އައްޑޫ ބިޔުރޯ

ސެންޓްރަލް ޕަވަރ ސްޓޭޝަންގެ ޖެނެރޭޝަން ކެޕޭސިޓީ އިތުރު ކުރުމަށް އަލަށް ހޯދި 1،000ކ.ވ ގެ އިންޖީނު އައްޑޫ އަށް ގެންގޮސްފައިވާއިރު، ކަރަންޓްގެ މައްސަލައަށް ހައްލު ނުލިބި އަނެއްކާވެސް ހުކުރު ދުވަހު ކަރަންޓްގެ ޚިދުމަތް މެދުކެނޑިއްޖެ އެވެ.

ފެނަކައިން ބުނެފައިވަނީ އިންޖީނުގެއަށް ދިމާވި މައްސަލައަކާއި ގުޅިގެން ހުކުރު ދުވަހުގެ މެންދުރު ފަހުން ފެށިގެން ދެ ގަޑިއިރަށް ކަރަންޓް ކަނޑާފައެވެ.

ފެނަކައިން ބުނީ މިހާރު ވަނީ އިންޖީނު، ސެންޓްރަލް ޕަވަރ ސްޓޭޝަނަށް ގެންގޮސް އިންސްޓޯލް ކުރުމުގެ މަސައްކަތް ފަށާފައި ކަމަށެވެ. ނަމަވެސް ލޯޑް މަތިވުމުގެ ސަބަބުން އެކި ސަރަހައްދުތަކުން ހަވީރު 17:00 އިން ފެށިގެންވެސް ވަނީ ކަރަންޓް ކަނޑާފަ އެވެ.

ކަރަންޓްގެ މައްސަލައަށް ދާއިމީ ހައްލެއް ނުލިބި ގިނަ ދުވަސްވެފައިވާއިރު، ސޯޝަލް މީޑިއާގައި ދަނީ ސަރުކާރަށް ވަރަށް ބޮޑަށް ފާޑުކިޔަމުންނެ އެވެ.

އައްޑޫސިޓީގެ ގުޅިފައިވާ ރަށްތަކުން އެ ސިޓީގެ ރައްޔިތުންގެ އަސާސީ ދިރިއުޅުމަށް ދަތިވާ ވަރަށް ކަރަންޓު ކެނޑެމުންދާތީ މިދިޔަ އަންގާރަ ދުވަހު، ހިތަދޫ ދެކުނު ދާއިރާގެ މެމްބަރު އިބްރާޙިމް ނާޒިލް ހުށަހެޅުއްވި ކުއްލި މައްސަލަ ވަނީ މަޖިލީހުން ބޭރުކޮށްލާފަ އެވެ.

އައްޑޫ ސިޓީން ކަރަންޓު ކެނޑޭ މައްސަލަ އެއީ މާބޮޑުކަމެއް ކަމަށް ނުދެކި، އައްޑޫ ސިޓީއަށް ނިސްބަތްވާ ޕީއެންސީގެ މެންބަރުން ކުއްލި މައްސަލަ ބޭރުކޮށްލަން ވަނީ ވޯޓުދީފަ އެވެ.

އައްޑޫގައި ކަރަންޓް ކެނޑި މައްސަލަ ހައްލުނުވެ ރަމަޟާން މަހުވެސް އެ ސިޓީގެ ރައްޔިތުން އަންނަނީ ތަކުލީފުތަކާއި ކުރިމަތިލަމުންނެވެ. އެގޮތުން ވަކި އެންގުމެއްނެތި ކަރަންޓް ކެނޑުމުގެ ސަބަބުން ގޭގައި ހިފާ ގެންގުޅޭ ކަރަންޓު އާލާތްތައް ހަލާކުވެ ރައްޔިތުން ވަނީ މި ރަމަޟާން މަހު މުޒާހަރާއަށްވެސް ނުކުމެފަ އެވެ.

ރަމަޟާން މަސް ފެށެންވާއިރަށް އައްޑޫގެ ކަރަންޓުގެ މައްސަލަ ހައްލުކޮށްދެއްވުމަކީ ރައީސް ޑރ.މުހައްމަދު މުއިއްޒުގެ ވައުދުފުޅެކެވެ. އެހެންނަމަވެސް ސަރުކާރުން އައްޑޫ ސިޓީ އަށް ކަރަންޓު ފޯރުކޮށްދިނުމުގައި އިހުމާލުވަމުންދާ ދިއުމުގެ ސަބަބުން މި ރަމަޟާން މަހު އެ ސިޓީގެ އާއްމުންގެ އަސާސީ ދިރިއުޅުމުގެ ހާލަތަށް ބޮޑެތި ދަތިތަކެއް ކުރިމަތިވެފައިވާ ކަމަށް ކުއްލި މައްސަލައިގައި ބުނެފައިވެ އެވެ.