އެމްޕީއެލް ކްލިއަރެންސް ޑިޕާޓްމެންޓްގެ ހެޑް، ޑެޕިއުޓީ ޖެނެރަލް މެނޭޖަރ - ކަރގޯ ކްލިއަރެންސް ސައުދުﷲ މުހައްމަދު، އެމްޕީއެލްގެ އަންހެން މުވައްޒަފުންތަކަކަށް ޖިންސީ ގޯނާކުރި ކަމަށް ބުނާ މައްސަލަ އެއް އޮއްބާލަން އުޅޭކަމުގެ އަޑުފެތުރިއްޖެއެވެ.
ރާއްޖެ އެމްވީ އަށް އިތުބާރު ހުރި ގޮތަކަށް މައުލޫމާތު ލިބިފައިވާ ގޮތުން މި މައްސަލަ އެމްޕީއެލްގެ ހެރެސްމެންޓް މައްސަލަތައް ބަލާ ކޮމިޓީ އަށް ވަނީ ހުށަހަޅާފައެވެ. އެހެންނަމަވެސް އެ މައްސަލަ ނުބަލާ އޮއްބާލަން އުޅޭކަމަށް ބުނެ އެކަމުގެ ކަންބޮޑުވުން ސޯޝަލް މީޑިއާގައި ބައެއް އާއްމުން ދަނީ ހިއްސާކުރަމުންނެވެ. މައުލޫމާތު ލިބިފައިވާ ގޮތުގައި އަންހެން މުވައްޒަފުންތަކަކަށް ޖިންސީ ގޯނާކުރިކަމުގެ ތުހުމަތު ކުރެވޭ ސައުދު އަކީ މިހާރު އެމްޕީއެލްގެ ސީއީއޯގެ މަޤާމުގައި ހުރި މުހައްމަދު ވަޖީދު އިބްރާހިމް އާއި ވަރަށް ގާތް ގުޅުމެއް އޮންނަ ފަރާތެއް ކަމަށްވެސް މައުލޫމާތު ލިބިފައިވެއެވެ. މީގެ އިތުރުން، ސައުދު މުވައްޒަފުންތަކަކަށް ޖިންސީ ގޯނާ ކުރިކަމުގެ މައްސަލަ ކަމާ ގުޅުން ހުރި ކޮމިޓީތަކަށް ހުށަހެޅުމުން، އޭނާ ސަސްޕެންޑްކޮށްފައި ނުވާ ކަމަށް ރާއްޖެ އެމްވީއަށް ވަނީ އިތުބާރު ހުރިގޮތަކަށް މައުލޫމާތުލިބިފައެވެ.
ހަމައެހެންމެ ސައުދު އާއި މެދު މިފަދަ ތުހުމަތުތަކެއް ކުރެވުނު ފަހުން ކުއްލި ގޮތަކަށް އޭނާ ޗުއްޓީ ނަގާފައިވާ ކަމަށް ވެސް ރާއްޖެ އެމްވީ އަށް ވަނީ މައުލޫމާތު ލިބިފައެވެ. އަދި ވަގުތީ ގޮތުން އޭނާ ކްލިއަރެންސް ހިންގުމުން ދުރުކުރި ކަމުގައި ވީނަމަވެސް، މި ވަގުތު ވެސް އޮޕަރޭޝަން ހިންގުމުގެ އިރުޝާދުތައް އޭނާ ދަނީ ދެމުން ކަމަށް މައުލޫމާތު ލިބިފައެވެ. އިތުރަށް މައުލޫމާތު ލިބިފައިވާ ގޮތުގައި އޭނާ އަނެއްކާވެސް ވަރަށް އަވަހަށް އަނބުރާ ކްލިއަރެންސް ޑިޕާޓްމެންޓަށް ބަދަލުކުރުމަށް ވަނީ ހަމަޖެހިފައެވެ.
ހެރެސްމެންޓް ކޮމިޓީގައި ތިބި މީހުންނާއި ސައުދު އާއި ގާތް ގުޅުމެއް އޮތުމުގެ ސަބަބުން މި މައްސަލަ ނުބަލަނީ ކަމަށް ތުހުމަތުކުރެވޭ ކަމަށް މި މައްސަލަ އާއި ގުޅުން ހުރި މައުލޫމާތު އެނގޭ މީހަކު ވަނީ ރާއްޖެ އެމްވީ އާޢި މައުލޫމާތު ހިއްސާކުރަމުން ބުނެފައެވެ.
މީގެ ކުރިން އެމްޕީއެލްގައި މިފަދަ އަމަލެއް ހިންގި ފަރާތަކާއި މެދު ކުންފުނީގެ އޭރުގެ ވެރިން ވަނީ ހަރުކަށި ފިޔަވަޅުތަކެއް އަޅާފައެވެ. އެހެންނަމަވެސް މިފަހަރު މި މައްސަަލަ އޮއްބާލުމަށް ކުންފުނީގެ އިސް ފަރާތްތަކުން ޕްރެޝަރކުރުމާއި، މިއީ މާބޮޑު މައްސަލަ އެއް ނޫންކަމަށް ހަދަން އުޅޭ ކަމަށް މައުލޫމާތު ލިބިފައިވާ ކަމަށް ރާއްޖެ އެމްވީ އާއި ވާހަކަދެއްކި ބައެއް މަސްދަރުތަކުން ވަނީ ހާމަކޮށްފައެވެ.
