއެކު އޮތް ސްޓްރެޓެޖިކް ގުޅުމުގެ އެއްވެސް އަގެއް ނެތްކަން ކަމުގައި އޭނާ ހާމަ ކުރެއްވިއެވެ.

އޭގެ އިތުރުން އޭނާ ހާމަ ކުރެއްވި ގޮތުގައި، އީރާނުގެ ކުރީގެ ރައީސް އިބްރާހިމް ރައީސީ އަވަހާރަކޮށްލީ އިސްރާއީލުންނެވެ.

"ފުރަތަމަ ވަގުތުން ފެށިގެން އަޅުގަނޑު ބުނިން މިއީ... އޭނާ އަވަހާރަ ކޮށްލީ އިސްރާއީލުންނޭ،" ރައީސީ ދަތުރުކުރެއްވި މަތިންދާ ބޯޓު ވެއްޓުނު ހާދިސާ އަށް އިޝާރާތް ކުރައްވާ އޭނާ ވިދާޅުވިއެވެ.

މިއަހަރުގެ ކުރީކޮޅު، އިސްރާއީލުން އީރާނުގެ އަސްކަރީ ތަންތަނަށް ގިނަ ހަމަލާތަކެއް ދީ، އިސް އަސްކަރީ ކޮމާންޑަރުންނާއި ނިއުކްލިއަރ ސައިންޓިސްޓުން އަވަހާރަކޮށްލިއެވެ.

އިސްރާއީލުން ދިން މި ހަމަލާތައް ކުށްވެރި ކުރުން ފިޔަވާ ރަޝިޔާ އިން އިތުރު ކަމެއް ކޮށްފައި ނުވާ ކަން ބައެއް ރިޕޯޓް ތަކުގައި އޭރުވެސް ވަނީ ފާހަގަ ކޮށްފައެވެ. ރަޝިޔާ އިން އެއްވެސް އަސްކަރީ ފިޔަވަޅެއް ނޭޅުމުގެ އިތުރުން ޑިޕްލޮމެޓިކް ޕްރެޝަރެއް ވެސް ކޮށްފައެއް ނުވެއެވެ.

ރަޝިޔާގެ ރައީސް ވުލަޑިމިއަރ ޕުޓިން އާއި އީރާނުގެ ރައީސް މަސްއޫދު ޕެޒެޝްކިއަން ޖެނުއަރީ 17 ގައި ރަޝިޔާގެ ވެރިރަށް މޮސްކޯގައި ދެ ގައުމުގެ ދެމެދުގައި ސްޓްރެޓެޖިކް ޕާޓްނަރޝިޕް މުއާހަދާއެއްގައި ވަނީ ސޮއި ކުރައްވާފައެވެ.

އޭއެފްޕީން ބުނާ ގޮތުގައި ދެފަރާތުން މި މުއާހަދާގައި ސޮއިކުރީ ގެ ގައުމުގެ ގުޅުން، ޚާއްޞަކޮށް އަސްކަރީ އެއްބާރުލުމުގެ ދާއިރާ ވަރުގަދަ ކުރުމަށެވެ.

ނަމަވެސް، މި އެއްބަސްވުމަކީ މޮސްކޯ އިން ނޯތު ކޮރެއާ އާއެކު ސޮއިކުރި ފަދަ އެއްބަޔަކު އަނެއް ބަޔަކު ދިފާޢުކުރުމުގެ މުއާހަދާ އެއް ނޫނެވެ.