ކީރިތި ޤުރްއާނަކީ މާތް ﷲ އިންސާނުންނަށް ތެދުމަގު ދެއްކެވުމަށްޓަކައި ބާވައިލެއްވި އިލާހީ ޤާނޫނު ކަމަށް ހުކުރު ހުތުބާގައި ބުނެފިއެވެ.
ރާއްޖޭގެ އެކި ކަންކޮޅުތަކުގައި އިއްވި ހުކުރު ހުތުބާގައި ބުނެފައިވަނީ ކީރިތި ޤުރްއާނަކީ މާތް ﷲ އެކަލާނގެ ރަސޫލާ މުޙައްމަދު ﷺ އަށް ބާވައިލެއްވި، އެކަލާނގެ ކަލާމްފުޅު ކަމަށެވެ. ކީރިތި ޤުރްއާނަކީ މާތް ﷲ އިންސާނުންނަށް ތެދުމަގު ދެއްކެވުމަށްޓަކައި ބާވައިލެއްވި އިލާހީ ޤާނޫނު ކަމަށާއި، މުސްލިމުން ދިރިއުޅެންވީ ގޮތުގެ މަންހަޖު ކަމަށެވެ. އެހެންކަމުން އަހުރެމެން މުސްލިމުން ކީރިތި ޤުރްއާން ކިޔަވައި، އެފޮތާ އެއްގޮތަށް އުޅުމާއި ސުލޫކު ބައްޓަންކުރަން ޖެހޭ ކަމަށް ހުތުބާގައި ބުނެފައިވެއެވެ.
ހުތުބާގައި ބުނެފައިވަނީ އަހުރެމެންގެ ދަރީންނަށް ކީރިތި ޤުރްއާން އުނގަންނައިދޭން ޖެހޭ ކަމަށެވެ. އަދި އެކުދިންގެ ހިތްތަކުގައި ކީރިތި ޤުރްއާނުގެ ލޯބި އަށަގަންނުވައި، އެފޮތުގެ މަތިވެރިކަމާއި މާތްކަން ދަސްކޮށްދޭން ޖެހޭ ކަމަށެވެ. ހުތުބާގައި ބުނެފައިވަނީ ކީރިތި ޤުރްއާނަށް އިޙްތިރާމްކުރަން ދަސްކޮށްދޭން ޖެހޭ ކަމަށެވެ.
الله تَعَالَى ވަޙީކުރައްވައިފައި ވެއެވެ. "ހަމަކަށަވަރުން، އެ ޤުރްއާނަކީ، ޢާލަމުތަކުގެ ވެރި ރަސްކަލާނގެ ބާވައިލެއްވި ފޮތެއްކަން ކަށަވަރެވެ. ކަލޭގެފާނުގެ ހިތްޕުޅުގެ މައްޗަށް އެ ޤުރްއާނައިގެން ފައިބައިވަޑައިގަތީ، ޖިބްރީލުގެފާނެވެ. އެއީ (މީސްތަކުންނަށް) އިންޒާރު ކުރައްވާ ބޭކަލުންގެ ތެރެއިން ކަލޭގެފާނު ވެވަޑައިގަތުމަށެވެ." ކީރިތި ޤުރްއާނަކީ ބަލާޣާތްތެރިކަމާއި ފަޞާޙަތްތެރިކަމުގައި ވެސް މުޢުޖިޒާތެކެވެ. ޖާހިލީ ޒަމާނުގައި ޢަރަބީންގެ ތެރޭގައި އުޅުނު އެންމެ ފަޞާޙަތްތެރީން ވެސް ވަނީ އެފަދަ ޤުރްއާނެއް ގެނައުމަށް ނުކުޅެދިފަ އެވެ. އެކަމަށް އިޝާރަތްކުރައްވައި الله تَعَالَى ވަޙީކުރައްވައިފައި ވެއެވެ. "ކަލޭގެފާނު ވިދާޅުވާށެވެ! ހަމަކަށަވަރުން، މި ޤުރްއާނާ އެއްފަދަ އެއްޗެއް ގެނައުމަށް އިންސީންނާއި، ޖިންނީން އެއްވިނަމަވެސް، އެއާ އެއްފަދަ އެއްޗެއް އެއުރެންނަކަށް ނުގެނެވޭނެތެވެ. އެއުރެންގެ އެއްބަޔަކު އަނެއްބަޔަކަށް ވާގިވެރިން ކަމުގައި ވީނަމަވެސްމެއެވެ." ކީރިތި ޤުރްއާން ބާވައިލެއްވީ الله تَعَالَى އެފޮތުގެ ކުރިން ބާވައިލެއްވި ހުރިހައި ފޮތްތަކެއް ތެދުކުރަނިވި އަދި އެ ފޮތްތަކުގެ މައްޗަށް ހެކިވަނިވި ފޮތެއްގެ ގޮތުގައެވެ.ހުކުރު ހުތުބާ
ހުތުބާގައި ބުނެފައިވަނީ މިއަދު އަހުރެމެންނަށް ވަނީ ކީރިތި ޤުރްއާން ކިޔަވައި ތިލާވަތު ކުރުމާއި، އެ ފޮތަށް ޢަމަލުކުރުން އުނދަގޫ ކަމަކަށްވެފައެވެ. އެކަމުގެ ސަބަބުން އަހުރެމެން ވަނީ ދީނާ ދުރުވެފައެވެ. އަދި ޣައިރު މުސްލިމުންގެ ކުރިމަތީގައި އަހުރެމެން ވަނީ ނިކަމެތިވެފައި ކަމަށެވެ.
ހުތުބާގައި ބުނެފައިވަނީ "އަދި ރަސޫލާ ވިދާޅުވިއެވެ. އޭ އަޅުގެ ވެރިރަސްކަލާކޮ! ހަމަކަށަވަރުން، ތިމަންއަޅާގެ قوم ގެމީހުން، މި قرآن އަކީ އެއްކިބާކޮށްލާފައިވާ އެއްޗެއްކަމުގައި ހަދައިފޫއެވެ." ކަމަށް ﷲ تَعَالَى ވަޙީކުރައްވާފައިވާ ކަމަށެވެ.
ހުތުބާގައި ބުނެފައިވަނީ ކީރިތިޤުރްއާނަކީ އަހުރެމެން މުސްލިމުންގެ ހިތާއި ފުރާނައާއި ޟަމީރުގެ ކާނާއެވެ. އަދި ޤުރްއާނަކީ ބަލިތަކަށް އޮތް ޝިފާއެކެވެ.
ކީރިތި ޤުރްއާން ކިޔެވުމާއި ޤުރްއާނަށް ޢަމަލުކުރުމަކީ، އަހުރެމެންގެ މައްޗަށް ވާޖިބު ކަމަކަށްވީ ހިނދު، ޤުރްއާނުން މީހާ ޒީނަތްތެރިވުމަކީ ވެސް ވާޖިބު ކަމެކެވެ. އެގޮތުން ތިމާގެ އެތެރެފުށާއި ބޭރުފުށުގެ ޠާހިރުކަމަކީ އެންމެ ފުރަތަމަ ޒީނަތެވެ. الله تَعَالَى ވަޙީކުރައްވައިފައި ވެއެވެ. "ހަމަކަށަވަރުން، އެއީ މާތްވެގެންވާ ޤުރްއާން ކަން ކަށަވަރެވެ. ރައްކާތެރި ކުރައްވާފައިވާ ފޮތެއްގައެވެ. ޠާހިރުވެގެންވާ މީހުން މެނުވީ، އެ ފޮތުގައި ނުބީހޭނެތެވެ. ޢާލަމްތަކުގެ ވެރި ރަސްކަލާނގެ ޙަޟްރަތުން ބާވައިލެއްވި ފޮތެކެވެ." ދެވަނަ ޒީނަތަކީ ﷲއަށް ބިރުވެތިވުމުގައި ތިމާގެ ނަފުސު ޒީނަތްތެރިކުރުމެވެ. الله تَعَالَى ވަޙީކުރައްވައިފައި ވެއެވެ. "الله، އެންމެ ރިވެތިބަސްތައް ފޮތެއްގެ ސިފައިގައި ބާވައިލެއްވިއެވެ. (ފުރިހަމަކަމުގައި) އެއްފަދަވެގެންވާ، ތަކުރާރުކޮށް ކިޔެވޭ ފޮތަކަށްވާ حال ގައެވެ. އެ ފޮތް ކިޔެވޭހިނދު، އެއުރެންގެ ވެރިރަސްކަލާނގެއަށް ބިރުވެތިވާމީހުންގެ ގައިގެހަންތައް ތުރުތުރުއަޅައިގެންދެއެވެ. ދެން އެއުރެންގެ ގައިގެހަންތަކާއި، ހިތްތައް الله ހަނދުމަކުރުމަށް މަޑުމޮޅިވެދެތެވެ. އެއީ الله ގެ ތެދުމަގެވެ. އެކަލާނގެ އިރާދަކުރައްވާމީހަކަށް، އެއިން މަގުދައްކަވަތެވެ. އަދި الله މަގުފުރައްދަވާ މީހަކަށް، ފަހެ ތެދުމަގު ދައްކާނޭ ހަމައެކަކުވެސް ނުވެތެވެ."ހުކުރު ހުތުބާ
ކީރިތި ޤުރްއާން ކިޔެވުމަކީ ﷲ ހަނދުމަކުރުމުގެ ގޮތުން ކުރެވޭނެ އެންމެ މުހިއްމު އަދި އެންމެ މާތް އެއްކަމެވެ. ﷲ تَعَالَى ވަޙީކުރައްވައިފައިވަނީ "އެއުރެންނީ، إيمان ވި މީހުންނެވެ. އަދި ﷲ ހަނދުމަކުރުމުން، އެއުރެންގެ ހިތްތައް ހަމަޖެހޭ މީހުންނެވެ. ހިތްތައް ހަމަޖެހެނީ، ﷲ ހަނދުމަކުރުމުން ނޫންހެއްޔެވެ؟" ކީރިތި ޤުރްއާން ކިޔެވުމަކީ ﷲ ހަނދުމަކުރުމުގެ ގޮތުން ކުރެވޭނެ އެންމެ މުހިއްމު އަދި އެންމެ މާތް އެއްކަމެވެ.
ޤުރްއާނުން ޒީނަތްތެރިވުމުގައި ތިންވަނަ ޒީނަތަކީ އެފޮތުގައިވާ އެންމެހައި ކަމެއް ތެދުކުރުމެވެ. ﷲގެ އެއްކައުވަންތަކަން ޤަބޫލުކޮށް އީމާންކަމާއި އިސްލާމްކަމުގެ ރުކުންތައް ތެދުކޮށް ޤަބޫލުކުރާނަމަ، ތިމާގެ ޢަމަލާއި ބަސް ދިމާވާން ޖެހޭނެ ކަމަށް ހުތުބާގައި ބުނެފައިވެއެވެ.
ޤުރްއާނުން ޒީނަތްތެރިވުމުގައި ހަތަރުވަނަ ޒީނަތަކީ މަޑުމައިތިރިވުމާއި ކެތްތެރިވުމެވެ. الله تَعَالَى ވަޙީކުރައްވައިފައި ވެއެވެ. "ފަހެ، ކަލޭގެފާނު ރިވެތިވެގެންވާ ކެތްކުރެއްވުމަކުން ކެތްކުރައްވާށެވެ!" ކެތްތެރިވުމާ ބެހޭގޮތުން ކީރިތި ޤުރްއާނުގައި ވަރަށް ގިނަ އާޔަތް އައިސްފައިވުމުން އެނގެނީ އެކަމުގެ މުހިއްމުކަމެވެ. އަދި ކެތްތެރިވުމުގެ ފޭރާމުން ފޭރާން އެޅުމަކީ، ކީރިތި ޤުރްއާން ޤަބޫލުކުރާ ކޮންމެ މީހަކު، ކުރަންޖެހޭނެ ކަމެއްކަމެވެ. އަދި މަޑުމައިތިރިކަމާއެކު ވާހަކަދައްކައި ހެދުމަކީވެސް ކެއްތެރިވުމުގެ ސިފައެކެވެ. ތިމާއަކީ ރައްބެއް ކަމުގައި ދަޢުވާކުރި ކިބުރުވެރި ފިރުޢައުނުގެ ގާތަށް މޫސާ ޢަލައިހިއްސަލާމާއި އެކަލޭގެފާނުގެ އަޚު، ހާރޫނު ޢަލައިހިއްސަލާމް ފޮނުއްވިހިނދު الله تَعَالَى މި ފަދައިން އެންގެވިއެވެ. "ފަހެ، މަޑުމައިތިރި ބަހުން ތިޔަދެބޭކަލުން އޭނާއަށް ބަސް ވިދާޅުވާށެވެ! (އެއީ) އޭނާ ހަނދުމަކޮށް، ނުވަތަ ބިރުވެތިވޭތޯ އެކަމުގެ އުންމީދުގައެވެ."ހުކުރު ހުތުބާ
ކީރިތި ޤުރްއާނުގެ އަޚުލާޤުން ޒީނަތްތެރިވުމަކީ އެކަމުގެ ސަބަބުން ގިނަގުނަ ދަރުމައާއި ޘަވާބު ލިބޭނެކަމެކެވެ. އަދި އެއީ ދެދުނިޔޭގެ ބާއްޖަވެރިކަން ލިބޭނެ ކަމެއް ކަމަށް ހުތުބާގައި ބުނެފައިވެއެވެ. ކީރިތި ރަސޫލާގެ ޚުލްޤުފުޅާ ބެހޭގޮތުން أُمُّ الْمُؤْمِنِيْنَ عَائِشَةَ رَضِيَ اللهُ عَنْهَاއާ ސުވާލުދެންނެވުނު ހިނދު އެކަމަނާ ވިދާޅުވެފައިވަނީ "އެކަލޭގެފާނުގެ ޚުލްޤުފުޅަކީ ކީރިތި ޤުރްއާނެވެ." ހުތުބާގައި ބުނެފައިވަނީ މިއީ މުސްލިމުންގެ ދުސްތޫރެވެ. އަހުރެމެން ޢަމަލު ކުރަންޖެހޭ މަންހަޖެވެ.
ހުތުބާގައި ބުނެފައިވަނީ ކީރިތި ރަސޫލާގެ މައްޗަށް صَلَوَاتއާއި سَلَامْލެއްވުން އެދި دُعَاءކުރުމަށް މާތް ﷲ ގަދައަމުރަކުން އަމުރުކުރައްވައިފައިވާ ކަމަށެވެ.
