ހުކުރު ދުވަހާއި އެދުވަހުގެ ރޭ ކުރި ވިއްސާރައިގައި ފެން ބޮޑުވުމުގެ ސަބަބުން ދިރިއުޅެން އުނދަގޫވި ހާލަތަށް ދިޔަ 36 ގޭބިސީން 226 މީހަކަށް ވަގުތީ ބޯހިޔާވަހިކަމާއި ކާބޯތަކެތި ފޯރުކޮށްދެވިފައިވާ ކަމަށް ނެޝަނަލް ޑިޒާސްޓަރ މެނޭޖްމެންޓު ސެންޓަރުން ބުނެފި އެވެ.

ހުކުރު ދުވަހުގެ ހެނދުނުން ފެށިގެން ވެހެމުން ދިޔަ ބޯ ވާރޭ، އެދުވަހުގެ ރޭއާއި ހަމައަށް ދެމިގެން ދިއައިރު، މުޅި މާލޭގައި ފެންބޮޑުވެ، ގިނަ ގެތަކާއި ވިޔަފާރިތަކަށް ވެސް ވަނީ ގެއްލުންތަކެއް ލިބިފައެވެ.

ނެޝަނަލް ޑިޒާސްޓަ މެނޭޖްމެންޓު ސެންޓަރުން ބުނީ ފެން ބޮޑުވުމުގެ ސަބަބުން އެހީތެރިކަމަށް އެދި 774 ތަނަކުން ރިޕޯޓުކުރި ކަމަށާއި، އޭގެތެރެއިން 554 ފަރާތުން އެދުނީ ފެން ވަނުން މައިތިރިކުރަން ވެލި ބަސްތާ ޖަހައި ދިނުމަށް ކަމަށެވެ.

ހުކުރު ދުވަހު، މުޅި ރާއްޖެއަށް މޫސުން ގޯސްވެ، ބައެއް ރަށްތައް ފެންބޮޑުވެ، އަދި ބައެއް ރަށްތަކަށް އުދަ އަރައިގެން ވެސް ބޮޑެތި ގެއްލުންތައް ވަނީ ލިބިފައެވެ. އެގޮތުން ބައެއް ރަށްރަށުގައި ފެން ހިންދުމުގެ މައްސައްކަތް އެމްއެންޑީއެފް އިން ވަނީ ކޮށްފައެވެ.

ޑިޒާސްޓަ މެނޭޖްމެންޓު ސެންޓަރުން ރިޕޯޓުކޮށްފައިވާ ގޮތުގައި އުދަ އަރައިގެން ގެއްލުން ލިބުނީ ރ. އިނގުރައިދޫ އަދި ށ. މަރޮށްޓަށެވެ.

ވާރޭވެހި ފެން ބޮޑުވުމުގެ ސަބަބުން މާލޭގެ އިތުރުން އަށް ރަށަކަށް ގެއްލުން ލިބިފައިވާ ކަމަށް ވެސް އެ ސެންޓަރުން ބުންޏެވެ. ވާރޭ ވެހި ފެންބޮޑުވުމުގެ ސަބަބުން ގެއްލުން ލިބުނު ރައްތަކުގެ ތެރޭގައި ފ. ނިލަންދޫ، ކ. ހިންމަފުށި، ކ. ގުރައިދޫ، ދ. ކުޑަހުވަދޫ، ދ. މީދޫ، ފ. މަގޫދޫ، ފ. ފީއަލި، އދ. މާމިގިލި ހިމެނެއެވެ. މީގެ ތެރެއިން ބައެއް ރަށްރަށުގައި ފެންބޮޑުވެ، ގިނަ ގެތަކަކަށް ވެސް ގެއްލުންތައް ލިބިފައިވާ ކަމަށް ޑިޒާސްޓަރ މެނޭޖްމެންޓު ސެންޓަރުން ބުންޏެވެ.

މާލޭގައި ބޮޑުވެފައި އޮތް ފެންގަނޑު ހިންދުމަށް ސިފައިން ނުކުމެ މަސައްކަތް ކުރި ނަމަވެސް، ބޯކޮށް ވެހެމުން ދިޔަ ވާރޭގެ ސަބަބުން ފެންގަނޑު ތިރިނުވެ އެތައް ގަޑިއިރެއް ދިގުދެމިގެން ދިޔައެވެ. މާލޭގައި އެންމެ ބޮޑަށް ފެން ބޮޑުވާ މާފަންނުގައި އޮތް ފެންގަނޑު ރަސްފަންނާ ދިމާއިން ބޭރު ކޮށްލަން އާންމުން ނުކުމެ ވަނީ ކޯރެއް ކަނޑާފަ އެވެ.

ހުކުރު ދުވަހު ވެހުނު ބޯ ވާރޭގެ ސަބަބުން މާލޭގައި ބޮޑުވި ފެންގަނޑު ހިނދި އާންމު ހާލަތަށް މިހާރު އައިސްފައިވީ ނަމަވެސް އަދި ވެސް މާލޭގެ އެކި ހިސާބުތަކުގައި ފެން ނުހިނދި ކޮންމެވެސް ވަރަކަށް އޮތްކަން ފާހަގަކޮށްލަން ޖެހެއެވެ.